Eindilo mokuxupifwa meembudi
Epsalme laDavid.
1 Omwene, va hokololifa ava tava shilafana naame,
kondja naava tava kondjifa nge!
2 Kufa oshikelelifo eshi shinini naashi shakula,
fikama u kwafe nge.
3 Yeda eonga, u idile ondjila yovataatai vange,
lombwela omwenyo wange u tye:
“Aame exupifo loye.”
4 Ava tava kongo omwenyo wange,
nava fifwe ohoni va lengaifwe!
Naava va dutila nge oshiponga,
nava shunifwe shanimanima,
nava pembifwe kohoni yavo.
5 Nava ningwe va fa olungu tali i omhepo,
nomweengeli wOmwene ne va undwileshi.
6 Ondjila yavo nai laulikwe, yo i kale nomufenhu,
nomweengeli wOmwene ne va taatae.
7 Osheshi vo ova tela nge omiyo oshimha meholeko,
nova fela nge elambo epwanga.
8 Ngeno na hangelelwe koshiponga ine shi shiiva,
a papale eshi e li melulo laye,
eli a tela nge meholeko,
e liyule ye mwene.
Omo na wile, a nyonauke po.
9 Opo nee omwenyo wange tau hafele mOmwene
nokunyakukilwa exupifo laye.
10 Nomakipa ange aeshe otaa ka tya:
“Omwene, olyelye e fike pwoove?
Ove ou ho xupifa omufininikwa
kwaau, e mu dule eenghono;
heeno, nomuhepekwa nohepele kwaau te mu lu.”
11 Otapa fikama eendobwedi doipupulu,
tava pula nge, eshi ndihe shii;
12 ouwa ou nde va ningila,
vo otave u pilulile nge owii;
omwenyo wange tau nyika oupongo.
13 Vo eshi va li tava vele,
onda li nda djala omudjalo woufiye,
ndele handi lidilike eendja,
nohandi va indilile, nde lituvikila komutwe.
14 Nda li nda kala handi nyika oufiye
ngaashi omunhu te u nyikile kaume kaye nomumwaina,
nongaashi ou ta lili eenghali daina
osho ame nda li handi nyongameke omutwe wange.
15 Ndele paife, ame eshi nda punduka,
otashi va hafifa,
ndele tave liongelele nge, ve lipaka kumwe
ngaashi ovakalakali ava ndihe va shii,
navo otava shashaula nge,
itava fuda po nande.
16 Ove li po ovadinifi vange novashadauli,
tava ulilile nge mo,
ndele tave likweshele nge nomayoo.
17 Omwene, fiyo onaini to shi tale ngaho hano?
Shila omwenyo wange momanyonauno avo,
u u vakule meenghoshona.
18 Opo nee nda hala, ndi ku fimaneke meongalo linene,
nda hala, ndi ku tange
moipafi yongudu inene yovanhu.
19 Ava tava twifa nge eemhata epwanga,
ino efa va yole nge,
ava tava tondo nge oshimha,
ino efa, va fiikile nge omesho.
20 Vo itava popi eendjovo tadi eta ombili,
ndelenee ava ve hole ombili moshilongo,
otave va dutile eendaka dowii;
21 ova akamekela nge omakanya, tava ti:
“Shalongo, shalongo,
eshi otwe shi mona nomesho etu.”
22 Omwene, Ove we shi mona,
ino kala wa mwena!
Omwene, ino kala kokule naame!
23 Penduka, Ove pashukile nge, u yukifile nge,
Kalunga, Omwene wange, popile nge!
24 Pe nge ouyuki pauyuki woye mwene,
Omwene, Kalunga kange,
ino va efela va hafele nge.
25 Ino efa, va popye momitima davo va tye:
“Shalongo shetu, shahaitana.”
Ove ino efa va tye:
“Otwe mu nyonauna po.”
26 Ava tava hafele oudjuu wange,
aveshe kumwe, va fifa ohoni,
va dinde omitwe,
ava tave lishiivile nge oukengeli,
va djaleka elengwa nodino.
27 Ava, va halela nge eyukifilo,
vo nava nyakukifwe va hafe, alushe vo va tye:
“Omwene, Oye omunene,
ou ta halele omupiya waye ouwa.”
28 Nelaka lange nali tange ouyuki woye
nehambelelo loye efiku alishe.
© Oshikwanyama Bible Revised © Bible Society of Namibia, 2008, 2012.
