Okukala kwaJosef meumbo laPotifar
1 Ndele Josef okwa twalwa kuEgipiti, kuPotifar, elenga laFarao, omukulunhu wetanga lovanangeli vaye, omulumenhu Omuegipiti, oo e mu landa momake Ovaismaeli, ava ve mu twala ko. 2 Ndele Omwene okwa kala naJosef nokwa li e na elao moilonga yaye aishe nokwa li ha kala meumbo lamwene waye, Omuegipiti. 3 Ndele omwene waye okwa mona nokutya, Omwene a kala naye nokwe mu wapalekifa keshe eshi e shi longa. 4 Omwene waye okwa li e mu hokwa, nokwa hala a kale he mu longele, nokwe mu lenga elenga leumbo laye, ndele te mu pe oinima aishe momake aye. 5 Ndele okudja kefiku tuu olo ye eshi e mu ninga elenga leumbo laye alishe noloinima yaye aishe, Omwene okwa nangeka noupuna eumbo lOmuegipiti molwaJosef. Heeno, enangeko noupuna lOmwene la li mwaaishe yaye meumbo nomomapya. 6 Ndele ye okwa yandja momake aJosef oinima yaye aishe, nokwa li ehe na oshisho shasha nande, nomungome auke, ou a lya. Ndele Josef okwa li e na ondjelo ya wapala noshipala shiwa.
Ouyuki waJosef
7 Komesho yoinima ei omwalikadi womwene waye okwa lembela Josef omesho, ndele ta ti: “Ila tu nangale.” 8 Ndele ye okwa anya ndele ta ti komwalikadi womwene waye: “Tala, omwene wange ke na ko nasha noinima yomeumbo, ndele ashishe shaye okwe shi yandja mepangelo lange. 9 Meumbo omu ye ke na epangelo li dule lange, ndele ina kelela nge sha, kakele kaave, osheshi ove omwalikadi waye. Ndi dule ngahelipi okuninga owii u fike opo nokunyona kuKalunga?” 10 Ndele ye eshi a popya ngaha naJosef efiku nefiku, ndele ye ine mu uda a nangale puye, opo va nangalafane. 11 Josef eshi e uya efiku limwe okulonga oilonga yomeumbo, eshi paha li omunhu, 12 opo nee ye okwe mu kwata koshikutu ndele ta ti: “Ila u nangale naame.” Ndelenee ye okwa fiya po oshikutu shaye meke laye nokwa faduka po ndele a ya pondje. 13 Opo nee ye eshi a mona nokutya, Josef okwa fiya oshikutu shaye meke laye nokwa ya pondje, 14 okwa ifana ovanhu vomeumbo ndele ta ti kuvo: “Taleni, ye okwe tu etela omulumenhu Omuheberi e tu dine. Ye okwe uya kwaame opo a nangale naame, ndele ame nda ingida pombada, 15 ndele ye eshi a uda nda yelula ondaka nonda ingida, ye okwa fiya pwaame oshikutu shaye ndele a faduka po ta i pondje.” 16 Ndele ye okwa tula oshikutu shaye ponho yaye fiyo omwene waye te uya keumbo. 17 Ndele ye okwe mu lombwela eendjovo odo, ndele ta ti: “Omupiya Omuheberi, ou we tu etela omu okwe uya kwaame a fife nge ohoni, 18 ndele eshi nda yelula ondaka yange nonda ingida, ye okwa fiya po oshikutu shaye pwaame ndele okwa faduka po a ya pondje.” 19 Omwene waye eshi a uda eendjovo domwalikadi waye nokutya: “Osho omupiya woye a ningila nge,” ye okwa handuka unene.
Josef ta tulwa modolongo
20 Ndele omwene waJosef okwe mu kwatifa nokwe mu idililifa modolongo monhele oyo eenghwate dohamba da idililwa mo. Ndele ye okwa kala modolongo. 21 Ndelenee Omwene okwa li naJosef nokwe mu monifila ouwanghenda nokwe mu hokwifa momesho omukulunhu wodolongo. 22 Ndele omukulunhu wodolongo okwa yandja momake aJosef aveshe ava va idililwa mo. Naashishe sha li shi na okuningwa, ye okwe shi ninga. 23 Omukulunhu wodolongo okwa li ehe na ko nasha noinima ei ya kala mepangelo laJosef, shaashi Omwene okwa li pamwe naye. Ndele keshe eshi sha longwa kuye Omwene okwe shi nangeka noupuna.
© Oshikwanyama Bible Revised © Bible Society of Namibia, 2008, 2012.
