OVAROMA 7 - Oshikwanyama Bible (OKYB)

Ava vaJesus Kristus ova manguluka momhango

1 Ile kamu shi shii, ovamwatate nye, ohandi popi kwaava va shiiva omhango, kutya omhango otai pangele omunhu fimbo e nomwenyo? 2 Omhango ngaashi tai mangele omukainhu omuhombolwa kumwe nomulumenhu waye fimbo ye e nomwenyo; ndele omulumenhu ngeenge a fi, opo nee omukainhu a manguluka momhango yomulumenhu. 3 Onghee hano, ngeenge te liyandje komulumenhu umwe fimbo omulumenhu waye e nomwenyo, ota ifanwa omunyoni wohombo, ndele omulumenhu ngeenge a fi, okwa manguluka momhango ei, ke fi omunyoni wohombo, ngeenge ta hombolwa komulumenhu umwe. 4 Osho nanye yo, ovamwatate, omwa fya mo momhango okolutu laKristus, mu ninge vaumwe, ovaau a nyumunwa movafi, opo tu imikile Kalunga oiimati. 5 Osheshi eshi twa kala mombelela, ouhalu woulunde ou hau tukululwa komhango, owa mona eenghono moinhimbu yetu okwiimikila efyo oiimati. 6 Ndelenee otwa manguluka momhango notwa fya mo muyo, ei kwa li ye tu kwatelela mo, ndele hatu kalele Kalunga omoupe wOmhepo hamoukulu weendada.

7 Paife ohatu ti shike hano? Omhango oyo oulunde? Nandenande. Osheshi ngeno hamhango ya li po, ngeno inandi shiiva oulunde; osheshi omhango ngeno inai tya: “Ino haluka”, ngeno inandi shiiva okahalu. 8 Ndelenee oulunde eshi wa mona omhito molwoshipango, owa tukulula mwaame ouhalu keshe; osheshi oulunde uhe nomhango owa fya. 9 Ndele ame onda kala nale ndihe nomhango, ndele oshipango eshi she uya, opo nee oulunde wa nyumuka, 10 ndele ame onda fya. Osho pa holoka nokutya, oshipango eshi sha li shi nokupa nge omwenyo, osha pa nge efyo. 11 Osheshi oulunde eshi wa mona omhito molwoshipango owa pukifa nge, ndele wa dipaifa nge koshipango. 12 Onghee tuu, omhango oyo iyapuki, noshipango osho oshiyapuki noshiyuki noshiwa.

13 Hano eshi shiwa osha etela nge efyo mbela? Nandenande. Ndelenee oulunde, opo u holoke oo oulunde wa etela nge efyo kwaashi shiwa, opo oulunde u ninge shili oulundelela okoshipango. 14 Osheshi tu shi shii omhango oyopamhepo, ndelenee ame owopambelela, nda landelwa oulunde, ndi kale koshi yao. 15 Osheshi eshi handi longo kandi shi shii, osheshi eshi nde shi hala, itandi shi wanifa, ndele eshi handi tondo, ohandi shi longo. 16 Ndele ngeenge handi longo eshi inandi shi hala, ohandi itavele nokutya, omhango oyo iwa. 17 Hano paife, haame mwene vali handi shi longo, ndelenee oulunde ou wa kala mwaame. 18 Shaashi ondi shi shii mwaame, nokutya, mombelela yange kamu na ouwa nande washa. Ehalo ondi li kwete, ndelenee eenghono dokuwanifa ouwa, ahowe; 19 shaashi ouwa ou nde u hala, ihandi u longo, ndele owii ou inandi u hala, ohandi u longo. 20 Hano ngeenge ohandi longo eshi shii, haame vali handi shi longo, ndelenee oulunde ou wa kala mwaame.

21 Ame, ou nda hala okulonga ouwa, ondi wete mwaame omhango ei: Owii wa kanyatela nge. 22 Shaashi kombinga yomunhu ou womeni onda dimina nehafo omhango yaKalunga, 23 ndele moinhimbu yange ondi wete omhango ikwao tai kondjifa omhango yomadiladilo ange, ndele otai pikile nge momhango youlunde i li moinhimbu yange. 24 Aame omunhu mwii, olyelye ta mangulula nge molutu eli lefyo? 25 Kalunga na pandulwe omolwaJesus Kristus, Omwene wetu! Osho hano ame mwene nomadilongo ange handi longele omhango yaKalunga, ndele nombelela omhango youlunde.