Oshikefa tashi tulwa kuDavid meumbo laObed-Edom
1 Ndele David okwa kundafana novakulunhu veyovi novefele nomukulunhu keshe wovakwaita. 2 Ndele David okwa lombwela oshiongalele ashishe shOvaisraeli ndele ta ti: “Ngeenge tashi mu wapalele ndele tashi di kOmwene, Kalunga ketu, tu lihaneni ndele tu tumeni kuvakwetu ovo va fyaala natango moitukulwalongo aishe yOvaisraeli, ndele pamwe navo kovapristeli nokOvalevi vomoilando, oko ve nomaulifilo, nokutya nava ongale nafye. 3 Ndele natu eteni oshikefa shaKalunga ketu kufye, osheshi pomafiku aSaul inatu shi pula”. 4 Opo nee oshiongalele ashishe tashi ti, osho nashi ningwe, osheshi oshinima sha li sha wapala momesho ovanhu aveshe.
5 Ndele David okwa ongela Ovaisraeli aveshe okudja kuSihor shomuEgipiti fiyo okomhito yokuya kuHamat, va kufe mo oshikefa shaKalunga muKiriat-Jearim. 6 Opo nee David pamwe nOvaisraeli aveshe va ya kuBaala, kuKiriat-Jearim shomuJuda, opo va kufe ko oshikefa shaKalunga Omwene, ou ta kala omutumba kovakerubi, e shi tambula medina laye. 7 Ndele va tula oshikefa shaKalunga metemba lipe, ndele ve shi kufa mo meumbo laAbinadab. Ndele Ussa naAhjo va shinga etemba. 8 Ndele David nOvaisraeli aveshe va dana neenghono koshipala shOmwene nomaimbilo nouxumbafeta neenyalilo noungoma noosimbale nomanghuma. 9 Vo eshi ve uya koshipale shaKidon, Ussa okwa yakela oshikefa neke laye, osheshi eenhani oda punduka. 10 Opo nee ehandu lOmwene la xwamena Ussa, nokwe mu dipaa, shaashi ye a kuma oshikefa neke laye, onghee hano ye okwa fya koshipala shaKalunga. 11 Ndele David okwa ninga omwenyo mwii, Omwene eshi a dipaa Ussa. Onghee hano okwa luka onhele oyo Peres-Ussa fiyo onena eli. 12 Ndele mefiku tuu olo David okwa tila Kalunga ndele ta ti: “Ame ohandi dulu ngahelipi okweeta oshikefa shaKalunga kwaame?” 13 Onghee hano David ine shi itavela oshikefa shi etwe moshilando shaDavid, ndelenee ve shi twala meumbo laObed-Edom, Omugat. 14 Noshikefa shaKalunga sha kala meumbo laObed-Edom eehani nhatu; nOmwene okwa nangeka noupuna eumbo laObed-Edom moinima aishe.
© Oshikwanyama Bible Revised © Bible Society of Namibia, 2008, 2012.
