OILONGA YOVAYAPOSTOLI 16 - Oshikwanyama Bible (OKYB)

Paulus ta hoolola Timoteus muListra

1 Ndele okwe uya muDerbe nomuListra, ndele tala, oko okwa li ku nomulongwa, edina laye Timoteus, omona womukainhu omwiitaveli Omujuda, ndele xe okwa li Omugreka. 2 Ye okwa li a popiwa nawa kovamwatate ovo va kala muListra nomuIkonium. 3 Paulus okwa hala Timoteus a ende pamwe naye, ndele okwe mu kufa ndele te mu pitifa etanda omolwOvajuda ava va kala moilongo inya, osheshi aveshe ova li ve shii kutya xe Omugreka. 4 Ndele mokweendaenda kwavo moilando noilando, ove va pa oipango ei ya ufwa kovayapostoli nokovakulunhu vomuJerusalem, ve i diinine yo. 5 Ndele omaongalo a pamekwa meitavelo, nefiku keshe omuvalu wovakwaneongalo owa hapupala.

Paulus ta mono emoniko ndele ta ifanwa kuMakedonia

6 Ndele ova pitila moikandjo yaFrigia naGalatia, osheshi Omhepo Iyapuki Ye va kelela okuudifila ondjovo muAsia. 7 Ndele eshi ve uya popepi naMisia, ova li va hala okuya kuBitinia, ndelenee Omhepo yaJesus inai va efela ko. 8 Opo nee va pitilila po Misia nove uya kuTroas. 9 Ndele moufiku ou Paulus okwa mona emoniko: omulumenhu Omumakedonia e li ofika te mu indile, ta ti: “Yaukila oku, u uye kuMakedonia, u tu kwafe!” 10 Ndele eshi twa mona emoniko olo, otwa konga diva omhito tu ye kuMakedonia, osheshi paife otwa li tu shi shii, Kalunga e tu ifana ko, tu ke va udifile evaengeli.

Lidia ta ningi omwiitaveli muFilippi

11 Hano eshi twa dja mo muTroas, otwa yauka nokuyukilila kuSamotrake, mefiku lomongula otwe uya kuNeapolis, 12 nomokudja omo otwe uya kuFilippi, okoshilando shotete kombinga inya medu laMakedonia, osho oshitembukilwanhele. Moshilando eshi otwa ningile mo omafiku amwe. 13 Ndele mefiku lEshabata otwa pita moshivelo shoshilando notwa ya komulonga oko twa fekela oku na onhele yokwiilikana, notwa kala omutumba ndele twa popifa ovakainhu ava va ongalela ko. 14 Ndele omukainhu umwe, edina laye Lidia, omushingifi woiyata itilyana wokoshilando shaTiatira, omutilikalunga, okwa li ta pwilikine, ndele Omwene okwa yeulula omutima waye okutambula odo da tongwa kuPaulus. 15 Ndele ye eshi a shashwa pamwe novaneumbo laye aveshe, okwe tu indila ta ti: “Onye ngeenge tamu tale nge onda itavela Omwene, ileni hano meumbo lange nye mu kale mo.” Oye okwe tu fininika.

Omhepo youpule tai tewa mo

16 Ndele fimbo tu li mondjila yokuya konhele yokwiilikana, otwa shakenekwa komupiya okakadona e nomhepo youpule, nokwa longela oovene eliko linene mokuxunganeka kwaye. 17 Ye okwa li te tu shikula fye naPaulus, ndele ta popi pombada ta ti: “Ovalumenhu ava ovo ovamati vaKalunga, ou e li kombada yaaishe, vo otave mu hepaululile ondjila yexupifo.” 18 Ndele eshi e shi ninga omafiku mahapu, ndele eshi sha lolola Paulus, ye okwa punguluka ndele ta lombwele omhepo: “Medina laJesus Kristus, ohandi ku lombwele: dja mo muye!” Oyo oya dja mo mokafimbo tuu oko.

