MARKUS 4 - Oshikwanyama Bible (OKYB)

Omukuni

1 Ndele Ye okwa hovela vali okulonga ovanhu pomunghulo wefuta. Nongudu inene oya ongala puye, onghee okwa ya mowato, a li omutumba muyo mefuta nongudu aishe oya li poukukutu pomunghulo wefuta. 2 Ye okwe va longa oinima ihapu momafaneko ndele mokulonga kwaye okwa tya kuvo: 3 “Pwilikineni: Tala, omukuni okwa pita a ka kune. 4 Ndele mokukuna kwaye dimwe oda wila mondjila, needila de uya ndele tadi di shomona po. 5 Ndele dimwe oda wila poluma pehe na edu lihapu, ndele oda mena divadiva, osheshi edu ola li lixupi. 6 Ndele etango eshi la pita, oda lemba ndele oda fya po, osheshi oda li dihe na omidi. 7 Ndele dimwe oda wila meeshosholo, neeshosholo dakula tadi di fininike, ndele inadi dala sha. 8 Ndele dimwe oda wila medu liwa, oda mena, da kula, ndele oda dala fiyo omilongo nhatu, nomilongo hamano, nefele.” 9 Ye okwa tya: “Ou e na omatwi okuuda, na ude ko.”

10 Ndele eshi a li po Oye aeke, opo nee ovo va li pamwe naavo omulongo navavali, ve mu ongalela, ove mu pula omafaneko aa. 11 Ye okwa tya kuvo: “Nye omwa pewa okushiiva oshiholekwa shouhamba waKalunga, ndele venya vopondje otava pewa aishe momafaneko, 12 opo va kale ve wete ko, vo vaha koneke, opo va kale nokuuda, ndele vehe udite ko, opo vehe lidilulule, novaha diminwe po omatimba avo.” 13 Okwe va lombwela ndele ta ti: “Nye kamu udite ko efaneko eli, hano otamu udu ko ngahelipi omafaneko makwao aeshe? 14 Omukuni ota kunu ondjovo. 15 Odo da wila mondjila, ovava hava kunwa eendjovo, ndele fimbo tava pwilikine, Satana te uya divadiva, ndele ta kufa mo eendjovo da kunwa muvo. 16 Naadi da kunwa poluma ovava tava tambula eendjovo nehafo shimha tuu ve di udu. 17 Ndele vo vehe na omidi muvo vene, ndele ovo ovana vokafimbo, ndele ngeenge tava hangika koudjuu ile tava hepekelwa eendjovo, otave di efa. 18 Ndele dimwe odo da kunwa mokati keeshosholo, ovava tava udu eendjovo, 19 ndele oshisho shounyuni ou nepukifo loupuna, nakeshe tuu okahalu take uya mo ndele taka fininike eendjovo, ndele tadi kala oifete. 20 Ndele odo da kunwa medu liwa, ovava tava udu eendjovo, ndele tave di tambula, ndele tava dala oilya lwomilongo nhatu, lwomilongo hamano nolwefele.”

Olamba noshiyelekifo

(Luk. 8:16-18)

21 Ye okwe va lombwela ndele ta ti: “Olamba itai etwa mo, ndishi, i pwipwikwe oshimbale, ile i tulwe koshi yomutala, itai tulwa mbela moshikwatelo? 22 Osheshi kaku na osho sha holekwa, itashi ka hololwa, naasho sha hondama, itashi ka holoka. 23 Ou e nomatwi okuuda, na ude ko.”

24 Ndele okwe va lombwela: “Didilikeni nawa osho hamu shi pwilikine, oshiyelekifo osho tamu shi yelekifa, nanye otamu shi yelekifwa, ndele tamu shoshelwa ko. 25 Osheshi ou e kwete, ye ota pewa, ndele ou ehe na, ye ota kufwa naasho e shi kwete.”

Eenghono dombuto nombuto yoshinapi

26 Ye okwa tya: “Ouhamba waKalunga owa fa omunhu a kuna ombuto medu, 27 ndele ta kofa ndele ta penduka oufiku nomutenya, ombuto otai mene, ndele tai kulu, ye mwene ehe shii nhumbi tai ningi. 28 Osheshi edu olo vene tali eta oilya, tete omino, ndele tadi shikulwa komutwe neemuma da kola komutwe. 29 Noilya ngeenge ya pya, ota tumu ko diva oshikashulifo, osheshi eteyo ola fika.” 30 Ye okwa tya: “Ouhamba waKalunga ohatu u fanekifa nashike ndele hatu u yeleke nefaneko lilipipo? 31 Owa fa ombuto yoshinapi, oyo pakukala i li okambuto kanini ke dulike keembuto adishe dokombada yedu. 32 Ashike ngeenge ya kunwa, ohai mene, ndele tai i pombada i dule oimeno aishe, ndele tai ningi oitai yakula needila dokoshi yeulu ohadi tungile momudile wayo.” 33 Nomafaneko makwao mahapu a fa aa okwe va lombwela eendjovo opaenghono davo dokuuda. 34 Ndele odo dihe fi domafaneko ine di va lombwela. Ndele ovalongwa vaye okwe va fatululila adishe, eshi ve ke likalela.

Jesus ta lotifa efuta

(Mat. 8:23-27Luk. 8:22-25)

35 Hano eshi kwa ninga onguloshi yefiku tuu olo, okwa tya kuvo: “Tu yaukileni komunghulo winya.” 36 Ndele va lekela ongudu yovanhu, ndele ova dja ko naye, ngaashi a li mowato. Eewato dimwe da enda pamwe naye. 37 Ndele okwa dja omhepo idjuu nomakufikufi e lidenga mowato, hanga ya yada omeva. 38 Ndele Ye mwene okwa hangika mowato konima, ndele okwa kofa poshiwilo. Vo ove mu pendula ndele tava ti kuye: “Omuhongi, mboli Ove ku na ko nasha, eshi tu li hatu ningine mo?” 39 Opo Ye eshi a penduka, okwa hanyena omhepo ndele okwa lombwela efuta: “Mwena, ove u lote.” Omhepo oya lota, ndele okwa tya filu. 40 Okwe va lombwela: “Onye ovambada ngahelipi? Oshike muhe na eitavelo?” 41 Vo ova li va tila neenghono, ndele tava tongafana: “Ou olyelye hano, omhepo nefuta eshi tali dulika kuye?”