LUKAS 18 - Oshikwanyama Bible (OKYB)

Omutokoli mwii nomufiyekadi

1 Ndelenee Ye okwe va lombwela efaneko nhumbi ve nokwiilikana vaha loloke, 2 ndele ta ti: “Moshilando shimwe omwa li mu na omutokoli weendjovo ina tila Kalunga noina fya ohoni ovanhu. 3 Ndele moshilando osho mwa li omufiyekadi e uya luhapu kuye ndele okwa tya: ‘Yukifa eendjovo detu nomutamaneki wange.’ 4 Ndelenee ye okwa ninga omafiku mahapu ina hala; konima okwe lipopila ta ti: ‘Nande ihandi tila Kalunga noihandi fi ohoni ovanhu 5 onda hala oku mu yukifila oshinima shaye, osheshi omufiyekadi ou ta kenyeneke nge, opo aha twe nge momesho nokuli.’ ” 6 Ndele Omwene okwa tya: “Pwilikineni omutokoli ou mwii eshi ta ti. 7 Hano Kalunga ita yukifile mbela ovahoololwa vaye oshinima shavo ava have mu ifana pombada omutenya noufiku ye a fye ounye ngeno oku va kwafa? 8 Ohandi mu lombwele: ote shi va yukifile divadiva. Ndelenee Omona wOmunhu ngeenge te uya, ota hange ko tuu eitavelo kombada yedu?”

Omufarisai nomufutifi motembeli

9 Ndelenee Ye okwa lombwela vamwe ve lineekela ovo ovayuki vati, ndele ova dina vamwe, efaneko eli: 10 “Ovalumenhu vavali ova ya motembeli okwiilikana, umwe Omufarisai namukwao omufendelifi. 11 Ndele Omufarisai okwa kala ofika e likalela ndele okwa ilikana ngaha: ‘Kalunga, ohandi ku pandula, osheshi ame inandi fa ovanhu vamwe, ovakolokoshi, eembudi novanyoni vohombo ile ongaashi omufendelifi ou, 12 eendja ohandi di lidilike luvali moshivike keshe ndele handi yandje oitimulongo moilikolwa yange aishe.’ 13 Ndele omufendelifi okwa kala ofika kokule, ye ina hala okuyelula omesho keulu, okwe lidenga ponhulo yaye ndele ta ti: ‘Kalunga, file nge onghenda, aame omulunde.’ 14 Ohandi mu lombwele: ou a shuna keumbo omuyuki, e dule winya, osheshi ou te linenepeke ota ninipikwa, ndele ou te lininipike ota nenepekwa.”

Jesus nounona

15 Ndele ova eta ounona vanini kuye e va kume, ndele ovalongwa eshi ve shi mona, ova hanyena ovo ve va eta. 16 Ndelenee Jesus okwe va ifana ve uye kuye ndele ta ti: “Efeni ounona ve uye kwaame, nye inamu va kelela ko, osheshi ouhamba waKalunga owaava ve va fa. 17 Oshili handi mu lombwele: ou ita tambula ouhamba waKalunga ngaashi okahanana, oye ita i mo muwo.”

Elenga oshipuna

18 Ndele elenga limwe le mu pula tali ti: “Omuhongi muwa, ondi nokulonga shike, ndi fyuulule omwenyo waalushe?” 19 Ndele Jesus okwa tya kuye: “Oshike wa ifana nge muwa? Kape na nande umwe muwa, Kalunga Oye aeke. 20 Oipango ou i shii: ‘Ino nyona ohombo, Ino dipaa, Ino vaka, Ino lundila, Fimaneka xo nanyoko.’ ” 21 Ndele ye okwa tya: “Oyo aishe onde i wanifa okounyashele wange.” 22 Ndele Jesus eshi e di uda okwa tya kuye: “Shimwe she ku pumba natango: landifa po aishe u i kwete, ove u i tukulile eehepele, ndele to kala u na emona meulu, ndele ila ove u shikule nge.” 23 Ndele ye eshi e di uda, okwa nyika unene oluhodi, osheshi ye okwa li oshipuna unene.

24 Ndele Jesus eshi e mu mona a nyika oluhodi okwa ti: “Oipuna oi noudjuu u fike peni okuya mouhamba waKalunga. 25 Okupitila kwongamelo mombululu yongwiya hixwe, ku dule okuya kwoshipuna mouhamba waKalunga.” 26 Hano ovo ve di uda, ova tya: “Olyelye hano ta dulu okuxupifwa?” 27 Ndelenee Ye okwa tya: “Eshi tashi nyenge ovanhu, itashi nyenge Kalunga.”

Ondjabi yovashikuli vaJesus

28 Opo Petrus okwa tya: “Tala, ofye otwa fiya ko aishe, ndele otwe ku shikula.” 29 Ndele Ye okwa tya kuvo: “Oshili handi mu lombwele, kape na ou a fiya po eumbo ile omukainhu ile ovamwaxe ile xe ile ina ile ovana omolwouhamba waKalunga, 30 ndele ita alulilwa ngeno oinima i dule inya unenenene mefimbo eli lopaife, nomounyuni tau ke uya omwenyo waalushe.”

Jesus ta popi okuhepekwa kwaye

31 Ndelenee Ye okwa kufa ko ovo omulongo navavali ndele okwe va lombwela: “Tala, ohatu yeni kuJerusalem, oko aishe ya shangwa kovaxunganeki tai hepaulula Omona wOmunhu, otai ka wanifwa. 32 Osheshi Oye ta yandjwa momake ovapaani, ndele ta yolwa, ta shekwa ndele ta fiilwa omate, 33 ndele tave mu denge neeshokoto ndele tave mu dipaa, nefiku etitatu ota nyumuka koufi.” 34 Ndele vo ova li vehe udite ko nande kanini eendjovo odo, eendjovo odo ode va holekwa, inava uda ko osho sha tiwa.

Omupofi kuJeriko

35 Ndele fimbo ta ehene ko kuJeriko, omupofi okwa li omutumba pondjila ndele okwa ehela. 36 Ndele eshi a uda ongudu yovanhu tai ende po, okwa pula: “Oshike osho?” 37 Ndele vo ove mu lombwela: “Jesus Omunasareti ta ende po.” 38 Opo ye a ingida, ta ti: “Jesus, Omona waDavid, file nge onghenda!” 39 Ndele venya va tetekela, ove mu hanyena a mwene, ndele ye okwa ingida pombada a diinina: “Omona waDavid, file nge onghenda!” 40 Ndele Jesus okwa kanghama ndele okwe va lombwela, ve mu ete kuye. Hano eshi e uya popepi, Jesus okwe mu pula: 41 “Owa hala ndi ku ningile shike?” Ye okwa tya: “Omwene, ndi shiive okumona ko vali.” 42 Jesus okwa tya kuye: “Mona ko! Eitavelo loye ole ku velula.” 43 Opo tuu opo ye a mona ko, ndele okwe mu shikula nokufimaneka Kalunga, novanhu aveshe ava ve shi mona, ova hambelela Kalunga.