MIKA 6 - Oshikwanyama Bible (OKYB)

Omwene ta hokololifa oshiwana shaye

1 Udeni ko, Omwene eshi te shi ti: Fikama ove, u hokolole, neemhunda noikulundudu nai pwilikine ondaka yoye! 2 Udeni oihokolola yOmwene, eemhunda, onye omakanghameno edu a pama akushe. Osheshi Omwene oku na oihokolola noshiwana shaye, ndele ta ka hokololifa Israel. 3 Onde ku ninga shike, ove oshiwana shange, nonde ku lolokifa nashike? Nyamukule nge hano! 4 Heeno, Aame tuu nde ku pitifa mo muEgipiti nomeumbo loupika onde ku kulila, ndele Ame nda tuma Moses, Aron naMirjam ve ku kwatele komesho. 5 Oshiwana shange, dimbulukwa hano Balak, ohamba yaMoab, eshi kwa li a diladila naashi a nyamukulwa kuBileam yaBeor mondjila yokudja mo muSittim nofiyo okuGilgal, opo u dimbulukwe oilonga ya yuka yOmwene.

Eendjayambo tadi wapalele Omwene

6 Ame ndi holoke nashike koshipala shOmwene, ndi linyongamene koshipala shaKalunga wOkombadambada? Ndi mu shakeneke ndi kwete omaxwikiloyambo, eemhunya domudo umwe? 7 Omwene ota ka hokwa mbela eedi omayovi nomilonga domaadi omayovi omilongo? Ndi yandje ngeno oshiveli shange omolwomatauluko ange, oshiimati sholutu lange ndi shi yandjele omatimba omwenyo wange?

8 Omunhu ove, Ye okwe ku shiivifila eshi shiwa. Nashike shimwe Omwene ta pula kwoove kakele nokutya u ninge eshi sha yuka nokuhola efilonghenda nokweenda nelininipiko pamwe naKalunga koye?

Ngaashi ho kunu, osho to teya yo

9 Ondaka yOmwene tai ingidile oshilando—sha wapala okutila edina loye: “Pwilikineni, nye ovanhu ava tamu ongala moshilando. 10 Natango tuu meumbo lomudinikalunga omu na omaliko omunyeka. Ohava longifa oshiyelekifo sha sha puka? 11 Ame ohandi dulu tuu okukala omukoshoki, ngeenge ndi noshiyelekifo inashi yuka nokakutu ke yadi omayelekifomanya inaa wana? 12 Osheshi oipuna yomoshilando oi yadi oukolokoshi noonakukalamo musho hava popi oipupulu, nelaka lavo li yadi ekengelelo momakanya avo. 13 Onghee hano naame yo ohandi ku denge noudu mudjuu nenyonauko molwoulunde woye. 14 Ove to ka lya, ndelenee ito ka kuta. Ondjala yoye otai kala noku ku kama. Eshi to i nasho, ove ito dulu oku shi xupifa, naashi to xupifa, ohandi ke shi yandja keongamukonda. 15 Ove oto ka kuna, ndelenee ito teya. Ove to yenge eemono; ndele ito vava omaadi ado; ndele to kolo eeviinyu, ndele ito a nu. 16 Osheshi omayukifo aOmri noilonga aishe yomeumbo laAhab otai diininwa. Ndele va kala nokweenda pamhangela yavo, opo ndi ku ninge eputu noonakukalamo esheko. Nye otamu ka humbata esheko loshiwana shange.”