2 OMAFIMBO 18 - Oshikwanyama Bible (OKYB)

Ahab naJosafat tava lwifa Aram

1 Ndele Josafat eshi a yada oupuna nefimano, okwa ninga oshitenya shaAhab. 2 Ndele eshi pa pita omido dimwe, okwa ya kuAhab kuSamaria, ndele Ahab okwe mu tomena novakwaita vaye ovo va li puye, eedi neengobe dihapu. Ndele Ahab okwe mu heka a ye naye okuhomona Ramot shomuGilead. 3 Ndele Ahab, ohamba yaIsrael, ya lombwela Josafat, ohamba yaJuda, tai ti: “Hatu i tuu pamwe naave kuRamot shomuGilead?” Nokwe i nyamukula: “Aame ongaashi ove, noshiwana shange ongaashi shoye. Ohatu ka ya pamwe naave koita.” 4 Josafat okwa lombwela vali ohamba yaIsrael, ta ti: “Ndelenee pula tete ondjovo yOmwene.” 5 Opo nee ohamba yaIsrael ya ifana ovaxunganeki, ve fike pomafele ane ndele tai va pula: “Nandi ka homone tuu Ramot shomuGilead ile nandi shi efe?” Ndele venya va nyamukula: “Inda, u ke shi homone, osheshi Kalunga ote ku pe efindano.” 6 Ndelenee Josafat ta ti: “Kape na vali omuxunganeki umwe e tu pulile kOmwene?” 7 Ahab okwa nyamukula, ta ti: “Oku na vali umwe, Mikaia yaJimla, ndelenee ame ohandi mu tondo, osheshi ye ita xunganekele nge nande ouwa, ndelenee alushe owii.” Josafat okwa nyamukula: “Ino popya ngaho!” 8 Opo nee ohamba yaIsrael ya ifana elenga layo ndele tai ti: “Inda u ka tale ko diva Mikaia yaJimla.”

9 Fimbo ohamba yaIsrael naJosafat, ohamba yaJuda, keshe imwe ya kala omutumba kolukalwapangelo layo, ndele da li da djala oikutu youhamba koshipale poshivelo shaSamaria, novaxunganeki aveshe tava xunganeke moipafi yado, 10 Sedekia yaKenaana okwe li ningila eembinga doshivela ndele ta ti: “Omwene ta ti ngaha: ‘Naadi ove to ka twa Ovaarami fiyo we va mana po.’ ” 11 Novaxunganeki aveshe osho va xunganeka ndele tava ti: “Fikama u homone Ramot shomuGilead, ndele to ka mona elao, nOmwene ote ke shi yandja momake ohamba.” 12 Opo nee omutumwa ou a ya a ka tale Mikaia, okwe mu lombwela: “Tala, ovaxunganeki aveshe va xunganekela ohamba ouwa. Ondjovo yoye yo nai kale ngaashi eendjovo davo, u xunganeke oinima iwa.” 13 Ndelenee Mikaia ta ti: “Oshili, ngaashi Omwene e nomwenyo, oshili, osho Kalunga te shi lombwele nge, osho handi ka popya!”

