Okuuya kwOmhepo Iyapuki Eongalo tali totwa
1 Ndele efiku laPentekoste eshi la fika, vo aveshe ova hangika va ongala monhele imwe. 2 Ndele ohaluka, meulu omwa dja oshihomo ngaashi oshikungulu shinene tashi ende, ndele osha yadifa ondjuwo aishe omu va kala omutumba. 3 Ndele opa monika kuvo omalaka a fa omundilo a tukauka nakeshe limwe tali wile kombada yakeshe umwe womokati kavo. 4 Vo aveshe ova yadifwa Omhepo Iyapuki, ndele ova hovela okupopya omalaka amwe e lili Omhepo ngaashi e va pa oku shi popya.
5 Ndele muJerusalem mwa kala ovalumenhu Ovajuda ovatilikalunga vokoiwana aishe yokoshi yeulu. 6 Ndele oshihomo eshi, eshi sha udika, ongudu yovanhu oya ongala noya kumwa, osheshi keshe tuu ou okwe va uda tava popi elaka lambulavo. 7 Vo aveshe ova haluka va kumwa ndele tava ti: “Taleni, aveshe ava tava popi kave fi Ovagalilea hamba? 8 Ongahelipi hano fye atushe eshi hatu va udu tava popi elaka eli mulo twa dalwa. 9 Fye ava tu li po Ovaparti nOvamedia nOvaelami naava twa kala muMesopotamia novomuJudea nomuKappadokia novomuPontus novomuAsia, 10 novomuFrigia novomuPamfilia novomuEgipiti novomoikandjo oyo yaLibia ya ama kuKireni, nOvaroma ovo va kala omu, nOvajudelela novauyimo mOujuda, 11 nOvakreta nOvajarabia, ofye keshe ou, ohatu mu udu ta popi oilonga inene yaKalunga melaka letu vene.” 12 Vo aveshe ova kumwa ndele va limbililwa va pulafana, tava ti: “Eshi oshishike hano?” 13 Ndele vakwao ve va sheka tava ti: “Vo ova kumwa omaviinyu manyenye.”
Petrus ta udifile ovanhu exunganeko laJoel
14 Opo nee Petrus a fikama naava omulongo naumwe, a yelula ondaka yaye mokule, ndele ta ti kuvo: “Ovalumenhu nye Ovajuda nanye Ovajerusalem amushe, kaleni mu shi shii, nye mu pwilikine eendjovo dange. 15 Osheshi ava inava kolwa, ngaashi nye tamu diladila, ongula nokuli, okafimbo okatitatu, 16 ndele eshi osho tuu osho sha tilwe komuxunganeki Joel:
17 ‘Omomafiku axuuninwa otaku ningwa,
Kalunga osho ta ti:
Ame ohandi tilile kombada yombelela aishe Omhepo yange,
novana veni ovamati novana veni oukadona otava xunganeke,
novanyasha veni tava ka mona omamoniko,
novaxungu veni otava ka twa eendjodi.
18 Heeno, nokombada yovapiya vange ovalumenhu novakainhu
ohandi tilile ko Omhepo yomOmhepo yange omomafiku enya,
ndele vo otava ka xunganeka.
19 Ndele handi holola oikumwifa pombada keulu
nomadidiliko kombada yedu:
ohonde nomundilo noilemo yomwifi.
20 Etango otali shituka omilaulu,
ohani ohonde,
efiku olo linene lOmwene la fimana fimbo inali fika.
21 Ndele taku ningi, keshe tuu ou ta ifana edina lOmwene ota ka xupifwa.’
22 “Ovalumenhu nye Ovaisraeli, pwilikineni eendjovo edi: Jesus Omunasareti, omulumenhu tuu ou mwe mu hepaululilwa kuKalunga moilonga yeenghono nomoinyengandunge nomomadidiliko oo Kalunga e mu longifa mokati keni, ngaashi nye vene mu a shii, 23 Oye tuu ou e mu yandjelwa ketokolo loshito nokonuno ei, Kalunga kwa li e i kwete nale, nye omwe mu valelifa komushiyakano nomwe mu dipaifa komake aavo inava shiiva omhango. 24 Oye ou Kalunga okwe mu nyumuna ndele okwe mu mangulula mouyehame wefyo, ngaashi efyo laha la li neenghono oku mu kwatelela mo.
