Oshikefa shOmwene tashi twalwa kuJerusalem
1 David okwa shiva vali ovahoololwa aveshe vomuIsrael, ovalumenhu omayovi omilongo nhatu. 2 Ndele David novanhu aveshe ava va li puye va fikama ndele va dja muBaal shomuJuda va ka tale ko oshikefa shaKalunga sha lukilwa edina lOmwene womatanga ovakwaita, olukalwapangelo laye tali humbatwa kovakerubi. 3 Osho va kufa oshikefa shaKalunga meumbo laAbinadab, olo la li koshikulundu ndele va enda pamwe nasho, Ussa naAhjo, ovana ovamati vaAbinadab va shinga etemba, 4 Ahjo e shi kwatela komesho. 5 Ndele David neumbo alishe laIsrael ola shika ouxumba ve lili nave lili vomuti womusipresi koshipala shOmwene, nokutya ouxumbafeta neenyalilo noungoma noungedjo nomanghuma. 6 Ndele eshi ve uya koshipale shaNahon, Ussa okwa yakela oshikefa shaKalunga nokwe shi kwata neke laye, osheshi eenhani da punduka. 7 Opo nee ehandu lOmwene la xwamena Ussa, ndele Kalunga okwe mu denga omolwaashi e shi kwata, onghee ye a fila poshikefa shaKalunga. 8 Ndelenee David okwa ninga omwenyo mwii eshi Omwene a dipaa Ussa. Onghee hano okwa luka onhele oyo Peres-Ussa fiyo onena eli. 9 Ndele David okwa tila Omwene efiku olo ndele ta ti: “Oshikefa shOmwene tashi dulu ngahelipi okuuya kwaame?” 10 Onghee hano David ina hala oshikefa shOmwene shi uye kuye moshilando shaDavid; ndelenee David e shi tuma keumbo laObed-Edom, Omugat. 11 Noshikefa shOmwene sha li eehani nhatu meumbo laObed-Edom, Omugat. NOmwene okwa nangeka noupuna Obed-Edom neumbo laye alishe.
12 Ndele ohamba David eshi ya shiivifilwa nokutya, Omwene okwa nangeka noupuna eumbo laObed-Edom naashishe shaye omolwoshikefa shaKalunga, David okwa ya nokwa kufa oshikefa shaKalunga meumbo laObed-Edom nokwe shi eta nehafo koshilando shaDavid. 13 Ndele ovahumbati voshikefa shOmwene eshi va enda eenghatu hamano, ye okwa yamba ongobe nonhana. 14 Ndele David okwa tanha nokunhuka neenghono moipafi yOmwene. Ndele David okwa li a djala oshikutu sholiina shokomapepe. 15 Osho ngaha hano David neumbo alishe laIsrael va eta oshikefa shOmwene nokunyakukwa nokushika omanghuma. 16 Oshikefa shOmwene eshi she uya moshilando shaDavid, Mikal yaSaul okwa talela mombululu yekende ndele ta mono ohamba David ta tanha nokunhuka moipafi yOmwene. Ndele ye e mu dina momutima waye. 17 Vo eshi va eta mo oshikefa shOmwene ve shi tula ponhele yasho metwali olo David e li shi dikila, David okwa yamba omaxwikiloyambo nomapanduloyambo moipafi yOmwene. 18 David eshi a mana okuyamba omaxwikiloyambo nomapanduloyambo ye okwa nangeka ovanhu noupuna medina lOmwene womatanga ovakwaita. 19 Nokwa yandjela ovanhu aveshe, eongalo alishe laIsrael, ovalumenhu novakainhu, keshe umwe omungome umwe, onhumba yombelela noshikuki sheeviinyu. Opo nee ovanhu aveshe, keshe umwe a ya keumbo lavo. 20 David eshi a aluka a ka tale eumbo laye, Mikal yaSaul e uya ta shakeneke David ndele ta ti: Ohamba yaIsrael e lifimanekifa ngahelipi nena, eshi e lidula momesho ovapika ovakainhu vovapiya vayo, ngaashi ovaholi voipala tave lidula. 21 Ndelenee David ta ti kuMikal: Nda nyakukwa koshipala shOmwene, ou a hoolola nge komesho yaxo nokomesho yepata laye alishe, eshi a tula nge ndi ninge ohamba yoshiwana shOmwene, ohamba yaIsrael, heeno, koshipala shOmwene nda hafa! 22 Ndele ame nda hala ndi lininipike nelininipiko li dule eli nokukala omuxupi momesho ange mwene, ndelenee ovapika ovakainhu ovo to va popi, otava ka fimaneka nge. 23 Ndele Mikal yaSaul ina kala e nokaana fiyo okefiku lefyo laye.
© Oshikwanyama Bible Revised © Bible Society of Namibia, 2008, 2012.
