Israel na tile Omwene
1 “Mefimbo linya Omwene okwa lombwela nge: ‘Lihongela oipelende ivali ngaashi inya yotete, ndele londa u uye kuAme komhunda. Liningila yo oshikefa shoshiti. 2 Ndele Ame ohandi ka shangela moipelende eendjovo da li moipelende inya yotete, oyo ove we i tataula, ndele ove u noku i tula moshikefa.’ 3 Opo nee ame nda ninga oshikefa shomuti womwoonde, ndele nda honga oipelende ivali yomamanya ngaashi inya yotete, ndele nda londa komhunda ndi noipelende ivali momake ange. 4 Ndele Ye okwa shangela moipelende eendjovo omulongo ngaashi dinya dotete, odo Omwene e di mu lombwela mefiku loshiongalele sheongalo pomhunda mokati komundilo. NOmwene okwe di pa nge. 5 Ndele ame nda pilamena ko ndele nda londoloka komhunda ndele nda tula oipelende moshikefa nde shi ninga. Omo ya kala omo, Omwene ngaashi a lombwela nge.
6 “Ndele ovana vaIsrael va dja kuBeerot Bene-Jaakan, va ya kuMosera. Oko Aron a fila, noko a pakwa. Nomona waye omumati Eliaser okwa yakula moshilonga shoupristeli ponhele yaye. 7 Ndele va dja ko oko va ya kuGudgod, ndele va dja kuGudgod, va ya kuJotbata, olo edu lomilongameva. 8 Mefimbo tuu olo Omwene okwa tongola mo epata laLevi, opo li humbate oshikefa shehangano lOmwene, ndele va kale koshipala shOmwene noku mu longela nokunangeka noupuna medina laye fiyo onena. 9 Onghee hano Levi ehe noshitukulwa ile oshifyuululwa pamwe novamwaxe. Omwene Ye oshitukulwafyuululwa shaye, Omwene Kalunga koye ngaashi e mu udanekela.
10 “Ndele ame nda kala ko komhunda ngaashi tete, omafiku omilongo nhee, oufiku nomutenya. Nomwene okwa uda nge vali. Osheshi Omwene okwa li ina hala oku ku hanauna po. 11 Ndelenee Omwene okwa lombwela nge: ‘Fikama, inda ko, u kwatele ovanhu komesho va shiive okuya nokunangala oshilongo Ame nde shi udanekela ooxe nokwaana, ve shi pewe.’
Kalunga te shi pula Israel, oshilipipo ngeno
12 “Ndele paife Israel, Omwene Kalunga koye ote ku pula shike shimwe ngeno, ashike ove u kale nokutila Omwene Kalunga koye, u ende alushe neendjila daye, ndele u mu hole nokulongela Omwene Kalunga koye nomutima woye aushe nomwenyo woye aushe. 13 Opo u kale nokudiinina oipango yOmwene neenghedimhango edi handi ku lombwele nena eli, opo u kale u nelao? 14 Tala, eulu nomaulu nongonga yedu naashishe shi li mo, oshOmwene Kalunga koye. 15 Ndelenee ashike ooxo yoye Omwene okwe va hokwa nokwa li e va hole, ndele Ye okwe mu hoolola, nye oludalo lavo, moiwana aishe, ngaashi shi li nonena eli.
Epitoletanda lokomwenyo
16 “Onghee hano teta oxulo yoshipa shomitima deni ndele inamu likukutika vali. 17 Osheshi Omwene Kalunga keni, Oye Kalunga koikalunga nOmwene woovene. Kalunga omunene omunaenghono nomutilifi, ou iha tale oshipala shomunhu ndele ita tambula ombubo, 18 Ye ota yukifa eendjovo deefiye nodovafiyekadi, ndele e hole omunailongo ndele te mu pe omungome noikutu. 19 Onghee hano mu nokuhola omunailongo osheshi nanye yo mwa li ovanailongo medu laEgipiti. 20 U nokutila Omwene Kalunga koye, u noku mu longela, muye u nokukanyatela, ndele medina laye u nokwaana. 21 Ye ehambelelo loye, ndele Ye oKalunga koye, ou e ku ningila oinima ei inene noitilifa, omesho oye e i mona. 22 Omuvalo wooxo ava va ya kuEgipiti wa li omilongo heyali, ndelenee paife Omwene Kalunga koye e ku hapupalifa ngaashi eenyofi dokeulu.
© Oshikwanyama Bible Revised © Bible Society of Namibia, 2008, 2012.
