NaAbraham okwa yukipalifwa keitavelo
1 Woo Ovagalati nye, omalai! Olyelye e mu pililika, muha dulike koshili, nye ava Jesus Kristus mwe mu fanekelwa moipafi yeni omuvalelwa komushiyakano? 2 Shimwe ashike nda hala mu lombwele nge: Omhepo omwe i pewa moilonga yomhango ile omokuuda mu neitavelo? 3 Mboli kamu neendunge? Nye mwa hovela mOmhepo, omwa hala mu xulife mombelela? 4 Oshike mwe litwika oudjuu u fike apa epwanga? Ngeenge epwanga shili. 5 Hano ou te mu pe Omhepo ndele ta longo oilonga yeenghono munye, ote shi ningi koilonga yomhango ile okokuuda meitavelo? 6 Ngaashi Abraham “a itavela Kalunga, neitavelo laye le mu valulilwa ouyuki.”
7 Hano kaleni mu shi shii kutya, ava vomeitavelo ovo nee ovana vaAbraham. 8 Nomushangwa, eshi we shi mona nale kutya, Kalunga ota yukipalifa ovapaani okeitavelo, onghee hano wa udifila Abraham evaengeli eli nale, nokutya: “Omwoove oiwana aishe tai nangekwa noupuna.” 9 Osho hano ava vomeitavelo tava nangekwa noupuna pamwe naAbraham omwiitaveli.
10 Osheshi aveshe ava vomoilonga yomhango, otava kala koshi yefingo, osheshi opa shangwa: “Keshe ou iha kala mwaai aishe ya shangelwa momushangwa womhango e u wanife, oye omufingwa.” 11 Nokape na ou ta yukipalifwa koshipala shaKalunga omolwomhango: “Apa kape nomalimbililo, osheshi omuyuki ota kala e nomwenyo okeitavelo.” 12 Ndele omhango kai fi yomeitavelo, osheshi: “Ou te i wanifa, oye ta kala e nomwenyo muyo.” 13 Kristus okwe tu kulila mefingo lomhango, eshi a ninga omufingwa omolwetu, osheshi pa shangwa: “Keshe ou ta endjelele momuti, oye a fingwa,” 14 enangeko noupuna laAbraham opo li ye kovapaani muKristus Jesus, opo tu mone keitavelo Omhepo oyo twe i udanekelwa.
15 Ovamwatate ohandi popi panhu, eudaneko lefyuululo lomunhu, ngeenge la pamekwa, kape na ou ta dulu oku li dima po, ile okulundulula nokuwedela ko sha. 16 Ndele Abraham okwa pewa omaudaneko, ye mwene noludalo laye, inapa tiwa, nomaludalo, ngaashi mahapu, ndelenee ngaashi umwe: noludalo loye, olo Kristus. 17 Ndelenee onda hala okutya, ehangano la pamekwa kuKalunga muKristus, itali dimwa po komhango ye uya eshi pa pita omido omafele ane nomilongo itatu, neudaneko itali dimwa po kuyo. 18 Osheshi efyuululo ngeno tali di momhango, ngeno itali di vali meudaneko. Ndelenee Kalunga okwe li yandja kuAbraham paudaneko.
Oshilonga shomhango
19 Hano omhango otai longo shike? Oyo oya wedelwa po omolwomatauluko, i kale po fiyo oludalo la pewa eudaneko tali uya; oyo noya dikifwa ovaengeli noya yandjwa meke lomupopili. 20 Nomupopili ke fi waumwe aeke, ndele Kalunga Oye umwe aeke. 21 Hano omhango oi nondubo nomaudaneko aKalunga? Ahowe, nande kanini. Osheshi ngeno pa yandjwa omhango hai yandje omwenyo, ngeno ouyuki otau di shili momhango. 22 Ndelenee omishangwa da idilila aveshe koshi youlunde, opo ovo tava itavele va pewe mokwiitavela Jesus Kristus osho sha udanekwa. 23 Ndelenee eitavelo fimbo inali uya, otwa li twa kwatelwa koshi yomhango, omo twa diinininwa eitavelo fiyo eitavelo la hololwa. 24 Osho ngaha omhango ya ninga omutekuli wetu, i tu twale kuKristus, opo tu yukipalifwe keitavelo. 25 Ndelenee eitavelo eshi le uya, fye katu fi vali vomepangelo lomutekuli. 26 Osheshi onye amushe ovana vaKalunga omolweitavelo muKristus Jesus. 27 Osheshi amushe ava mwa shashelwa muKristus, omwa djalekwa Kristus. 28 Kape na vali Omujuda nOmugreka, kape na vali omupika nomudalwa, kape na vali omulumenhu nomukainhu; osheshi onye amushe umwe muKristus Jesus. 29 Ndele nye ngeenge ovaKristus, onye yo oludalo laAbraham novafyuululi paudaneko.
© Oshikwanyama Bible Revised © Bible Society of Namibia, 2008, 2012.
