Omukainhu a djalekwa etango
Ongadu novaengeli vayo tava tewa kuMikael ndele tava ekelwa pedu
1 Ndele meulu omwa monika edidiliko linene. Omukainhu ou a djalekwa etango, nohani ya kala koshi yeemhadi daye, nokomutwe waye oshishani sheenyofi omulongo nambali. 2 Oye okwa li omufimba nokwa kuwa mokufetwa nomokuyehamekwa kokudala.
3 Nedidiliko likwao la holoka meulu: Tala, ongadu inene itilyana ya fa omundilo, i nomitwe heyali neembinga omulongo, nokomitwe dayo oishani iheyali. 4 Nomushila wayo wa komba po oshititatu sheenyofi domeulu, ndele ye di ekela pedu. Nongadu oya kala ofika komesho yomukainhu ou e li pokudala, i xwake po okaana kaye, ngeenge ka dalwa. 5 Oye nokwa dala okaana okalume, ke nokulifa oiwana aishe nodibo yoshivela, nokaana kaye oka vakulwa, ka kale puKalunga nopolukalwapangelo laye. 6 Nomwalikadi okwa ya onhapo mombuwa, oku Kalunga e mu longela onhele, opo a palulilwe ko omafiku eyovi nomafele avali nomilongo hamano.
7 Ndele meulu omwa tukuluka olwoodi; Mikael novaengeli vaye va lwifa ongadu. Nongadu novaengeli vaye ova lwa yo, 8 ndele ova nyengwa, nonhele yokukala kwavo meulu inai monika vali. 9 Nongadu inene ya ekelwashi, eyoka likulu, la ifanwa ondiaboli naSatana, ou ta hongaula ounyuni aushe, okwa ekelwa pedu, novaengeli vaye ova ekelwashi yo pamwe naye.
10 Onda uda ondaka inene meulu ya tya: “Paife exupifo neenghono nouhamba owa ninga waKalunga ketu, nepangelo olaKristus waye, osheshi omuhokololifi wovamwatate vetu okwa ekelwashi, ou kwa li he va hokololifa koshipala shaKalunga omutenya noufiku. 11 Ovo ve mu finda nohonde yOdjona neendjovo domahepaululo avo, ndele va li inava hokwa eemwenyo davo fiyo okufya. 12 Onghee hano nyakukweni, onye omaulu, naava mwa kala muwo! Woo, edu nefuta, osheshi Satana a kulukila kunye nehandu linene, osheshi e shi shii e nokafimbo kaxupi kongaho.”
13 Hano ongadu ei eshi ya mona ya ekelwashi kombada yedu, oya ka shikula omukainhu ou a dala okamati. 14 Omukainhu okwa pewa omavava avali onhwa inya inene, a ka tukile kombuwa konhele yaye, oko ta ka palulwa efimbo limwe nomafimbo netatafimbo, a kale kokule noshipala sheyoka. 15 Neyoka la pembela omukainhu omeva, a dja mokanya kalo a fa omulonga, a twaalelwe komulonga. 16 Nedu ola kwafa omukainhu: la akamifa okanya kalo, ndele la pona omulonga ou ongadu ye u pemba mokanya kayo. 17 Nongadu oya handukila omwalikadi, ndele oya ya i ka lwife ovakwao vomepata laye, ava hava diinine oipango yaKalunga, ndele ve na ehepaululo laJesus. 18 Ndele yo oya kala ofika peheke lefuta.
© Oshikwanyama Bible Revised © Bible Society of Namibia, 2008, 2012.
