HESEKIEL 4 - Oshikwanyama Bible (OKYB)

Eyeleko lekondekelo laJerusalem

1 “Ndele oove, kaana komunhu, kufa odopi, i tula poshi komesho yoye, ndele faneka kuyo oshilando, nokutya Jerusalem. 2 Shi tula mekondekelo loita, ndele shi tungifa omakondekelohote, shi fela ekuma ledu, shi ongela eenhanda, ndele shi tulila oikumunifo yohotekuma keembinga adishe. 3 Natango, kufa opana yoshivela, ndele i tula pokati keni noshilando i ninge ekuma loshivela. Noshipala shoye nashi shi taalele, shi kale sha kondekelwa, heeno ove u noku shi kondekela. Eshi osho edidiliko keumbo laIsrael.

4 “Nangela kolumosho loye u humbate oulunde weumbo laIsrael. Omafiku e fike pokunangala kwoye u nokuhumbata oulunde wavo. 5 Ndele Ame handi tula kombada yoye omido doulunde wavo, ohandi di ku valele omuvalu womafiku u fike pomafiku omafele atatu nomilongo omugoi. Osho hano u nokuhumbata oulunde weumbo laIsrael. 6 Ndele ove ngeenge wa xulifa omafiku aa, ove u nokunangela vali kombinga yokolulyo, opo u humbate oulunde weumbo laJuda omafiku omilongo nhee. Omudo keshe handi u ku valele efiku limwe. 7 Ndele oshipala shoye nokwooko kwoye kwa xutwa ku taalelifa kuJerusalem sha kondekelwa, ndele shi xunganekela owii. 8 Ndele tala, Ame ohandi ku mangifa eengodi, uha dule okupiluka kombinga nombinga fiyo wa xulifa omafiku ekondekelo loye.

9 “Ndele kufa omahangu noilyavala nomakunde nepungu noufila womungome neefukwa, ndele i tula melonga limwe, u liningile omungome nayo. Ove u noku u lya oule womafiku okunangela kolupati limwe, nokutya omafiku omafele atatu nomilongo omugoi. 10 Neendja doye u noku di lya pandjele, nokutya eesekeli omilongo mbali efiku keshe. Efimbo nefimbo u noku di lya. 11 Ove u nokunwa yo omeva pandjele, etata lolita. Efimbo nefimbo u noku a nwa. 12 Ndele ove u noku di lya ngaashi omungome womahangu ndele u noku u teleka kombada yomatudi omunhu moipafi yavo.” 13 Omwene ota ti: “Osho ngaha ovana vaIsrael ve nokulya omungome wavo inau yela mokati koiwana, oko Ame handi ke ve lihanifa.” 14 Ndelenee onda tya: “Akutu Omwene Kalunga, tala, omwenyo wange inau nyatekwa nande efiku limwe nokudja kounyasha wange fiyo opaife inandi lya sha eshi she lifila ile eshi sha nyanyaulwa, nomokanya kange inamu uya nande ombelela inai yela.” 15 Opo Ye ta ti kwaame: “Tala, Ame ohandi ku pe oushosho wongobe ponhele yomatudi omunhu. Kombada yao ove u nokuyofa omungome woye.”

16 Ndele Ye okwa lombwela nge vali: “Kaana komunhu, tala, ohandi teya po ekwafelo lomungome muJerusalem, ndele vo otava ka lya omungome pandjele nokunyika oufiye nokunwa omeva pandjele nokutumhauka omaxwilili. 17 Opo tava ka hangika koluhepo lomungome nolomeva, notava ngonene notava utamene pamwe omolwoshikolo shomatimba avo.”