Paulus te lipopile koshipala shaAgrippa
1 Ndele Agrippa okwa tya kuPaulus: “Ove wa pewa okulipopila.” Opo nee Paulus a yelula eke laye e lipopila, ta ti: 2 “Ohamba Agrippa, onde litala omunelao, eshi nda itavelwa mefiku eli lonena okulipopila koshipala shoye moinima ei aishe, Ovajuda tava pe nge etimba. 3 Osheshi eenghedi nomapulapulo aeshe Ovajuda ou a shii nawa, onghee handi ku indile, tale nge onheni, ove u pwilikine nge.
4 “Okukalamwenyo kwange mounyasha, Ovajuda aveshe ove ku shii, osheshi nda kala pehovelo fiyo onena mokati koshiwana shetu nomuJerusalem. 5 Vo ove shii nge pehovelo, ngeenge va hala okuhepaulula, nhumbi nda li Omufarisai paenghedi odo doshimhanga shinya oshidiinini sheitavelo letu. 6 Ndele paife ondi li apa ofika handi hokololifilwa eteelelo lomaudaneko enya a udanekelwa ootate kuKalunga. 7 Ndele olo tuu olo omapata aa etu omulongo naavali eshi taa diinine okulongela Kalunga oufiku nomutenya, a hala nokuhalelela oku li mona. Eteelelo tuu olo, omwene wange, handi hokololifwa kOvajuda. 8 Oshike tashi mu kelele okwiitavela nokutya, Kalunga ota nyumuna ovafi?
9 “Ame yo onda li ndi shii, ondi nokukondjifa shili edina laJesus Omunasareti. 10 Osho nda ningile yo muJerusalem, nda idilila ovayapuki vahapu modolongo, eshi nda pewa eitavelelo kovapristeli ovakulunhu novakwatwa eshi va dipawa po, naame yo onde shi itavela. 11 Ndele akushe meeshinagoga luhapu onde va fininikifa momahandukilo okutuka Jesus moupyuhandu wange, nonde va hepekele fiyo okoilando yokoilongo.
Paulus ta hepaulula elidilululo laye
(Oil. 9:1-19Oil. 22:6-16)12 “Mokweendela oinima ei, eshi nda ya kuDamaskus, onda li ndi nomaitavelelo ovapristeli ovakulunhu. 13 Opo nee, ohamba, mondjila yange, mokati komutenya, onda mona ouyelele unene, u dule ou wetango, wa dja meulu, ndele wa dingilila nge, aame mwene novafindikili vange. 14 Ndele fye atushe otwa wila poshi, ame onda uda ondaka ya popya mOshiheberi, tai ti kwaame: ‘Saul, Saul, oshike to taataa nge? U noudjuu okufangula konhele yeonga!’ 15 Opo nda tya: ‘Omwene, Oove lyelye?’ Omwene ta ti: ‘Aame Jesus, ou to mu taataa. 16 Ndelenee penduka, likanghameka, osheshi onde ku lihololela, opo ndi ku tule po omupiya wange nondobwedi yange u hepaulule osho we shi mona nakeshe tuu osho handi ku hololele komesho. 17 Ame ohandi ku xupifa momake oshiwana sheni noovapaani ovo, handi ku tumu kuvo, 18 okupashukifa omesho avo, va dje mo momulaulu, ve uye mouyelele, va efe epangelo laSatana, nove uye kuKalunga, ndele mokwiitavela nge, va mone ekufilo lomatimba nefyuululo mokati kovayapulwa.’
19 “Onghee hano, ohamba Agrippa, onda dulika kemoniko olo lomeulu, 20 ndele tete onda udifila Ovadamaskus nOvajerusalem, nokonima onde shi ninga medu alishe laJudea nomovapaani yo, nda tya: Ovo ve nokulidilulula nokwaalukila kuKalunga, va longe oilonga ei ya wapalela elidilululo. 21 Omolwaashi Ovajuda va kwatela nge motembeli nova hala okudipaa nge. 22 Ndele kekwafo olo nde li pewa kuKalunga fiyo onena eli ondi li ofika apa, ndele handi hepaululile ovanini novanene, ndele itandi popi sha shimwe shi lili, osho ashike osho ovaxunganeki naMoses ve shi popya, shi nokuwanifwa, 23 nokutya, Kristus nhumbi kwa li e nokuhepekwa nonhumbi a ninga omutete womenyumuko, opo a udifile ovanhu ava novapaani yo ouyelele.”
24 Ndelenee eshi e lipopila ngaha, Festus okwa popya mokule ndele ta ti: “Paulus, owa pilalala eendunge. Elongo olo loye olinene notali pilalalifa eendunge doye!” 25 Ndelenee Paulus ta ti: “Festus omufimanekwa, inandi pilalala eendunge, ohandi popi eendjovo doshili nodeendunge diwa. 26 Ndele ohamba oi shii ei aishe, onghee hano handi mu lombwele yo nokuliameka kuye nouladi, osheshi ondi shi shii nawa, kaku na nande oshinima shomwaai aishe, osho inashi shiivika kuye, ei ngaashi inai ningilwa mekololo lapenipeni. 27 Ohamba Agrippa, ove oto itavele tuu ovaxunganeki? Heeno, ondi shi shii, oto va itavele.” 28 Ndele Agrippa ta ti kuPaulus: “Hamba, ou shii okuninga nge Omukriste okupu!” 29 Ndele Paulus ta ti: “Ngee okupu ile okudjuu, onda hala haave auke, ndelenee amushe ava tamu pwilikine nge nena, Kalunga e mu ninge ngaashi ame, kakele komalyenge aa ndi kwete mu kale muhe a kwete.”
30 Ndele Paulus eshi e shi tya, opo ohamba nomupangeli woshilongo naBernike, naaveshe ava va li va kala omutumba pamwe navo, ova fikama. 31 Ndele mokuya ova kundafana, tava ti: “Omulumenhu ou ina ninga sha shoku mu dipaifa ile shoku mu mangifa.” 32 Ndele Agrippa okwa tya kuFestus: “Omulumenhu ou ngeno okwa li ine liameka komukesari, ngeno okwa wana okweefiwa.”
© Oshikwanyama Bible Revised © Bible Society of Namibia, 2008, 2012.
