Ovajuda tava hokololifa Paulus koshipala shaFeliks
1 Ndele eshi pa pita omafiku atano, omupristeli omukulunhu Ananias pamwe novakulunhu vamwe, omupopili waye Tertullus, e uya muKesarea nova shiivifila omupangeli woshilongo, kutya ova hala okuhokololifa Paulus. 2 Ndele eshi a ka talwa ko, Tertullus okwa hovela oku mu hokololifa ta ti: “Feliks omufimanekwa munene, fye otu nombili ihapu molwoye. Okefiloshisho loye lihapu oshiwana eshi osha mona omalundululo mawa eenghedi, 3 oshinima eshi hatu hepaulula alushe naakushe noku ku pandula. 4 Ndele ndiha mane po efimbo, ohandi ku ilikana, u tu pwilikine kanini, omolwonheni yoye. 5 Omulumenhu ou otwe mu koneka, oye a fa oudu wolutapo nomupiyaaneki mokati kOvajuda aveshe mounyuni aushe, nomwene woshimhanga shOvanasareti. 6 Ye okwa hetekela yo okunyateka otembeli yetu. Fye otwe mu kwata notwa hala tu mu tokole pamhango yetu vene, 7 ndelenee omuneyovi Lisias okwe uya ndele te mu kufa momake etu keenghono daye dihapu 8 ndele okwa lombwela ovahokololifi vaye ve nokuuya koshipala shoye. Hano ove oto dulu oku mu pwilikina, u shiive oinima ei hatu i mu hokololifa.” 9 Ndele Ovajuda ova ya meendjovo edi dokuhokololifa ndele tave di pameke.
Elipopilo laPaulus
10 Ndele omupangeli woshilongo okwa aneka Paulus a popye, nde ta ti: “Eshi ndi ku shii, ove owa kala omido dihapu omutokoli woshiwana eshi, ohandi lipopile ndi nelineekelo. 11 Ove ngaashi u shi shii, omafiku omulongo naavali aeke a pita po, eshi nda ya kuJerusalem okwiilikana. 12 Ndele vo inava hanga nge nda twa eemhata nande onalyelye, ile nda lumbakanifa ovanhu, motembeli ile moshinagoga ile moshilando. 13 Ndele itava dulu oku ku etela omatomhelo oinima ei tave i hokololifa nge paife. 14 Ndele ohandi ku hepaululile, ohandi longele Kalunga kootate kondjila ei, tava ti oyo oshimhanga, eshi nda itavela inya aishe ya shangwa momhango nomovaxunganeki, 15 nondi neteelelo olo lomuKalunga, navo vene ngaashi ve li kwete yo, nokutya, otaku ka kala enyumuko lovayuki nolovalunde. 16 Onghee naame yo ohandi kondjo shili ndi kale alushe ndi neliudo lihe noshipo puKalunga nopovanhu.
17 “Ndelenee eshi pa pita omido dihapu, onde uya ndi etele oshiwana shetu oikwafa nondi yambe omayambo. 18 Ndele fimbo nda li handi longo ei, Ovajuda vamwe vomuAsia ova mona nge motembeli, nda li nde liyelifa, ndele kamwa li nande eefina dovanhu ile ekulukuto. 19 Venya ngeno ve nokukala koshipala shoye nokuhokololifa nge, ngeenge ova mona nge nda nyona, 20 ile ava ve li po, nava tonge ngeenge onda nyona sha, eshi nda li nda kala ofika koshipala shoshiongalele shovakulunhu. 21 Ondjovo imwe aike shapu, eshi nda popya pombada mokati kavo: ‘Ame handi hokololifwa nena molwenyumuko lovafi.’ ”
Paulus ta fiwa modolongo
22 Ndele Feliks ou kwa li e shii nawa omalongo ondjila ei, okwa mweneka manga eendjovo davo ndele ta ti: “Omuneyovi Lisias ngeenge e uya, onda hala okupwilikina naanaa eendjovo deni.” 23 Ndele ye okwa lombwela omunefele, Paulus a nangelwe, ye ina nangelwa unene, vakwao vaha kelelwe oku mu talela po noku mu yakula. 24 Ndele eshi pa pita omafiku amwe, Feliks e uya pamwe nomukainhu waye Drusila, Omujuda, nokwa ifana Paulus, ndele ta pwilikine eendjovo daye deitavelo lokwiitavela Kristus Jesus. 25 Ndele Paulus eshi a popya ouyuki nelidiliko netokolo olo li nokuuya, Feliks okwa tila ndele ta ti: “Inda manga, ndele ngeenge nda mono efimbo la wapalela nge, ohandi ku ifana natango.” 26 Ndele kombinga imwe okwa li e shii ota pewa oimaliwa kuPaulus, ye e mu efe, onghee e mu ifanena ko luhapu, ndele ta kundafana naye.
27 Ndele eshi pa pita omido mbali, Porkius Festus okwa tulwa mo mepangelo ponhele yaFeliks. Ndele Feliks eshi a hala okuwapalela Ovajuda, okwa fiya mo Paulus meemango daye.
© Oshikwanyama Bible Revised © Bible Society of Namibia, 2008, 2012.
