Oshitukulwafyuululo shovana oukadona vaSelofhad
1 Opo nee ovana oukadona vaSelofhad yaHefer yaGilead yaMakir yaManasse, womepata laManasse yaJosef, ova ehena po. Omadina ovana oukadona aa: Mahla, Noa naHogla naMilka naTirsa, 2 ndele ova ka kala ofika moipafi yaMoses noyomupristeli Eliaser noyovakulunhu noyeongalo alishe poshivelo shetwali leongalo, ndee tava ti: 3 “Tate yetu okwa fila mombuwa, ndele ye ina kala meengudu daava va ongalela okutwila Omwene ondubo, meengudu daKora, ndelenee ye okwa fila omatimba aye mwene, ndele ye okwa li ehe novana ovamati. 4 Omolwashike edina latate tali ka dimwa po mepata laye, shaashi ye okwa li ehe novana ovamati? Tu peni oshitukulwa mokati kovamwaina vatate ovalumenhu.”
5 Opo nee Moses okwa twala eendjovo davo koshipala shOmwene. 6 NOmwene okwa popya naMoses ndee ta ti: 7 “Ovana oukadona vaSelofhad ova popya da yuka. Ove u noku va pa shili oshitukulwafyuululwa mokati kovamwaina vaxe ovalumenhu oshitukulwafyuululwa shaxe nashi ninge shavo. 8 Ndele lombwela ovana vaIsrael u tye: Umwe ngeenge ta fi ehe nomona omumati, nye mu nokupa omona okakadona oshitukulwafyuululwa shaye ovamwaina vaxe ovalumenhu. 9 Ndele ngeenge ye ke nomona okakadona, nye mu nokupa oshitukulwafyuululwa shaye ovamwaina vaxe ovalumenhu. 10 Ndele ngeenge ke novana ovamati, nye mu nokupa oshitukulwafyuululwa shaye ovamwaina vaxe ovalumenhu. 11 Ndele xe ngeenge ke novamwaina ovalumenhu, nye mu nokupa oshitukulwafyuululwa shaye omukwaoelela womepata laye, ndee ye e noku shi tambula ngaashi oshipangelwa shaye. Ndele eshi shi nokukala oshiyukifwanghedimhango shovana vaIsrael, Omwene ngaashi a lombwela Moses.”
Josua ta tulwa moukulunhu
12 Ndele Omwene okwa popya naMoses ndee ta ti: “Londa komhunda ei yaAbarim u tale edu olo Ame handi li pe ovana vaIsrael. 13 Ndele ngeenge we li mono, naave yo oto ka ongelwa kovakwanepata voye ngaashi omumwanyoko Aron a ongelwa ko. 14 Shaashi eshi mwa li mombuwa yaSin okukonga omeva, eongalo fimbo la twa eemhata mwa twilile nge ondubo nye inamu fimaneka nge moipafi yavo.” Oo omeva aMeriba puKades mombuwa yaSin.
15 Opo nee Moses okwa popya nOmwene, ndee ta ti: 16 “Omwene, Kalunga keemhepo dombelela aishe na tule kombada yeongalo omulumenhu umwe, 17 ou te va kwatele komesho mokupita kwavo nokuya mo kwavo te va kufa mo note va twala mo, eongalo lOmwene liha kale ngaashi eedi dihe nomufita.” 18 Opo nee Omwene okwa lombwela Moses ndee ta ti: “Kufa Josua yaNun, omulumenhu e nOmhepo. Ndele tenheka eke loye kombada yaye, 19 u mu kaleke koshipala shomupristeli Eliaser nomoipafi yeongalo alishe, ndele mu nangeka moshilonga shaye moipafi yavo. 20 Ndele muye tula mo sha shomoukulunhu woye, opo eongalo alishe lovana vaIsrael tali shiiva okudulika kuye. 21 Ndele ye e nokukala ofika koshipala shomupristeli Eliaser, opo ye e ku pulile muUrim enyamukulo laKalunga koshipala shOmwene. Kelombwelo laye vo va dje po nokelombwelo laye vo ve nokuuya mo, ye novana aveshe vaIsrael pamwe naye neongalo alishe.”
22 Ndele Moses osho a ninga Omwene ngaashi e mu lombwela; ye okwa kufa Josua nokwe mu kaleka koshipala shomupristeli Eliaser nomoipafi yeongalo alishe, 23 ndele ye okwa tenheka kuye omake aye nokwe mu nangeka moshilonga, Omwene ngaashi a popya noku shi lombwela Moses.
© Oshikwanyama Bible Revised © Bible Society of Namibia, 2008, 2012.
