Oihondamenolando ihamano
1 NOmwene okwa popya naJosua ndele ta ti: 2 “Lombwela ovana vaIsrael u tye: ‘Litongoleleni oihondamenolando Ame nde i mu lombwelifile Moses, 3 opo ou a dipaa omunhu mokupapala, a shiive okuya mo onhapo, opo yo i kale eenhele dokuhondama omolwomupuli wetimba. 4 Ye eshi ta i onhapo hano moshilando shimwe shomoilando oyo, ndele ta kala ofika poshivelo shoshilando ndele ta shiivifile ovakulunhu voshilando eendjovo daye, vo ve noku mu tambula puvo moshilando noku mu pa onhele, opo a shiive okukala puvo. 5 Nomupuli wetimba ngeenge te mu shikula, vo vaha yandje kuye omunhu ou a dipaa mukwao mokupapala, ye eshi ine mu tonda shito. 6 Na kale mo moshilando osho fiyo a tokolwa koshiongalele, fiyo okefyo lomupristeli omukulunhu, ou a li po pefimbo linya. Opo nee ou a dipaa ta dulu okushuna moshilando shaye nomeumbo laye, koshilando oko a dile onhapo.’ ” 7 Opo nee va tongola Kedes muGalilea keemhunda daNaftali naSekem keemhunda daEfraim naKiriat-Arba nokutya, Hebron keemhunda daJuda. 8 Ndele kombada yaJordan moushilo waJeriko, va tongola: Beser mombuwa yomedu la lalakana lopombada shomepata laRuben, naRamot naGilead, shomepata laGad, naGolan muBasan shomepata laManasse. 9 Oyo hano oilando ya tongolelwa ovana aveshe vaIsrael nomunailongo ou ta kala mokati kavo, opo keshe ou a dipaa omunhu mokupapala ta dulu okuhondama mo, ndele ita dipawa keke lomupuli wetimba, fimbo ina kala ofika moipafi yoshiongalele shovatokoli.
© Oshikwanyama Bible Revised © Bible Society of Namibia, 2008, 2012.
