Oshikefa shaKalunga tashi etwa muJerusalem
1 Ndele ye okwe litungila eengulu moshilando shaDavid, nokwa longekidila oshikefa shaKalunga onhele ndele te shi dikile etwali. 2 Opo nee David ta ti: “Kaku na umwe ta humbata oshikefa shaKalunga, Ovalevi aveke, osheshi Omwene e va hoololela okuhumbata oshikefa shaKalunga noku mu longela fiyo alushe.” 3 Ndele David okwa ongela Ovaisraeli aveshe muJerusalem, va ete oshikefa shOmwene konhele oyo yasho, ye e i shi longekidila. 4 Ndele David okwa ongela oludalo laAron nOvalevi: 5 movana vaKohat: Uriel, omukulunhu, novakwao efele nomilongo mbali; 6 movana vaMerari: Asasia, omukulunhu, novakwao omafele avali nomilongo mbali; 7 movana vaGerson: Joel, omukulunhu, novakwao efele nomilongo nhatu; 8 movana vaElisafan: Shemaia, omukulunhu, novakwao omafele avali; 9 movana vaHebron: Eliel, omukulunhu, novakwao omilongo hetatu; 10 movana vaUsiel: Aminadab, omukulunhu, novakwao efele nomulongo navavali; 11 ndele David okwa ifana ovapristeli Sadok naAbjatar, nOvalevi Uriel, Asasia naJoel, Shemaia naEliel naAminadab, 12 ndele ta ti kuvo: “Nye ovakulunhu vomapata Ovalevi: Liyapuleni, nye vene novakweni, mu ete oshikefa shOmwene, Kalunga kaIsrael, konhele oyo nde i shi longekidila. 13 Osheshi nye kamwa li po pehovelo, Omwene Kalunga ketu eshi e tu taula, shaashi inatu mu konga ngaashi sha wapala.” 14 Opo nee ovapristeli nOvalevi ve liyapula, va ka tale ko oshikefa shOmwene Kalunga kaIsrael. 15 NOvalevi va humbata nomitengi oshikefa shaKalunga komapepe ngaashi Moses e va lombwela pandjovo yOmwene.
16 Ndele David okwa lombwela ovakulunhu Ovalevi nokutya, vo va tule po oovakwao ovaimbi nouxumba nouxumbafeta neenyalilo noosimbale, va shike nokuyelula ondaka yomaimbilo ehafo. 17 Onghee hano Ovalevi va tula po Heman yaJoel nomovakwao Asaf yaBerekia, nomovana vaMerari, ovakwao Etan yaKusaja; 18 ndele pamwe navo vomepata lavo ava ve va shikula mokufimanekwa: Sakaria, Ben naJaasiel naSemiramot naJeiel naUnni, Eliab naBenaja naMaasea naMatitia naElifeleu naMikneja naObed-Edom naJeiel, ovanangeli voivelo; 19 novaimbi Heman, Asaf naEtan, va shike omanghuma oshikushu; 20 naSakaria naJaasiel naSemiramot naJehiel naUnni naEliab naMaasea naBenaja ve neenyalilo nondaka yopombada; 21 ndele Matitia naElifeleu naMikneja naObed-Edom naJeiel naAsasia ve nouxumbafeta, va kwatele olwiimbo komesho nondaka yombaafa. 22 Ndele Kenanja, omukulunhu wOvalevi, a tulwa po a diinine etuto loinima. Ye okwa pashukila okuhumbata kwoinima, shaashi ye kwa li e nomayele moshilonga osho. 23 Ndele Berekia naElkana va li ovanangeli poshivelo shoshikefa. 24 Novapristeli Sebanja naJosafat naNetanel naAmasai naSakaria naBenaja naElieser, va shika omanghuma, va li komesho yoshikefa shaKalunga. Ndele Obed-Edom naJehia va li ovanangeli voivelo yoshikefa. 25 Opo nee David novakulunhu vOvaisraeli novaneyovi va ya, ndele va eta nehafo oshikefa shehangano lOmwene, ve shi kufa mo meumbo laObed-Edom. 26 Ndele fimbo Kalunga a kwafa Ovalevi ava va humbata oshikefa shehangano lOmwene, eengobe heyali deemhedi needi heyali deemhedi oda yambwa.
27 Ndele David okwa li a djala ombaikifa yokombada ya hondjwa koshiyata shiwa sholiina, nosho yo Ovalevi aveshe ava va humbata oshikefa, novaimbi nomukulunhu wetuto, Kenanja pamwe novaimbi. Ndele David okwa li e noshikutu sholiina shokomapepe. 28 NOvaisraeli aveshe va ya va ka tale ko oshikefa shehangano lOmwene nehafo nokushika omanghuma nomanghuma oshikushu nousimbale, fimbo vakwao hava shiki eenyalilo nouxumbafeta. 29 Oshikefa shehangano lOmwene eshi she uya koshilando shaDavid, Mikal, omona waSaul, omukainhu, a talela mombululu yekende, ndele ta mono ohamba David ta tutula ndele ta shiki okaxumba, nokwe mu dina momutima waye.
© Oshikwanyama Bible Revised © Bible Society of Namibia, 2008, 2012.
