Ehambeleloimbilo lovaxupifwa
1 Hambeleleni Omwene, osheshi Oye omuwa,
osheshi ouwanghenda waye otau kala po fiyo alushe:
2 osho nava tonge ava va kulilwa kOmwene,
ava a mangulula momaudjuu wavo,
3 nokwe va ongela moilongo moushilo nomouninginino,
moumbangalanhu nomoumbuwanhu.
4 Okwa li va endaenda mofuka
nomombuwa ihe na omalila,
inava mona nande oshilando shokukala mo.
5 Vo ova fya ondjala nenota,
neemwenyo davo da konenwa kuyo.
6 Opo nee moudjuu wavo
ova kuwa kOmwene onghuwo,
ndele Ye e va xupifa momatilo avo,
7 ndele e va endifa mondjila ya yuka,
vo va fike koshilando va kale mo,
8 ovo nava pandulile Omwene ouwanghenda waye
noikumwifa yaye, ei ha longele ovana vovanhu,
9 molwaashi a kumwifa omwenyo ou wa notelwa,
nokwa palula nouwa omwenyo wa konenwa.
10 Ava va li omutumba momulaulu
nomomudile wefyo,
va kwatelwa moluhepo nomelyenge,
11 osheshi va li va anya okudulika
keendjovo daKalunga,
nova dina epukululo laau wOkombadambada,
12 fiyo okwa ninipika omitima davo noudjuu,
ndele tava pundu, vehe namukwafi;
13 opo nee moudjuu wavo
ova kuwila kOmwene onghuwo,
ndele Ye okwe va xupifa momatilo avo;
14 okwe va pitifa mo momulaulu nomomudile wefyo,
ndele ta tokaula omapando avo;
15 vo nava pandulile Omwene ouwanghenda waye
noikumwifa yaye, ei ha longele ovana vovanhu,
16 molwaashi a teyaula po oivelo yoshikushu,
noipatifo yoitenda okwe i tataula po.
17 Ava kwa li va nyika oulai,
eshi va hepifwa kokukala kwavo
momanyono nomolwowii wavo,
18 keshe tuu eendja ove di nyonyodola kwa li,
fiyo ove lifikifa popepi noivelo yefyo;
19 opo nee moudjuu
ova kuwila kOmwene onghuwo,
ndele Ye e va xupifa momatilo avo;
20 Oye okwa tuma ondjovo yaye nokwe va velula
noku va xupifa mombila.
21 Ovo nava pandulile Omwene ouwanghenda waye,
noikumwifa yaye, ei ha longele ovana vovanhu,
22 vo nava ete omayambo olupandu
nokuudifa oinenelonga yaye nenyaku.
23 Ava kwa li va yauka omeva efuta neeskepa,
va ka shingife oipindi yavo komafuta manene;
24 vo ova mona okulonga kwOmwene
noikumwifalonga yaye moule womafuta.
25 Osheshi Ye, eshi a tonga,
okwa tukulukifa oshikungulu shinene,
eshi sha tumbifa omakufikufi,
tashi a umbile pombada;
26 ova tumbilwa keulu kwi,
ndele tava filukile mokule mwi,
fiyo eemwenyo davo da nyengwa molwetilo;
27 ova ifwa oshitelele, ndele tava tengaukifwa
va fa eengholwe,
neendunge davo opo da xulila opo.
28 Opo nee moudjuu wavo
ova kuwila kOmwene onghuwo,
ndele Ye e va xupifa momatilo avo;
29 okwa lotifa oshikungulu,
pa pepa okamhepo kawa,
nomandudumo omakufikufi okwa mwena;
30 opo vo ova hafa, eshi sha lota,
ndele Ye te va twala ketulilo, eli va hala;
31 ovo nava pandulile Omwene ouwanghenda waye
noikumwifa yaye, ei ha longele ovana vovanhu;
32 vo nave mu fimaneke meongalo loiwana
noku mu hambelela moshiongalele shovakulunhu.
33 Omilonga okwe di shitukifa eembuwa,
needjo oipale yongaho,
34 edilopya okwe li ninga edu loshimongwa,
omolwoulunde wovanhu ava ve li mo.
35 Osho yo apa, pa li shito ombuwa,
okwa shitukifa po omatale,
nedu likukutu okwe li shitukifa eefifiya,
36 novafi vondjala okwe va nangeka mo
ndele va ninga mo oshilando, omo va kala,
37 ndele tava kunu oilya
ndele tava twike oixwa yomiviinyu,
edi da ima da eta oshishipo;
38 nokwe va nangeka noupuna,
ndele tava hapupala unene,
noimuna yavo keinini.
39 Ndelenee opo va ninipala vali, va xutuka,
va hangika komupya noshisho noluhodi.
40 Ovakengeli ote va vaeke odino,
ndele te va efa va puke va ende moxwati.
41 Epongo okwe li kufa moupongo walo,
nomapata ao okwe a tanifa
ngaashi oyuunda yeedi.
42 Ovayuki ohave shi mono noku shi hafela,
ndele oumbudi aushe u nokumutikwa okanya kao.
43 Ou e nounongo ne shi diladile,
ye na shipaashipe
omaningilo ouwanghenda wOmwene.
© Oshikwanyama Bible Revised © Bible Society of Namibia, 2008, 2012.
