Ovajuda nOvasimeon tava taataa Ovakaanan
1 Ndele konima yefyo laJosua, ovana vaIsrael va pula kOmwene ndele tava ti: “Olyelye womufye e nokufikama tete a ka lwife Ovakaanan?” 2 NOmwene okwa tya: “Juda e nokufikama tete. Taleni, Ame ohandi yandje oshilongo momake aye.” 3 Opo nee Juda ta ti komukulu waye Simeon: “Tu ye pamwe moshitukulwa shange, opo tu shiive okulwifa Ovakaanan, opo nee naame yo ohandi ka ya pamwe naave moshitukulwa shoye.” Ndele Simeon okwa ya pamwe naye. 4 Ndele Juda okwa ya, nOmwene okwa yandja momake aye Ovakaanan nOvaperesi, ndele va taataa ovalumenhu omayovi omulongo vomuvo muBesek. 5 Ndele va shakena naAdoni-Besek muBesek, ndele ve mu lwifa, ndele va taataa Ovakaanan nOvaperesi. 6 Ndele Adoni-Besek eshi a ya onhapo, vo ove mu shikula, ndele ve mu kwata, ndele va teta ominwe daye dakula dokomake nominwe daye dakula dokeemhadi. 7 Opo nee Adoni-Besek ta ti: Eehamba omilongo heyali odo da tetwa ominwe dokomake nominwe dokeemhadi, oda toola oundjaumukile koshi yoshitaafula shange shoshililo. Ngaashi ame nda ningile, osho Kalunga a ningila nge. Ndele ve mu twala kuJerusalem, noko a fila.
8 Novana vaJuda va homona Jerusalem, ndele ve shi nangala, noonakukalamo ve va dipaa neongamukonda ndele va xwika po oshilando. 9 Ndele konima ovana vaJuda va fikama va ka lwife Ovakaanan, ava va kala keemhunda, nomoshilongo shoumbangalanhu nomedu la lalakana. 10 Juda okwa homona Ovakaanan, oonakukalamo muHebron (edina laHebron la li nale Kiriat-Arba), ndele va taataa Sesai naAhiman naTalmai. 11 Ndele ye okwa dja ko nokwa ya a ka homone oonakukalamo muDebir (edina laDebir la li nale Kiriat-Sefer). 12 Ndele Kaleb ta ti: “Ou ta teya Kiriat-Sefer ndele te shi nangala, ame handi mu pe omona wange okakadona Aksa, a ninge omwalikadi waye.” 13 Opo nee Otniel yaKenas, ondenge yaKaleb e shi nangala. Ndele ye okwe mu pa omona waye okakadona Aksa a ninge omwalikadi waye. 14 Ndele Aksa eshi e uya, ye okwe mu heka, a pule kuxe epya. Ndele ye eshi a londoloka kokandongi, Kaleb okwe mu pula: “Wa hala shike?” 15 Ndele ye ta ti kuye: “Pe nge oshali. Osheshi ove wa pa nge edu likukutu, u nokupa nge eefifiya.” Opo nee Kaleb e mu pa eefifiya keemhunda nomefilu.
16 Ndele ovana vOmukeni, haukwe waMoses, ova fikama pamwe novana vaJuda moshilando shomilunga kombuwa yaJuda, yo i li koumbuwanhu waArad. Ndele ye okwa ya ko ndele a kala mokati kovanhu. 17 Ndele Juda okwa fikama pamwe nomukulu waye Simeon, ndele va taataa Ovakaanan, ava va kala muSefat, ndele ve shi hanauna po. Onghee va luka oshilando Horma. 18 Ndele Juda okwa nangala Gasa nomikunda dasho naAskelon nomikunda dasho naEkron nomikunda dasho. 19 NOmwene okwa li pamwe naJuda, onghee ye okwa nangala eemhunda. Ndelenee oonakukala vomomaluhaela ye a nyengwa oku va taataa shaashi vo va li ve nomatemba oivela. 20 Ndele va pa Kaleb Hebron ngaashi sha tongwa kuMoses. Ndele ye okwa taataa mo ovana vaAnak vatatu. 21 Novana vaBenjamin inava taataa mo Ovajebusi, oonakukalamo muJerusalem, onghee hano Ovajebusi va kala pamwe novana vaBenjamin muJerusalem fiyo onena eli.
Ovakaanan vamwe inava tewa mo
22 Neumbo laJosef ola fikama yo va ye kuBetel, nOmwene okwa kala pamwe navo. 23 Neumbo laJosef eshi la lava Betel (edina loshilando la li nale Lus) 24 eendadi da mona omulumenhu umwe ta di mo moshilando ndele tadi mu lombwele: “Tu ulikila apa pa heva okupumina moshilando, opo hatu ku filonghenda.” 25 Ye okwe va ulikila apa pa heva okupumina moshilando. Ndele va dipaa neongamukonda oonakukalamo moshilando. Ndelenee omulumenhu winya nepata laye alishe ve li efa. 26 Nomulumenhu okwa dja mo nokwa ya moshilongo shOvaheti nokwa tunga oshilando nokwe shi luka Lus. Olo edina lasho fiyo onena eli.
27 Ndele Manasse ina taataa Betshan naTaanak naDor naJibleam naMegido nomikunda domoushiinda dOvakaanan. NOvakaanan tava dulu okukala moshilongo. 28 Ndelenee Ovaisraeli eshi va ninga eenghono, ova fininika Ovakaanan oku va longela. Vo inave va taataa mo shekesheke.
29 Ndele Efraim ina taataa mo Ovakaanan, oonakukalamo muGeser. Onghee hano Ovakaanan va kala mokati kavo muGeser.
30 Sebulon ina taataa mo oonakukalamo muKitron noonakukalamo muNahalol. Onghee hano Ovakaanan va kala mokati kavo. Ndelenee vo va fininikwa oku va longela.
31 Asser ina taataa mo oonakukalamo muAkko noonakukalamo muSidon nomuAglab nomuAksib nomu Helba nomuAfik nomuRehob, 32 onghee hano Ovaasseri va kala mokati kOvakaanan, ovanhu vomoshilongo, osheshi inave va taataa mo.
33 Naftali ina taataa mo oonakukalamo muBet-Semes noonakukalamo muBet-Anat, onghee ye a kala mo mokati kOvakaanan, ovanhu vomoshilongo. Ndelenee oonakukalamo muBet-Semes naBet-Anat, va fininikwa oku va longela. 34 NOvaamori va undwila ovana vaDan keemhunda, osheshi inave va efa okuuya medu la lalakana. 35 NOvaamori va kala muHar-Heres nomuAijalon nomuSaalbim. Ndelenee eke leumbo laJosef le va fininika ndele ve va longela.
36 Nongaba yOvaamori ya dja kuAkrabim, kemanya laSela ndele tai londo okudja kuShela.
© Oshikwanyama Bible Revised © Bible Society of Namibia, 2008, 2012.
