1 EEHAMBA 19 - Oshikwanyama Bible (OKYB)

Elia ta i onhapo Isabel ndele ta i kuHoreb

1 Ndele Ahab okwa hepaululila Isabel ashishe osho Elia e shi ninga, heeno, ashishe: nhumbi a dipaa ovaxunganeki aveshe neongamukonda. 2 Opo nee Isabel ta tumu omutumwa kuElia okwe mu lombwela: “Oikalunga nai ninge nge keshe osho ya hala paife nokomesho, ngeenge itandi ku ningile mongula mefimbo tuu olo ngaashi keshe umwe womuvo a ningilwa.” 3 Ndele ye eshi e shi uda, okwa fikama ndele ta di po, a xupife omwenyo waye. Ndele ye eshi e uya kuBerseba muJuda, okwa fiya ko omupiya waye. 4 Ndelenee ye mwene okwa ya kombuwa ondjila yefiku limwe ndele ta kala omutumba momudile woshixwa sheno nokwe lihalela efyo, ndele ta ti: “Sha wana. Omwene, kufa omwenyo wange, osheshi ame ndihe dule ootate.” 5 Opo nee a ka nangala ndele ta kofa moshixwa. Ndele tala, omweengeli e mu kuma ndele ta ti kuye: “Penduka, u lye!” 6 Ye eshi a pashuka, pomutwe waye pa li omungome wa telekwa komamanya mapyu noshiyuma shomeva. Ndele ta li, ndele ta nu, nokwa nangala vali. 7 Nomweengeli wOmwene e uya vali lutivali ndele te mu kumu, ta ti: “Penduka u lye, osheshi ondjila oyo ile u nokuya nayo, ihe ku nyenge.” 8 Opo nee ye ta penduka, ta li ndele ta nu, ndelenee meenghono doipalwifa okwa enda omafiku omilongo nhee nomaufiku omilongo nhee fiyo okuHoreb, komhunda yaKalunga.

9 Ndele okwa ya mekololo ndele ta kala mo oufiku.

Ndele tala, ondjovo yOmwene ye uya kuye, ndele tai pula kuye: “Elia, oshike to ningi apa?” 10 Ndele ta nyamukula: “Ame nda kondjela nouladi Omwene Kalunga komatanga ovakwaita, osheshi ovana vaIsrael ve liteeka ehangano loye, va ngumauna po eealtari doye ndele va dipaa ovaxunganeki voye neongamukonda, aame andike nda xupa po, ndele tava kongo omwenyo wange, ve u kufe nge.” 11 Ndele Ye ta ti: “Inda pondje, u kale ofika komhunda koshipala shOmwene.” Ndele tala, Omwene okwa enda po, fimbo omhepo inene i neenghono ya teyaula eemhunda ndele tai tatula omamanya. NOmwene ina kala momhepo. NOmhepo ya shikulwa kekakamo ledu. Ndelenee Omwene ina kala mekakamo ledu. 12 Nekakamo ledu la shikulwa komundilo. Omwene ina kala momundilo. Nomundilo wa shikulwa kokahomo okapu kokamhepo. 13 Ndele Elia eshi e ka uda, okwe liuvikila oshipala shaye noshikutu shaye, okwa dja mo ndele ta i moshivelo shekololo, ondaka ye mu popifa ndele tai ti: “Oto ningi shike apa, Elia?” 14 Oye okwe mu nyamukula: “Ame nda kondjela nouladi Omwene Kalunga komatanga ovakwaita, osheshi ovana vaIsrael ve liteeka ehangano loye, va ngumauna po eealtari doye ndele va dipaa ovaxunganeki voye neongamukonda, aame andike nda xupa po, ndele tava kongo omwenyo wange, ve u kufe nge.”

15 Ndelenee Omwene ta ti kuye: “Inda u shune nondjila yoye kombuwa yaDamaskus. Inda ko u vaeke Hasael a ninge ohamba yOvaaram. 16 Ndele Jehu yaNimsi, u noku mu vaeka ohamba yOvaisraeli. Ndele Elisa yaSafat wokuAbel-Mehola, u noku mu vaeka omuxunganeki ponhele yoye. 17 Ndele ou ta i onhapo eongamukonda laHasael, ota ka dipawa kuJehu. Ndele ou ta i onhapo eongamukonda laJehu, ota ka dipawa kuElisa. 18 Ndele muIsrael ohandi ke lixupifila mo omayovi aheyali, aveshe ovo inava twa eengolo koshipala shaBaal, nomilungu adishe inadi xupita nayo.”

Eifano laElisa

19 Nokwa dja po, ta i ndele ta shakene naElisa yaSafat, fimbo ta pulula neengobe deendjoko omulongo nambali, de mu pitila komesho, ye mwene a kala pwaado dondjoko onhimulongo nonhivali. Ndele Elia okwa enda po nokwa ekela oshikutu shaye kombada yaElisa.Elia okwa dja po ndee ta shakene naElisa…ta pulula neengobe deendjoko omulongo nambali. 20 Opo nee a efa eengobe daye nokwa shikula Elia ndele ta ti: “Lekele nge manga, ndi ka fipe komilungu datate nameme. Opo ndele handi ku shikula.” Ndele ye te mu nyamukula: “Inda, ndele aluka, u shi shii osho nde shi ku ningila?” 21 Oye kwe mu fiya po, ndele ta shuna ko. Okwa kufa ko eengobe dondjoko imwe nokwe di toma. Noimangifo yeengobe okwe i pakifa po ombelela, nokwe i pa ovanhu vaye, ve i lye. Ye okwa fikama ndele ta shikula Elia nokwa ninga omupiya waye.