ESRA 5 - Oshikwanyama Bible (OKYB)

Etungululo lotembeli tali twikilwa

1 Ndelenee omuxunganeki Haggai naSakaria yaIddo, ovaxunganeki, va xunganekela Ovajuda ava va li kuJuda nomuJerusalem medina laKalunga kaIsrael, olo la li navo. 2 Opo nee Serubbabel yaSalatiel, naJosua yaJosadak va fikama ndele va hovela okutungulula ongulu yaKalunga oyo ya li muJerusalem, ndele ovaxunganeki vaKalunga ove va yambidida. 3 Mefimbo tuu olo Tattenai, omupangeli wombinga yokouninginino waEufrat, naSetar-Bosenai naava va ama kuvo, ve uya kuvo ndele tava ti ngaha kuvo: “Olyelye e mu lombwela mu tungulule ongulu ei nye mu tunge ohotekuma oyo?” 4 Opo nee twe va lombwela omadina ovalumenhu ovo hava tungu etungo eli. 5 Ndelenee eisho laKalunga la li kombada yovakulunhu vOvajuda, onghee hano vo inave va kelela fiyo eshiivifilo la tuminwa Darius, nofiyo onhumwafo i nenyamukulo ya aluka.

Onhumwafo yaTattenai ya shangelwa Darius

6 Eshangululo lonhumwafo, Tattenai, omupangeli wombinga yokouninginino waEufrat, naSetar-Bosenai naava va ama kuvo Ovafarsaki ovo va li mouninginino waEufrat, ove i tumina Darius. 7 Vo ove i tumina eshiivifilo, ndele mulo mwa shangelwa ngaha: “Kohamba Darius: Ombilielela!

8 “Ohamba tai shiivifilwa nokutya, fye twa ile koshilongo shaJuda kongulu yaKalunga omufimanekwa. Ndele yo oya tungwa nomamanya manene nomiti tadi tulwa komakuma, noshilonga osho tashi longwa nawa ndele tashi ehene komesho momake avo. 9 Opo nee twa pula ovakulunhu venya; fye twe va lombwela ngaha: Olyelye e mu lombwela, mu tungulule ongulu ei nye mu tunge ohotekuma oyo? 10 Fye twa pula vali omadina avo tu e ku shiivifile, nokutya fye twa shanga omadina aava tave va pitile komesho, 11 ndele vo ove tu pa enyamukulo eli ndele tava ti: ‘Fye ovapiya vaKalunga komeulu nokopedu, ndele hatu tungulula ongulu inya ya tungwa momido donale, oyo ya tungwa kohamba inene yaIsrael, ndele ye i shakenifa. 12 Ndelenee ootate eshi va handukifa Kalunga komeulu, Ye e va yandja momake aNebukadnesar, ohamba yaBabilon, Omukaldea. Ye okwa hanauna po ongulu ei nokwa twala ovanhu kuBabilon. 13 Ndelenee momudo wotete waKores, ohamba yaBabilon, ohamba Kores ya yandja elombwelo kutya, ongulu yaKalunga i tungululwe. 14 Noinima oingoldo noisiliveli yongulu yaKalunga, oyo ya kufilwe kuNebukadnesar motembeli yomuJerusalem, nokwe e i twalele kotembeli yomuBabilon, oyo ya kufifwa kohamba Kores motembeli yomuBabilon, ndele ya yandjwa kuumwe e nedina Sesbassar, ou a tulwa po omupangeli. 15 Ndele Kores e mu lombwela: Tambula oinima ei, i tula motembeli yomuJerusalem, ndele tungululeni ongulu yaKalunga ponhele yayo. 16 Opo nee Sesbassar ou e uya nokwa tunga ekanghameno longulu yaKalunga yomuJerusalem. Okudja kefimbo olo fiyo opaife otai tungwa, ndelenee inai pwa okutungwa.’ 17 Ngeenge tashi wapalele ohamba, napa konakonwe melimba lomamona ohamba muBabilon, ngeenge osho tuu nokutya, ohamba Kores ya yandja elombwelo ongulu ei yaKalunga yomuJerusalem i tungululwe. Nohamba nai tu tumine eshiivifilo loshinima eshi.”