1 SAMUEL 7 - Oshikwanyama Bible (OKYB)

1 Opo nee ovalumenhu vokuKiriat-Jearim ve uya ndele va twala ko oshikefa shOmwene ndele ve shi tula mongulu yaAbinadab koshikulundu. Ndele omona waye omumati Eliaser ve mu yapulila okukala noshisho shoshikefa shOmwene.

Ovafilisti tava tewa

2 Okudja kefiku oshikefa sha tulwa muKiriat-Jearim opa pita efimbo lile nokutya omido omilongo mbali, neumbo alishe laIsrael la lila kOmwene.

3 Ndelenee Samuel okwa popya neumbo alishe laIsrael ndele ta ti: “Nye ngeenge tamu alukile kOmwene nomutima weni aushe, efeni hano oikalunga yokoilongo nooAstarot mokati keni, nomitima deni di kanyatelifeni kOmwene, ndele Oye aeke mu longeleni. Opo nee Ye ote ke mu xupifa momake Ovafilisti.” 4 Opo ovana vaIsrael va efa ooBaal nooAstarot ndele va longela Omwene aeke.

5 Samuel ta ti vali: “Shivileni Ovaisraeli aveshe kuMispa, opo nee ame ohandi ke mu indilila kOmwene.” 6 Va ongala muMispa ndele va teka omeva ndele tave a tileshi koshipala shOmwene, nefiku olo ve lidilika ndele tava ti: “Fye otwa nyona kOmwene.” Ndele Samuel okwa tokola eendjovo dovana vaIsrael muMispa.

7 Ovafilisti eshi va uda ovana vaIsrael va ongala muMispa, eehamba dOvafilisti da fikama di homone Israel. Novana vaIsrael ve shi uda ndele va tila Ovafilisti. 8 Novana vaIsrael va lombwela Samuel: Ino dimbuka oku tu indilila kOmwene Kalunga ketu, opo Ye e tu xupife mo momake Ovafilisti. 9 Opo nee Samuel okwa kufa okadjona taka nyamu ndele e ka yambela Omwene ngaashi exwikiloyambo inaka tukaulwa. Ndele Samuel okwa indilila Ovaisraeli kOmwene. NOmwene e mu uda. 10 Osheshi fimbo Samuel ta yambe exwikiloyambo nOvafilisti va ehena popepi va lwife Israel, mefiku tuu olo Omwene okwa ndundumifa ondaka inene kombada yOvafilisti, ndele Ye e va dongakanifa fiyo va tewa kOvaisraeli. 11 Nomatanga ovakwaita vaIsrael a dja muMispa ndele va shikula Ovafilisti ndele ve va taataela langhele kombinga yaBet-Kar. 12 Opo nee Samuel okwa kufa emanya ndele e li dika pokati kaMispa naSen, ndele e li luka Eben-Eser ndele ta ti: “Fiyo opapa Omwene e tu kwafa!” 13 NOvafilisti va ninipikwa, onghee inave uya mo vali moshilongo shaIsrael, neke lOmwene la kondjifa Ovafilisti omafiku aeshe aSamuel. 14 Noilando yOvafilisti ve i kufa kOvaisraeli ya aluka kuIsrael okudja kuEkron fiyo okuGat nomikunda dayo Ovaisraeli va kufa momake Ovafilisti. Nombili ya kala pokati kOvaisraeli nOvaamori. 15 Ndele Samuel okwa li omutokolipangeli waIsrael ashishe omafiku aeshe omokukala kwaye. 16 Omudo nomudo ye a endaenda kuBetel nokuGilgal nokuMispa nokwa tokola eendjovo dOvaisraeli meenhele adishe odo. 17 Opo nee ye okwa shuna kuRama. Osheshi oko kwa kala eumbo laye. Oko a tokola eendjovo daIsrael noko a tungila Omwene oaltari.