25 Osheshi David te mu tongo:
‘Alushe handi mono Omwene koshipala shange,
osheshi Oye e li kolulyo lange,
ndiha tengauke.
26 Onghee tuu omutima wange u nehafo
nelaka lange tali nyakukwa,
nolutu lange tali tulumukwa meteelelo.
27 Osheshi omwenyo wange Ove ito u efele moshovafi
nOmuyapuki woye ito mu efa a mone eolelo.
28 Osheshi Ove ho shiivifile nge eendjila domwenyo,
oto ka yadifa nge ehafo lokoshipala shoye.’
29 “Ovalumenhu nye ovamwatate, efeni, ndi mu lombwele nouladi, ndi popye tatekulu David, ye okwa fya, ndele okwa pakwa, ombila yaye oi li nonena eli mokati ketu. 30 Ndele oye eshi a li omuxunganeki, okwa li e shi shii Kalunga e mu anenene eano nokutya, umwe womoludalo laye e nokukala omutumba kolukalwa laye louhamba. 31 Hano mokutala komesho okwa popya enyumuko laKristus, eshi ta ti: ‘Omwenyo waye inau fiwa mo moshovafi, nombelela yaye inai mona eolelo.’ 32 Jesus Oye tuu ou Kalunga okwe mu nyumuna, nafye atushe eendobwedi doshinima eshi. 33 Hano eshi a kala kolulyo laKalunga, a yelulilwa ko, okwa pewa kuXe Omhepo Iyapuki, ou a udanekelwa, Ye okwe mu tilila, Oye ou mwe mu mona nomwe mu uda. 34 Osheshi David haye a londele meulu, ndelenee ye mwene ota ti:
‘Omwene okwa lombwela Omwene wange:
Kala omutumba kolulyo lange,
35 fiyo handi ningi ovatondi voye
oshilyatelo shokeemhadi doye.’
36 “Hano eumbo alishe laIsrael nali shiive shili, Jesus tuu ou, mwe mu valela komushiyakano, Kalunga okwe mu ninga Omwene naKristus.”
Ovanhu omayovi atatu tava shashwa
37 Ndelenee vo eshi ve di uda, ode va twa komitima, ndele ova tya kuPetrus nokovayapostoli vakwao: “Ovalumenhu nye ovamwatate, fye otu nokuninga ngahelipi!” 38 Ndele Petrus okwa tya kuvo: “Lidilululeni, nakeshe ou ne lishashifile medina laJesus Kristus, mu diminwe po omatimba eni, ndele nye otamu ka pewa oshiyandjwa shOmhepo Iyapuki. 39 Osheshi omaudaneko aa e mu udanekelwa onye vene novana veni, naaveshe venya ve li kokule, ovo aveshe Omwene Kalunga ketu te ke va ifana.” 40 Ndele neendjovo dihapu di lili ye a hepaulula nokwe va kumaida ta ti: “Liyandjeni nye mu xupifwe mo moludalo eli la pilalala.” 41 Hano ava va tambula nehafo eendjovo daye ova shashwa, mefiku olo mwa wedelwa mo ovanhu ve fike pomayovi atatu.
Eongalo lotete
42 Ndele vo ova diinina okukala melongo lovayapostoli nomekwatafano lavo, nomokupambula omungome nomokwiilikana. 43 Ndele eemwenyo daaveshe da hangika ketilo, novayapostoli va longa oinyengandunge noilongadidiliko. 44 Ndele aveshe ava va itavela ova kala kumwe, nemona lavo ove li tula mumwe. 45 Ndele ova landifa po omapya avo noinima yavo, nove i tukulila aveshe opaemhumbwe dakeshe. 46 Ndele momafiku aeshe ova kala nomutima umwe motembeli nomomaumbo, va pambula omungome ndele ova lile eendja davo nehafo nomitima da yela, 47 ova hambelela Kalunga nova li ve nonghenda iwa novanhu aveshe. Keshe efiku Omwene a wedela mo mongudu yavo ava tava xupifwa.
© Oshikwanyama Bible Revised © Bible Society of Namibia, 2008, 2012.
