Okuxupifwa kwaJerusalem
1 Nohamba Hiskia eshi ye shi uda, oya pombaula oikutu yayo ndele tai djala oikutu yeefya, ndele tai i mongulu yOmwene. 2 Opo nee ye a tuma komuxunganeki Jesaja yaAmos Eliakim, elenga leumbo lohamba naSebna, omushangi, novakulunhu vomovapristeli, va djala oikutu yeefya. 3 Ndele vo otava ti kuye: “Hiskia ta ti ngaha: Efiku eli, olo efiku loudjuu nolehandu nolesheko. Osheshi ounona ve uya poshivelo shoshidalelo, ndelenee kape neenghono dokudala. 4 Kashiimba Omwene Kalunga koye ta udu eendjovo adishe daRabsake, ou a tumwa komwene waye, ohamba yaAsiria, opo a sheke Kalunga, ndele Ye ote mu handukile omolweendjovo odo Omwene Kalunga koye a uda. Yelula hano eindilo molwoshixupe osho shi li po natango.” 5 Ndele ovapiya vohamba Hiskia eshi ve uya kuJesaja, 6 Jesaja ta ti kuvo: “Omwene weni, mu lombweleni: ‘Omwene osho ta ti: Ino tila eendjovo odo we di uda, da shekifwa nge kovapiya vohamba yaAsiria. 7 Tala, Ame ohandi ke mu pa omhepo, nokutya ta udu eenghundana, ndele ta shuna koshilongo shaye, ndele Ame ohandi ke mu dipaa neongamukonda moshilongo shaye.’ ”
8 Opo nee Rabsake a shuna, ndele ta hange ohamba yaAsiria tai lwifa Libna, osheshi okwa li, a uda nokutya, yo ya dja muLakis. 9 Ndele ye eshi a uda Tirhaka, ohamba yaEtiopia, taku tiwa: “Ye okwa fikama e ku lwife,” okwa tumununa ovatumwa kuHiskia nondaka tai ti: 10 “Ka lombweleni Hiskia, ohamba yaJuda, mu tye: ‘Ino shiivika oulai kuKalunga koye, ou we mu lineekela, eshi to ti, Jerusalem itashi yandjwa momake ohamba yaAsiria. 11 Tala, ove mwene wa uda, eshi eehamba daAsiria da ningila oilongo aishe ndele de i teya po. Oove ngeno u xupifwe? 12 Oikalunga yoiwana oyo ya hanaunwa po kutate, oye i xupifa ngeno, Gosan naHaran naResef novana vaEden sha li muTelassar? 13 Ohamba yaHamat oi li peni? Nohamba yaArpad nohamba yoshilando shaSefarvaim, noyaHena noyaIva, oi li peni?’ ”
14 Hiskia eshi a tambula onhumwafo oyo momake ovatumwa nokwe i lesha, ye okwa ya mongulu yOmwene. Ndele Hiskia okwe i yala koshipala shOmwene. 15 Ndele Hiskia okwa indila koshipala shOmwene ndele ta ti: “Omwene, Kalunga kaIsrael, Ove ho kala omutumba kovakerubi, Oove auke Kalunga koilongo aishe yokombada yedu. Ove wa shita eulu nedu! 16 Akutu Omwene, ameka okutwi kwoye, ove u ude ko. Pashula omesho oye, Omwene, u tale. Ndele uda eendjovo daSanheerib, ou a tuma okusheka Kalunga omunamwenyo! 17 Oshili, Omwene eehamba daAsiria oda hanauna po oiwana noilongo yayo, 18 noikalunga yayo ya xwikwa momundilo, osheshi kai li oikalunga ndelenee oilonga yomake ovanhu, oshiti nemanya. Onghee hano odo da dula oku i hanauna po. 19 Tu xupifa, Omwene Kalunga ketu, momake ayo, opo oilongo aishe yokombada yedu i shiive nokutya, Oove Omwene auke Kalunga kashili.”
20 Opo nee Jesaja yaAmos a tuma kuHiskia, ta ti: “Omwene Kalunga kaIsrael ta ti ngaha: ‘Osho we shi indila nge omolwaSanheerib, ohamba yaAsiria, Ame nde shi uda.’ 21 Ondjovo ei, Omwene e i tongela Hiskia:
‘Okakadona kaSion take ku dini, take ku sheke.
