Eyapulo
1 Eshi tu na hano omaudaneko e fike apa, ovaholike, tu likosheni kedilo keshe naali lombelela naali lomhepo, fye tu wanifeni eyapulo mokutila Kalunga.
2 Tu peni onhele momitima deni. Kape na ou twe mu ninga nai, kape na ou twe mu nyona, kape na ou twe mu nyeka. 3 Eshi ihandi shi popi oku mu tokola, osheshi nde mu lombwela nale kutya, nye omu li momitima detu, tu kale pamwe mokufya nomokukalamwenyo. 4 Elineekelo lange oku mu lineekela olihapu nondi nokulitanga kuhapu molweni; ondi yadi ehekeleko, ehafo lange oli yadi pombada momaudjuu etu aeshe.
5 Osheshi eshi twa fika kuMakedonia, ombelela yetu inai mona nande etulumuko, ndelenee twa fininikwa keembinga adishe: kombada omalwoodi, meni etilo. 6 Ndelenee Kalunga, ou ha hekeleke oonakupolimana, okwe tu hekeleka nokuuya kwaTitus, 7 ndele haneuyo laye alike, ndelenee nosho yo nehekeleko olo ye eshi a hekelekwa kunye, osheshi okwe tu hepaululila odjuulufi yeni, nenyemato leni nouladi weni molwange, opo nee ehafo lange la hapupala pombada.
Oluhodi lopahalo laKalunga
8 Osheshi nande nde mu nyikifa oluhodi nonhumwafo yange, inandi lialuluka musho, nande nda li nde lialuluka eshi ndi wete onhumwafo ei ye mu nyikifa oluhodi, nande okafimbo akeke, 9 paife onda hafa, hamolwaashi mwa nyikifwa oluhodi, ndelenee omolwaashi mwa fya oluhodi lelidilululo; osheshi mwa nyikifwa oluhodi lopahalo laKalunga; opo tuhe mu etele nande oshiponga. 10 Osheshi oluhodi lopahalo laKalunga otali longo elidilululo lexupifo, omo omunhu ite lialuluka mo vali; ndelenee oluhodi lounyuni tali eta efyo. 11 Taleni hano, ouladi u fike peni oluhodi eli leni lopahalo laKalunga la longa munye, nelipopilo li fike peni, noutondwe apa u fike, netilo apa li fike, nodjuulufi, nonyati, nomahandukilo e fike peni! Mwaashishe omwe limonifa, onye kamu noshipo moshinima shinya. 12 Hano nande nde mu shangelele, inandi shanga molwaau a ninga nai ile molwaau a ningwa nai, ndelenee ouladi weni omolwetu opo u holoke mokati keni koshipala shaKalunga.
13 Onghee hano twa hekelekwa nee. Ndelenee ehekeleko eli letu ola wedelwa ko ehafo linene okehafo laTitus, osheshi omhepo yaye oya hekelekwa kunye amushe. 14 Osheshi ngeenge nde mu pandulila sha kuye, inandi fifwa ohoni, ndele ngaashi ashishe osho nde shi mu lombwela osho shoshili, osho tuu nasho twe shi mu pandulila kuTitus osha monika osho shoshili. 15 Ndele omutima waye owe mu kenukila shili, eshi ta dimbulukwa eduliko leni amushe, nhumbi mwe mu tambula nokutila nokukakama. 16 Onda hafa eshi handi dulu oku mu lineekela moinima aishe.
© Oshikwanyama Bible Revised © Bible Society of Namibia, 2008, 2012.
