LEVITIKUS 6 - Oshikwanyama Bible (OKYB)

1 Omwene okwa lombwela vali Moses ndele ta ti: 2 “Umwe ngeenge ha nyono mokuhadulika kOmwene eshi ta anye nokutya, okwa tambula kumukwao eshi ye e mu pa ile a pewa kuye e shi tuvikile ile eshi ye e shi likufila ile a nyeka sha shamukwao moku mu fininika, 3 ile a toola sha eshi sha kana ndele te shi anyene, ile ta anene moipupulu, moinima aishe ei omunhu ta longo nokulietela oushima, 4 ye ngeenge ta nyono nokulimona oushima, e nokwaalula eshi e shi nyeka ile a likola mokufininika ile osho e shi pewa e shi tuvikile ile oinima ya kana ye e i toola, 5 ile aishe ei a anena moipupulu, ne i alule noku i futa ofuto ya wana nokuwedela ko oshititano shomuyo. Ye e noku i yandja kumwene wayo mefiku tuu olo ye ta eta evelombediyambo. 6 Ndele ye e nokweetela Omwene odi ondume yomeedi ihe noshipo, noku i twala komupristeli, i kale evelombediyambo payeleko loye. 7 Opo nee omupristeli e noku mu kwatakanifa koshipala shOmwene, ndele enyono tali mu diminwa po, nakeshe eshi omunhu a ninga musho a pewa oushima.”

Omhango yexwikiloyambo

8 Omwene okwa lombwela vali Moses ndele ta ti: 9 “Lombwela Aron novana vaye ovamati u tye: Omhango yexwikiloyambo oyei: olo, nokutya exwikiloyambo li nokukala kefiya loaltari oufiku aushe fiyo ongula, nomundilo wokoaltari u nokudiininwa efimbo alishe. 10 Nomupristeli e nokudjala oshikutu shaye sholiina, noshikutu shokoshi sholiina ye e nokuuvika nasho oulumenhu waye. Opo nee ye ta yuku po omute wokexwikiloyambo lokoaltari ndele te u tula pomunghulo woaltari. 11 Opo nee ye te lidula oikutu yaye nokudjala oikutu imwe, ndele ta twala omute pondje yonhanda konhele ya yela. 12 Nomundilo wokoaltari u nokudiininwa u kale wa tema uha dime ko; ndelenee omupristeli na teme oikuni keshe ongula nokutula ko exwikiloyambo nokuxwika po oipambu yomakaadi epanduloyambo. 13 Efimbo alishe omundilo u nokudiininwa u kale wa tema koaltari. U kale wa tema uha dime.”

Omhango yeendjayambo

14 Nomhango yeendjayambo oyo ei: “Ovana ovamati vaAron ve noku di eta koshipala shOmwene poaltari. 15 Umwe na kufe mo mudo eke li yadi moufila wa nakwa weendjayambo pamwe nomaadi noitwiminifo aishe ei i li keendjayambo ndele ye e noku u xwika po koaltari ngaashi edimbulukifoyambo edimba liwa kOmwene. 16 Naashi tashi xupu po, nashi liwe po kuAron novana vaye. Shi nokuliwa shihe nonhafi monhele iyapuki, mehale lokomesho letwali leongalo vo ve noku shi lya. 17 Itau telekwa u nonhafi. Ame nde u mu pa ngaashi oshitukulwa sheni shomomundiloyambo wange. Nayo oiyapukielela ngaashi etimbayambo nevelombediyambo. 18 Ovalumenhu aveshe vomovana vaAron nave u lye. Yo onghedimhango yaalushe komaludalo avo oshitukulwa shokomundiloyambo wOmwene. Vamwe ve lili tave shi kumu tava nyono ouyapuki.

19 Omwene okwa lombwela vali Moses ndele ta ti: 20 “Olo eyambo laAron novana vaye ovamati ve noku li etela Omwene mefiku tuu olo ye ta ka vaekwa: okilograma youfila wa nakwa eendjayambo defiku keshe. Etata lado ongula netata onguloshi. 21 Odo di nokukangwa moshipeleki pamwe nomaadi; ove u noku di eta da pilulwa nawa. U nokweeta eendjayambo da tukaulwa oupambu edimba liwa kOmwene. 22 Omupristeli womovana ovamati vaAron, ou a vaekwa ponhele yaye, e noku di kanga; oyo onghedimhango yaalushe. Osho ashishe shi nokuxwikwa po ngaashi oshitukulwa shOmwene. 23 Osho ngaha hano eendjayambo keshe domupristeli odo eyambo tali xwikwa po sheke. Itadi liwa.”

Omhango yetimbayambo

24 Omwene okwa lombwela vali Moses a lombwele Aron novana vaye ovamati kutya, 25 Omhango yetimbayambo oyei: “Monhele apa exwikiloyambo tali tomwa, etimbayambo li nokutomwa koshipala shOmwene. Olo liyapukielela. 26 Omupristeli ou ta eta etimbayambo, ne li lye po. Monhele iyapuki li nokuliwa mehale lokomesho yetwali leongalo. 27 Ashishe eshi tashi kumu ombelela yalo, tashi yapulwa. Ngeenge ohonde yalo tai ndodele koshikutu, ye e nokukosha oshikutu oko ohonde ya ndodela monhele iyapuki. 28 Nombiya yelova omo ya telekwa i nokutatulwa po. Ndelenee ngeenge ya telekwa mombiya yoshikushu, i nokupushulwa nokukoshwa nomeva. 29 Ovalumenhu aveshe vomovapristeli, nave i lye. Yo iyapukielela. 30 Ndelenee etimbayambo keshe mulo ohonde imwe ya twalwa metwali leongalo i ete ekwatakanifo metwali liyapuki, olo itali liwa po. Lo li nokulungwinifwa po momundilo.”