Paulus naSilas modolongo

Elidilululo lomukeleli wodolongo

19 Ndele oovene eshi va mona, elineekelo lokulikola kwavo la kana, ova kwata Paulus naSilas ndele ve va kokololela koshilandelo kovapangeli 20 nokovatokoli, ndele tava ti: “Ovanhu ava otava piyaanifa oshilando shetu. Ovo Ovajuda 21 ndele tave tu udifile eenghedi odo, fye itatu dulu oku di tambula noku di shikula, osheshi fye Ovaroma.” 22 Ndele ovanhu vomoshilando ove va hangakena, novatokoli ova pombaulifa oikutu yavo ndele tava lombwele, va dengifwe eeshokoto. 23 Ndele eshi ve va dengifa unene, ove va undulila modolongo nova lombwela omukeleli wodolongo e va nangele shili. 24 Eshi a lombwelwa ngaha, okwe va idilila modolongo yomeni ndele te va tula meti.

25 Ndele pokati koufiku Paulus naSilas ova ilikana ndele tava fimaneke Kalunga nomaimbilohambelelo, ovakwatwa ove va pwilikina.Pokati koufiku Paulus naSilas ova ilikana ndele tava fimaneke Kalunga nomaimbilohambelelo… 26 Ndele opo tuu opo pa tukuluka ekakamo linene ledu, odolongo oya kakama fiyo okomakanghameno; ohaluka, oivelo aishe oya yeuluka nomalyenge aaveshe a dituluka. 27 Omukeleli wodolongo eshi a penduka okwa mona oivelo aishe yodolongo ya yeuluka, okwa pweya mo eongamukonda nokwa hala okulidipaa, osheshi okwa li e shii ovakwatwa aveshe ove livaka mo. 28 Ndele Paulus okwa popya mokule ta ti: “Ino liningila owii nande owasha, fye atushe omo tu li.” 29 Opo nee a indila omundilo nokwa tondokela mo, ndele a wila poshi keemhadi daPaulus naSilas; 30 e va pitifa mo ndele ta ti: “Oovene vange, ondi nokuninga ngahelipi ndi xupifwe?” 31 Vo ova tya: “Itavela Omwene Jesus Kristus, opo to ka xupifwa neumbo loye alishe.” 32 Ndele vo ove mu udifila eendjovo dOmwene naaveshe ava va li meumbo laye. 33 Ndele ye okwe va tambula mokafimbo tuu aka oufiku, a kosha oipute yavo; oye mwene novambulaye va shashwa diva. 34 Opo ye okwe va twala meumbo laye, okwe va pakela po ndele ta hafe, osheshi ye mwene neumbo laye alishe va ninga ovaitaveli vaKalunga.

35 Ndele ongula eshi kwa sha, ovatokoli ova tuma ko ovapiya vetokolo, ndele tava ti: “Efa ovanhu venya.” 36 Nomukeleli wodolongo okwa hepaululila Paulus eendjovo edi, ta ti: “Ovatokoli ova tuma ko ondaka mu efiwe. Djeni mo hano paife, nye mu ka ende nombili.” 37 Ndele Paulus ta ti kuvo: “Vo ove tu denga moipafi yovanhu, fimbo inave tu pwilikina, nande ofye Ovaroma, ndele ve tu idilila modolongo, ndelenee paife va hala ve tu te mo meholeko. Ahowe, ovo vene nave uye ve tu pitife mo.” 38 Ndele ovapiya vetokolo ova ka hepaululila ovapangeli eendjovo odo, ndele venya ova haluka eshi va uda ovo Ovaroma. 39 Vo ove uya ndele ve va popifa nombili, ove va pitifa mo ndele tave va indile va fiye po oshilando shavo. 40 Ndele eshi va dja modolongo ova ya keumbo laLidia, ndele va monafana novamwatate, nove va kumaida, ndele tava di po.