Omakundifo omuyapostoli
1 Ame ohandi yandje kunye omumwatate omukainhu Foibe, ou omuyakuli weongalo lomuKenkrea, 2 mu tambuleni mOmwene, ngaashi sha wapalela ovayapuki, nye mu mu yakule moinima aishe omo a pumbwa ekwafo leni, osheshi naye yo okwa yakula vahapu naame mwene yo.
3 Kundileni po Priskila naAkwila, ovalongi vakwetu muKristus Jesus, 4 ava va yandja eefingo davo molwomwenyo wange, haame andike handi va pandula, ndelenee nomaongalo aeshe ovapaani; 5 neongalo hali ongala meumbo lavo, li kundileni po. Kundileni po Epainetus, omuholike wange, ou omutete waKristus muAsia. 6 Kundileni po Maria, ou e lihepeka molwetu moku tu longela. 7 Kundileni po Andronikus naJunias, ovakwetu vepata lange, novakwatwa vakwetu, ava va fimana mokati kovayapostoli, ndele ovo votete muKristus kwaame. 8 Kundileni po Ampliatus, omuholike wange mOmwene. 9 Kundileni po Urbanus, omulongi mukwetu muKristus, naStakus, omuholike wange. 10 Kundileni po Apellas, ou a dula eyeleko muKristus. Kundileni po ava vomeumbo laAristobulus. 11 Kundileni po omukwetu Herodion. Kundileni po vomoNarkissus ve li mOmwene. 12 Kundileni po Trifeina naTrifosa, ava hava longo mOmwene. Kundileni po Persis, omumwameme omukainhu omuholike, ou a longa noudiinini mOmwene. 13 Kundileni po Rufus, omuhoololwa mOmwene, naina, ou a fa meme yange yo. 14 Kundileni po Asinkritus, Flegon, Hermes, Patrobas, Hermas, novamwatate ovo ve li puvo. 15 Kundileni po Filologus naJulia, Nereus nomumwaina omukainhu, naOlimpos novayapuki aveshe ve li puvo. 16 Kundilafaneni po nefipafano komilungu liyapuki. Omaongalo aKristus otae mu kundu.
Kukumeni ovapukifi
17 Ndele ovamwatate, ohandi mu kumaida mu pashukile ava hava eta olutandu nomashindo okukondjifa elongo mwe li longwa; mu noku va yepa. 18 Osheshi ava ve li ngaha, itava longele Omwene wetu Kristus, ndelenee omadimo avo vene, nokeendjovo davo da fewa da fa omaadi, ohava pukifa omitima domalai. 19 Osheshi okudulika kweni okwa shiivika kovanhu aveshe; osho nee nde mu hafela ndele nda hala mu kale ovanongo moinima iwa nomalai moinima ii. 20 Ndele Kalunga kombili Oye ota ka nyanyaula diva Satana koshi yeemhadi deni. Efilonghenda lOmwene Jesus Kristus nali kale pamwe nanye.
Omakundifo
21 Timoteus, omulongi mukwetu, ote mu kundu, novakwetu kepata Lukius, Jason naSosipater. 22 Aame Tertius, ou nda shangifwa oshishangwa eshi, ohandi mu kundu mOmwene.
23 Gaius, omwiidilili wange noweongalo alishe ote mu kundu. Erastus, omudiinini woimaliwa yoshilando nomumwatate Kwartus otave mu kundu. 24 Onghenda yOmwene wetu Jesus Kristus nai kale pamwe nanye. Amen.
Efimaneko
25 Hano, ou e neenghono oku mu pameka opavaengeli lange nopaudifo laJesus Kristus, pashiholekwa eshi sha hololwa, osho sha li inashi hololwa momafimbo onale, 26 ndelenee paife osha hololwa nokomishangwa dovaxunganeki pamhangela yaKalunga kaalushe, osha shiivifilwa oiwana aishe okudika eduliko leitavelo, 27 ou Kalunga omunaendunge aeke, omolwaJesus Kristus na fimanekwe fiyo alushe! Amen.
© Oshikwanyama Bible Revised © Bible Society of Namibia, 2008, 2012.