Omona okakadona kaJerusalem
otake ku lipukaapukile komutwe.
22 Olyelye ou, ove we mu dina nowe mu tuka?
Nondaka yoye we i yelulila lyelye?
Nomesho oye we a dakamena
melituleko kOmuyapuki waIsrael!
23 Ove wa tukifa Omwene kovatumwa voye
ndele wa tile: “Nouhapu womatemba ange
ame nda londa keenhele deemhunda,
keexulo daLibanon,
ndele ame nda ka omisederi dayo dile dinene,
nomisipresi dayo da hoololwa onde di ka,
ndele nda pita nda ya fiyo okouxulonyonyo wayo,
nomuulu wayo ou u li ngaashi oshikunino.
24 Ame nda xupa mo ndele nda nwa mo omeva omoilongo,
neemhadi dange nda pwiininifa omilonga adishe domuEgipiti.”
25 ‘Ino shi uda?
Ame nde shi lilongekidila nale
nonde shi litokolela momafiku onale?
Paife onde shi wanifa nokutya,
oilando yoye yeehotekuma
ove u i ninge eenduba dongaho,
26 noonakukalamo muyo ova ngonopala,
va haluka ndele va kala va lengwa.
Vo va li ngaashi oimeno italala yomoixwa,
nongaashi omwiidi tai mene keenduda,
nonhimba fimbo inai kula.
27 ‘Ndelenee okukala omutumba kwoye
nokudja po kwoye nokuuya mo kwoye
ondi ku shii nonhumbi ho tukulukile nge.
28 Shaashi ove ho tukulukile nge,
ndele ounhwa woye wa fika momatwi ange,
onghee hano nda hala ndi xwekele ongona meyulu loye
noshitomo mokanya koye
ndele handi ku shunifa nondjila oyo we uya nayo.
29 ‘Ndele oshinima eshi tashi ka kala edidiliko kwoove: Neudo eli, lyeni, eshi tashi mene shoovene, ndele momudo omutivali osho tashi mene natango. Ndelenee momudo omutitatu, kuneni, nye mu teye, twikeni oikokola yomiviinyu nye mu lye eeviinyu dayo. 30 Opo nee ovaxupifwa vomeumbo laJuda, ava va xupa po, tava ka twamifa omidi davo medu, ndele tava ka imika oiimati pombada, 31 osheshi muJerusalem tamu ka dja oshixupe, novaxupifwa komhunda yaSion.”
Ouladi wOmwene womatanga ovakwaita tau ke shi ninga.
32 “Onghee hano Omwene ta ti mokupopya ohamba yaAsiria: Yo itai uya mo moshilando eshi, ndele itai umbile mo oshikuti, yo itai shi totele nande noikelelifo, ndele itai tungu ko omatelendja. 33 Nondjila tuu oyo e uya nayo, yo i nokushuna. Ndelenee moshilando tuu eshi yo itai ke uya mo nande. 34 Ndele Ame ohandi ka amena oshilando eshi, ndi shi xupife omolwange mwene nomolwomupiya wange David.’ ”
Enyonauko lomatanga ovakwaita vaSanheerib
35 Ndele oufiku tuu winya omweengeli wOmwene e uya nokwa dipaa monhanda yOvaasiria ovalumenhu omayovi efele nomilongo hetatu naatano. Nongula eshi kwa sha ndele va penduka, aveshe va li oimhu ihe nomwenyo. 36 Ndele Sanheerib, ohamba yaAsiria, oya fikama ndele tai i, tai shuna ndele ya kala muNinive. 37 Ndele yo eshi ye linyongamena motembeli yaNisrok, ovana vayo ovamati Adrammelek naShareser, ve mu dipaa neongamukonda. Ndelenee va ya onhapo koshilongo shaArarat. Nomona waye omumati Esar-Haddon okwa ninga ohamba ponhele yaye.
© Oshikwanyama Bible Revised © Bible Society of Namibia, 2008, 2012.
