Asiria tashi tokolwa
1 Woo, omuhanauni oove; ove mwene ino hanaunwa po! Oshimhulu oove, ou ino tinhwa po! Ngeenge wa mana okuhanauna, ove oto ka hanaunwa, nongeenge wa mana okutinha, naave oto ka tinhwa po.
2 Omwene, tu filonghenda, shaashi fye ohatu ku teelele. Kala okwooko kwavo keshe ongula taku shi, heeno, ekwafo letu mefiku lefininiko. 3 Oiwana otai i onhapo ondaka yengungumo loye, Ove ngeenge to fikama, oiwana otai ka halakanifwa. 4 Opo nee oihakanwaliko yeni otai toolwa ngaashi oipaxu hai toolwa nongaashi oshapapa hashi nhukaanhuka, osho tai tondokelwa.
5 Omwene okwa fimana pombada, shaashi ta kala mokombadambada. Oye ta yadifa Sion noshilitokolo nouyuki. 6 Ndele omayele neshiivo otali ka kala okupama kwomefimbo loye neenghono dexupifo; nokutila Kalunga okwo emona laSion.
7 Tala, ovaladi otava ingida pondje novatumwa vombili otava lili nokulililila. 8 Oitauwa yakula oye likalela, nakeshe omweendi ite linyenge vali mondjila. Oye okwa nyona ehangano, okwa dina oilando nokwa tala ovanhu kave noshilonga. 9 Edu otali nyika oluhodi, tali notelwa; Libanon osha fya ohoni, efilu laSaron la shituka ombuwa, Basan naKarmel oda yaumuka omafo. 10 Omwene ota ti: “Paife onda hala okufikama, paife onda hala okukala ofika, paife onda hala okuyeluka. 11 Nye omwa ninga ovafimba vomwiidi, ndele tamu dala olungu, okufudaana kweni oko omundilo tau mu xwike po. 12 Oiwana otai kangwa, ngaashi okalka, ongaashi omano a tyavwa ndele taa xwikwa po komundilo. 13 Pwilikineni, onye ava mu li kokule, eshi nda ninga, naava vopopepi shiiveni eenghono dange.” 14 Ovalunde vomuSion otava haluka novanaihelele otava hangwa kekakamo. Ohava ti: “Olyelye womakati ketu ta dulu okukala po pomundilo hau lyana, nolyelye ta dulu okukala pomutemo alushe?” 15 Oye ou ha kala nokweenda mouyuki, ndele ha popi doshili, oye ou a dina eliko lenyeko, ou eke laye hali anye okutambula ombubo, oye ou ta fitike omatwi aye aha pwilikine eenghundafana dokutilashi ohonde, ndele ta fifikinifa omesho aye aha tale eshi shii. 16 Oye ta ka mona onhele yaye pombada pokule, ehondamenongulu laye olo ohotemanya yaye; ota ka pewa omungome waye nomeva itae mu pwininine.
17 Omesho oye otaa ka tala ohamba mewapalo layo, otaa mono oshilongo shinene sha mbwalangadja. 18 Omutima woye otau kala nokudiladila omafiku oixuna wa pita mo, ndele tau ti. Omufininiki wefendelo oku li peni? Omuyelekeli oku li peni? Openi e li ou, ha shange eeshungongulu? 19 Ovanhu vapwidi ito ke va mona ko vali, ovanhu voshipopyo shikukutu shedumo elaka lavo kali uditike nande okomunhu.
20 Tala Sion, oshilando shetu shoivilo! Omesho oye otaa ka tala Jerusalem, onhele yombili, etwalifaila, ihali diluka, noiti yalo oyeengodi ihai pweywa mo, neengodi dalo ihadi tokoka nandenande. 21 Ndelenee Omwene oko ta ka kala pufye meenghonoshinge; tapa kala onhele yomilonga dinene da mbwalangadja, itamu ende nande ounengewato, noskepa inene itai di tauluka. 22 Osheshi Omwene Oye omutokoli wetu, Omwene Oye omukwateli komesho wetu, Omwene Oye ohamba yetu, Oye te ke tu xupifa. 23 Ndelenee paife, eengodi doye oda yululuka, inadi kwata vali oitingudi yado, noitadi yelula vali epandela. Ndelenee mefiku olo oixuulwa ihapu yokoita otai ka hakanwa, noingudu yo otai hakana nokutinha shihapu. 24 Ndele onakukalamo nande umwe ta ti: “Aame oshingone.” Ovanhu ava tava kala mo, ova diminwa po omatimba avo.
© Oshikwanyama Bible Revised © Bible Society of Namibia, 2008, 2012.
