EXODUS 30 - Oshikwanyama Bible (OKYB)

Oaltari yokutwimina

1 “Ove u nokuninga yo oaltari okuxwikila ko oitwiminifo. U noku i ninga nomuti womwoonde. 2 Oule wayo oludimbo limwe, nolumbubu layo oludimbo limwe. I nokukala i neembinga nhee. Ndele oule wayo omaludimbo avali. Eembinga tadi di muyo da hongwa mumwe nayo; yo aike imwe aike. 3 Ndele ove u noku i vaeka noshingoldoelela; kombada yoshitaafula shovene neembinga adishe; ndele i ningila olukambo loshingoldo tali i dingilile. 4 I ningila yo eengodo mbali doshingoldo koshi yolukambo keembinga da shaama. Ove u noku di ningila keembinga dayo mbali da shaama. Ndele mudo tamu xwekelwa omitengi oku shi humbata. 5 Nomitengi di honga momuti womwoonde, di vaeka noshingoldo. 6 Opo nee to i tula komesho yoshiyatatukulifo eshi shi li komesho yoshikefa shoundobwedi, komesho yoshituviko shekwatakanifo, oko Ame ohandi ka shakena nanye. 7 Ndele Aron e nokutema kuyo oitwiminifo yedimba liwa. Ongula keshe ye ngeenge ta longekida eelamba, ye e noku i tema. 8 Nosho onguloshi, Aron ngeenge ta tula eelamba meenhele dado, ye e noku i tema i kale oitwiminifo efimbo alishe koshipala shOmwene komaludalo fiyo omaludalo. 9 Inamu tula kuyo oitwiminifo oikwailongo ile exwikiloyambo ile eendjayambo. Ndele inamu tilila ko yo oikunwayambo. 10 Ndele lumwe omudo keshe Aron e nokukwatakanifa eembinga dayo. Nohonde yetimbayambo lekwatakanifo ye e noku i kwatakanifa lumwe omudo keshe momaludalo eni. Oyo oiyapukielela kOmwene.”

Efuto lekwatakanifo

11 Omwene okwa popya vali naMoses, ndele ta ti: 12 “Ove eshi ho vale omuvalu wOvaisraeli pakuvalwa kwavo, vo keshe umwe, molwomwenyo waye e nokuyandja kOmwene efuto lekwatakanifo mokuvalwa kwavo, opo paha holoke okuhandukilwa mokati kavo ngeenge tava valwa. 13 Keshe umwe ou a valwa e noku li yandja nokutya etata losekeli pasekeli yetwali liyapuki (mosekeli omu neegera omilongo mbali) hano etata losekeli oiyandjiwayambo kOmwene. 14 Omuvalwa keshe ou a wanifa omido omilongo mbali naau e di dule, e nokuyandja kOmwene oshiyandjiwayambo. 15 Oshipuna shiha ete shihapu shi dule olo nohepele iha ete shinini shi dulike ketata losekeli, vo ngeenge hava yandje kOmwene oiyandjiwayambo opo va kwatakanife eemwenyo davo. 16 Kufa hano efuto lekwatakanifo kovana vaIsrael u li longife meyakulo lometwali leongalo, opo lo li dimbulukifife ovana vaIsrael koshipala shOmwene okukwatakanifa eemwenyo davo.”

Elikoshelotemba loshikushu

17 Ndele Omwene okwa popya naMoses ndele ta ti: 18 “Ove u nokuninga yo elikoshelotemba loshikushu noshikwatelwamhadi shalo shoshikushu mokulikosha. Ndele li tula pokati ketwali leongalo noaltari ndele tila mo omeva, 19 opo Aron novana vaye ovamati va shiive okukosha mulo omake avo neemhadi davo, 20 vo ngeenge tava i metwali leongalo ve nokulikosha nomeva, vaha fye, ile vo ngeenge tava ehene popepi noaltari va yakule Omwene mokutema eyambo lokuxwikwa nomundilo. 21 Vo ve nokukosha hano omake avo neemhadi davo, vaha fye. Ndele eshi nashi kale kuvo onghedimhango yaalushe kuye mwene nokoludalo laye momapata avo.”

Omaadi okuvaeka

22 Omwene okwa popya vali naMoses ndele ta ti: 23 “Likufila oimbodi yedimba liwa i dule ikwao aishe nokutya, omirha iwa i fike peekilograma hamano, okaneli i nedimba liwa hano eekilograma nhatu, nakalmus i nedimba liwa eekilograma nhatu, 24 neekilograma hamano kassia paeshekeli detwali liyapuki, neelita nhee omaadi eemono; 25 noinima aishe ei u ninge omaadi mayapuki okuvaeka, olumbololo lokuvaeka ngaashi omunongo ta ningi, e nokukala omaadi mayapuki okuvaeka. 26 Nao u nokuvaeka etwali leongalo noshikefa shoundobwedi, 27 noshitaafula noilongifo yasho aishe noshikwatelwalamba noilongifo yasho noaltari yokutwiminina, 28 noaltari yexwikiloyambo noilongifo yayo aishe nelikoshelotemba noshikwatelwamhadi shalo. 29 Osho ngaha hano ove u noku i yapula, yo i shiive okukala iyapukielela. Keshe umwe ta kumu kuyo, ota ningi omuyapuki. 30 Ove u nokuvaeka yo Aron novana vaye ovamati noku va yapulila okuyakula nge moshilonga shoupristeli. 31 Ndele ove u nokulombwela ovana vaIsrael nokutya, oo omaadi ange mayapuki okuvaeka komaludalo eni. 32 Oo itaa tilwa kolutu lomunhu nande umwe. Nye inamu a ninga paulikilopukululo eli, osheshi oo omayapuki, nokunye yo oo e nokukala mayapuki. 33 Keshe umwe ou te liningile sha sha fa omaadi aa ile ta vaeke omunhu, e nokudimwa mo muvakwao.”

Oitwimifo

34 Omwene okwa lombwela vali Moses ndele ta ti: “Likufila oimbodi yedimba liwa: eka linyika nawa, neenhemo dahiasint nagalbanum, oinima ei yedimba liwa tai pilulilwa mumwe i fike pamwe, 35 u ninge kuyo oitwiminifo, olumbololo ngaashi omunongo ta ningi, iwa iyapuki, mwa tulwa omongwa. 36 Ndele oshitukulwa shimwe shomuyo shi yenga, u tule oshitukulwa shimwe shomuyo poshi komesho yoshikefa shoundobwedi metwali leongalo, omo Ame handi ka shakena naave. Iyapukielela i nokukala kunye. 37 Noitwiminifo imwe tamu liningile, inamu i ninga paulikilopukululo eli. Oyo nai talwe kunye ya yapulilwa Omwene. 38 Keshe umwe ou te liningile sha sha fa omaadi aa e a twimine, e nokudimwa mo muvakwao.”