OVATOKOLIPANGELI 7 - Oshikwanyama Bible (OKYB)

Ovaisraeli omafele atatu tava taataa Ovamidian

1 Opo nee Jerubbaal nokutya, Gideon, nomatanga aeshe ovakwaita ava va li puye, ova meneka, ndele va onga onhanda polufifiya Harod, fimbo onhanda yOvamidian ya li ye mu ama koumbangalanhu okudja koshikulundu More kepumbu. 2 Opo nee Omwene ta lombwele Gideon: “Omatanga ovakwaita aa e li pwoove, omahapu unene, opo ndi yandje Ovamidian momake avo, opo Ovaisraeli vehe linenepekele nge tava ti: Eke lange mwene la xupifa nge! 3 Ingidila omatanga ovakwaita u tye: ‘Ou ta tila ndele ta kakama, na piluke a shune keumbo, ndele fye ohatu kala apa pomhunda yaGilead.’ ” Opo nee ovakwaita omayovi omilongo mbali nomayovi avali va piluka, nomayovi omulongo a fyaala po.

4 Opo nee Omwene a lombwela Gideon ta ti: “Natango tuu ovakwaita ve li po vahapu. Va twala komeva, opo nee Ame ohandi ke ve ku hoololela mo. Ndee Ame handi ti kwoove nokutya: Inda naye, na ye naave. Ndelenee keshe ou handi ti kwoove: Ou ina ya naave, ye ina ya naave.” 5 Opo nee ye ta twala omatanga ovakwaita komeva. NOmwene ta ti kuGideon: “Keshe umwe ou ta shakumwine ngaashi ombwa tai shakumwine, ove u noku mu likaleka kombinga imwe; ndele keshe ou ta kotamene ta tu eengolo, na ame kombinga imwe.” 6 Ndelenee omuvalu waava va shakumwina neke, wa li ovalumenhu omafele atatu. Ndelenee ovakwaita aveshe vamwe va kotamena va twa eengolo va nwe omeva. 7 Opo nee Omwene ta ti kuGideon: “Novalumenhu ava omafele atatu ava va shakumwina, Ame ohandi ke mu xupifa nokuyandja Ovamidian meke loye. Ndelenee ovakwaita aveshe vamwe nava shune komaumbo avo. 8 Opo nee va kufa onghuta yovakwaita nomanghuma avo momake avo. Ndele ye okwa lekela ovakwaita aveshe va kotamena, keshe umwe a shune ketwali laye. Ndelenee ovalumenhu omafele atatu, ye e va kaleka puye, fimbo onhanda yOvamidian ya li mefilu lepumbu.”

9 Ndele oufiku tuu winya Omwene okwe mu lombwela ta ti: “Fikama, inda konhanda, osheshi Ame ohandi va yandje meke loye. 10 Ndele ove ngeenge wa tila okuya ko, inda hano konhanda pamwe nomupiya woye Pura, 11 u pwilikine eshi tava popi.” Opo nee omake oye taa ka pamekwa ndele ove to ka ya monhanda. Ye okwa ya hano pamwe nomupiya waye Pura fiyo okovanangeli vokomunghuloelela wonhanda, 12 NOvamidian nOvaamaleki novanhu aveshe vokoushilo va nangala monhanda ngaashi ouhapu woshipaxu neengamelo davo da li dihapu da nyengwa okuvalwa ngaashi edu momunghulo wefuta. 13 Ndele Gideon eshi e uya, omulumenhu umwe okwa hepaululila mukwao pefimbo tuu olo ondjodi ndele ta ti: “Tala, ame nda twa ondjodi. Omungome woilya wa li wa kukuta wa alangatela monhanda yOvamidian, ndele we uya fiyo we lidenga kofaila, yo ya wila po, ndele we i pilula, nofaila ya wila po.” 14 Nomukwao okwa nyamukula ta ti: “oyo kai na shimwe, oyo eongamukonda laGideon yaJoas, Omuisraeli. Kalunga okwa yandja onhanda aishe meke laye.” 15 Gideon eshi a uda ondjodi nefatululo layo, okwe linyongamena ta indile. Ndele okwa shuna konhanda yOvaisraeli ndele ta ti: “Fikameni, osheshi Omwene ta yandje onhanda yOvamidian momake eni.” 16 Ndele ye okwa tukula ovalumenhu omafele atatu eengudu nhatu, nokwe va pa aveshe omanghuma eedi noitoo mu neenyika momake avo, 17 nokwe va lombwela: “Talei nge ndele ningeni ngaashi ame; ndele taleni, ame ngeenge nda fika kovanangeli vokomunghuloelela, nye mu nokuninga naanaa ngaashi ame. 18 Ndele ngeenge ame naaveshe ava ve li pwaame hatu shiki omanghuma, nanye yo mu nokushika omanghuma keembinga adishe donhanda, ndele mu nokutya: ‘MolwOmwene nomolwaGideon!’ ”

19 Opo nee Gideon novalumenhu efele limwe ava va li puye va fika kovanangeli vokomunghuloelela wonhanda pehovelo lenangelo lopokati koufiku, ovanangeli eshi va tulwa po, vo ova shika omanghuma eedi ndele va tatula oitoo ya li momake avo. 20 Opo nee eengudu nhatu da shika omanghuma eedi ndele va tatula oitoo ndele va kwata eenyika momake okolumosho nomake okolulyo va kwata omanghuma eedi oku a shika fimbo tava ingida: “Eongamukonda lOmwene nolaGideon.” 21 Ndele vo ova kanghama va kala ofika keshe umwe ponhele yaye keembinga adishe donhanda. Opo nee onhanda aishe ya dongakana, va mbuyaana nokuya onhapo. 22 Ndele venya omafele atatu eshi va shika omanghuma eedi deemhedi, Omwene okwa alulilafana omaongamukonda ovakwao novakwao monhanda aishe. Naaveshe vomonhanda va ya onhapo kuBet-Sitta nokuSerera, fiyo okominghulo daAbel-Mehola puTabbat. 23 Novakwaita Ovaisraeli vomuNaftali novomuAsser novomuManasse va shivwa ko, ndele va shikula Ovamidian. 24 Gideon okwa tuma ovatumwa keemhunda daEfraim ndele ta ti: “Londolokeni mu shakeneke Ovamidian, ndele teteni ondjila yavo vaha hange omeva fiyo okuBet-Bara naJordan.” Osho hano ovakwaita aveshe va ongala ndele va nangela pomeva fiyo okuBet-Bara naJordan. 25 Ndele va kwata eehamba mbali dOvamidian Oreb naSeeb. Ndele va dipaa Oreb pemanya laOreb, ndele Seeb ve mu dipaela poshikolelo sheeviinyu, ndele va shikula Ovamidian. Ndele omutwe waOreb nomutwe waSeeb ve di twala kuGideon langhele kwinya yaJordan.