1 OVAKORINTO 9 - Oshikwanyama Bible (OKYB)

Okulipangela kwomuhongi

1 Ame nghi fi omumangululwa mbela? Nghi fi omuyapostoli? Inandi mona mbela Jesus Kristus, Omwene wetu? Nye kamu fi oshilonga shange mOmwene? 2 Ngeenge nghi fi omuyapostoli wavamwe, oweni shili; osheshi onye oshilimbo shouyapostoli wange mOmwene.

3 Elipopilo lange kwaava tava konakona nge olo eli. 4 Katu na eenghono hamba okulya nokunwa? 5 Katu na eenghono ngeno okweenda meengeda nomukainhu, omumwameme meitavelo, ongaashi ovayapostoli vakwetu novamwaina vOmwene naKefas tava ningi? 6 Ile ofye atuke naBarnabas tuhe na eenghono tu kale itatu longo oilonga yomake? 7 Olyelye ta kala nande efiku limwe moukwaita te lifutile ye mwene? Olyelye ta twike oshikokola shomiviinyu ndele ita li oiimati yasho? Olyelye ta lifa oimuna, ye ita li omashini oimuna? 8 Oinima ei ohandi i tongo panhu mbela? Omhango nayo hasho ya popya? 9 Osheshi momhango yaMoses omwa shangwa: “Ongobe tai xu moshipale, ino i manga komulungu.” Kalunga ota tongo okuyavelela eengobe adike mbela? 10 Oye ite shi ti ngeno omolwetu? Heeno, omolwetu pa shangwa, omupululi na pulule e neteelelo, naau ta xu, na xwe nokuteelela a pewe oshitukulwa shaye. 11 Fye ngee otwe mu kuna ouwa wopamhepo, hano oshinima shinene tuu mbela, ngee hatu teya kunye ouwa wopalutu? 12 Ngee ope na vamwe ve neteelelo lokupewa sha kunye, hafye nee ngeno unene?

Ndele fye inatu longifa eenghono edi, otwa mwenena aishe, opo tuha dikile evaengeli laKristus eimbo lasha. 13 Onye kamu shi shii, ava hava longo oilonga yotembeli, otava li ei yomotembeli, naava tava longo oilonga poaltari, otava mono oipewa yavo poaltari? 14 Osho hano Omwene e shi pangela, nokutya, ava hava udifa evaengeli nava palulwe kevaengeli.

15 Ndelenee inandi longifa nande oshimwe shomoinima oyo nde i pitikilwa. Nongaashi eshi inandi shi shanga ndi pewe sha mwaai; hano shipu ndi fye. Itandi efa omunhu a xutule elitango lange. 16 Ndele nge handi udifa evaengeli, itandi dulu oku li litangela; mwaame ndi nefininiko, woo aame, ngeenge itandi li udifa! 17 Osheshi ngeenge handi shi longo nehalo liwa, ondi nondjabi; ndele handi shi ningi ndihe nehalo, onghee tuu oshilonga shelenga onde shi pewa. 18 Ondjabi yange ilipi hano? Oyo tuu ei, eshi handi udifa evaengeli, ohandi li udifa oshali, itandi tambula oshipewa osho nde shi itavelelwa kevaengeli.

19 Osheshi nande ihandi pangelwa kovanhu, ame onde lininga omupiya waaveshe, opo ndi likole vahapu. 20 KOvajuda onda kala ngaashi Omujuda ndi likole Ovajuda; kwaava ve li koshi yomhango, ongaashi ou e li koshi yomhango, nande ame nghi li koshi yomhango, ndi likole ava ve li koshi yomhango, 21 kwaava vehe nomhango nda fa ndihe nomhango (nande inandi kala ndihe nomhango yaKalunga, ondi li momhango yaKristus) ndi likole ava vehe nomhango, 22 kwaava oingone nda ninga oshingone, ndi likole oingone; onda ninga omukwao waaveshe mwaaishe, opo ndi xupife nande ovamwe. 23 Ndele aishe ohandi ningi omolwevaengeli, naame yo ndi mone oshitukulwa shomulo.

Omafiyafanepo mOvakriste

24 Kamu shi shii, ava hava tondoka monhele yomafiyafanepo, aveshe otava tondoka, ndelenee umwe ta hakana ondjabi yefindano? Tondokeni ngaashi winya mu i hakane. 25 Ndele omuningi wefiyafano keshe ohe lidilike oinima aishe, ndele vo otave shi ningi va pewe oshishani tashi lembe, ndele fye ohatu pewa osho itashi lembe. 26 Ame inandi hala ndi tondoke inandi shiiva efikilo, ngaashi ihandi kondjo nda fa handi denge momhepo, 27 ndele ohandi denge olutu lange nohandi li dulikifa, opo ndiha ninge aame ou handi udifile vamwe, ame mwene ngeno ndi ekelweshi.