14 Eshi e uya kohamba, ohamba tai ti kuye: “Mikaia, fye naJosafat, natu ka homone tuu Ramot shomuGilead ile ahowe?” Ndele ye ota nyamukula: “Heeno, homoneni, osheshi oshili tamu ka findana; Omwene ote mu pe efindano.” 15 Nohamba Ahab tai ti kuye: “Nge to popi naame medina lOmwene, popya oshili. Olungapi ndi na oku ku lombwela?” 16 Opo nee a nyamukula: “Ame nda mona Ovaisraeli aveshe va halakanifwa keemhunda ngaashi eedi dihe namufita. NOmwene okwa tya: ‘Vo vehe na vali omuwiliki, nava shune nombili komaumbo avo.’ ” 17 Opo Ahab okwa tya kuJosafat: “Inandi ku lombwela kutya, winya iha xunganekele nge ouwa, alushe owii ashike?” 18 Mikaia ta ti vali: “Pwilikina ondjovo yOmwene, eshi ta ti: Ame nda mona Omwene e li omutumba kolukalwapangelo laye meulu, novaengeli aveshe va kala ofika puye. 19 NOmwene okwa pula: ‘Olyelye ta ka weweleka Ahab, opo a ka homone ye a ka file muRamot?’ Ndele ovaengeli ova nyamukula shi lili nashi lili. 20 Opo nee omhepo ye uya pOmwene, ndele ya tya: ‘Ame ohandi ka weweleka Ahab.’ NOmwene okwa pula: ‘Ngahelipi?’ 21 Ndele omhepo oye mu lombwela: ‘Ame ohandi ka ya ndi ninge omhepo yoipupulu momakanya ovaxunganeki vaye aveshe.’ Ndele Omwene okwe mu lombwela: ‘Inda u ke mu weweleke, osheshi oto ka findana.’ 22 Ndele Mikaia okwe mu lombwela, ta ti: ‘Eshi sha ningwa osheshi Omwene okwa ninga ovaxunganeki voye ve ku fufye, ashike Ye mwene okwa tokola e ku tumine omupya.’ ” 23 Opo nee Sedekia a yambuka nokwa denga Mikaia enghava moshipala, nde ta ti: “Onaini hano Omhepo yOmwene ya dja mo mwaame i uye i popye mwoove?” 24 Ndele Mikaia okwa nyamukula: “Tala, ove oto ke shi mona shito mefiku to ka hondama meendjuwo kofindo.” 25 Ndelenee ohamba Ahab ya lombwela elenga: “Kwateni Mikaia, mu mu twale kuAmon, ngoloneya woshilando, nokuJoas, omona wohamba. 26 Ndele u noku va lombwela ve mu tule modolongo, vo ve mu pe omungome nomeva ongaho, fiyo ame handi aluka inandi mona oshiponga.” 27 Mikaia okwa nyamukula: “Ngeenge to aluka ino mona oshiponga, otashi ti Omwene ina popya mwaame.” Nokwa tya vali: “Keshe umwe na ude eshi nda popya!”

28 Opo nee ohamba yaIsrael naJosafat, ohamba yaJuda, da ya kuRamot shomuGilead. 29 Nohamba yaIsrael ya lombwela Josafat: “Ame ohandi djalulula, ndi lidimbike ndele handi ka ya kolwoodi.” Ove kala po wa djala oshikutu shoye shouhamba. Ohamba yaIsrael ya djalulula ndele tai i kolwoodi. 30 Nohamba yaAram ya li ya lombwela ovakulunhu vomatemba oita ndele tai ti: “Inamu lwifa vamwe ve lili, ngeenge elenga ile omufyoona, lwifeni ohamba yaIsrael aike.” 31 Novakulunhu vomatemba oita eshi va mona Josafat, ova diladila: “Oye ohamba yaIsrael,” ndele va hovela oku mu lwifa. Opo nee Josafat okwa kuwa. Omwene okwe mu kwafa, naKalunga okwe va heka po, va dje po puye. 32 Ovakulunhu vomatemba oita eshi va mona nokutya, winya ke fi ohamba yaIsrael, ova dja po puye. 33 Ndelenee omulumenhu umwe, ou a li a shila outa waye ina shoneka, okwa yasha ohamba yaIsrael pokati komwiya noshivela shoponhulo. Opo nee oya lombwela omushingi wetemba layo: “Alula etemba, u kufe nge molwoodi, osheshi nda yashwa.” 34 Ndele efiku olo olwoodi la ninga linene, onghee hano ohamba yaIsrael ya kala ofika metemba layo nokutaalela Ovaarami fiyo onguloshi. Pokuningina kwetango oya fya.