EXODUS 10 - Oshikwanyama Bible (OKYB)

Ehandukilo etihetatu: Oshipaxu

1 Omwene okwa lombwela vali Moses ndele ta ti: “Inda kuFarao, osheshi Ame nda kukutika omutima waye nomitima dovapiya vaye, opo ndi shiive okuwanifa omadidiliko ange mokati kavo, 2 naave yo opo u shiive okuhepaululila omumwoye nomutekulu woye, eshi Ame nda ninga muEgipiti, nomadidiliko ange nde a longa mokati kavo, opo va shiive nokutya, Aame Omwene.” 3 Opo nee Moses naAron ova ya kuFarao ndele tave mu lombwele: “Omwene Kalunga kOvaheberi osho ta ti: ‘Fiyo onaini ove to anye okulininipika koshipala shange? Lekela ovanhu vange, va shiive okulongela nge. 4 Ndelenee ngeenge to anye vali okulekela ovanhu vange va dje mo, tala, mongula ohandi ka tuma mo oshipaxu moshilongo shoye, 5 ndele sho otashi ka tuvika edu alishe loshilongo, omunhu opo a nyengwe okumona edu. Ndele sho otashi ka lya eshi sha xupa she mu xupifilwa po keemhawe. Nomiti adishe di li momufitu otashi ke di lya. 6 Neengulu doye neengulu dovapiya voye aveshe neengulu dOvaegipiti aveshe otadi ka yada oshipaxu, ouhapu washo inau monika kooxo nokooxokulu kokudja kefiku va kala kombada yedu nofiyo opaife.’ ” Ndele ye okwa punguluka nokwa pilamena ko a dja po puFarao. 7 Opo nee ovapiya vaFarao ve mu lombwela: “Fiyo onaini omulumenhu ou te ke tu ningila omwiyo? Lekela ovalumenhu va ye va ka longele Omwene Kalunga kavo. Ino shiiva mboli nokutya, Egipiti tashi teka po?” 8 Opo nee Moses naAron va ka alulwa ko, ve uya kuFarao, ndele ye te va lombwele: “Indeni ko hano mu ka longele Omwene Kalunga keni. Ndelenee oolyelye tamu i?” 9 Ndele Moses okwa nyamukula ta ti: “Fye ohatu i pamwe novanyasha novakulunhu novana vetu ovamati noukadona, noimuna yetu neengobe detu, osheshi twa hala okuningila Omwene oshivilo.” 10 Opo nee ye ta ti kuvo: “Heeno, Omwene na kale nanye, ame ngeenge handi mu efa, mu ye ko novana veni! Taleni, mu nomakoto meemwenyo deni! 11 Itashi ka ningwa! Indeni, nye ovalumenhu mu longele Omwene ngaashi mwa li mwa hala.” Ndele va tewatewa po puFarao.

12 Opo nee Omwene okwa lombwela Moses: “Yelula eke loye kombada yedu laEgipiti, oshipaxu shi holoke kombada yoshilongo shaEgipiti, noshi lye oimeno aishe yoshilongo aishe ei ya xupa keemhawe.” 13 NaMoses okwa yelula onhaili yaye kombada yedu laEgipiti, nOmwene okwa pepifa omhepo yokoushilo moshilongo omutenya aushe noufiku aushe. Ongula eshi kwa sha omhepo yokoushilo ya eta oshipaxu. 14 Oshipaxu she uya medu alishe laEgipiti nosha wila moshilongo ashishe shaEgipiti, eenduba dinene unene. Oshipaxu shi fike opo inashi kala po nale, noitashi ka holoka vali. 15 Ndele sho osha tuvika edu alishe loshilongo, nedu la li la twima. Ndele sho osha lya oimeno aishe noiimati yokomiti ei ya xupa keemhawe. Moshilongo ashishe shaEgipiti inapa fyaala vali nande sha shitalala sha kala komiti ile koimeno yomomapya. 16 Opo nee Farao okwa ifana diva Moses naAron ndele ta ti: “Ame nda nyona kuKalunga keni nokunye. 17 Dimeni po okunyona kwange oku natango, ndele indileni kOmwene Kalunga keni, a kufe po efyo eli.” 18 Ndele ye okwa dja po puFarao nokwa indila kOmwene. 19 Opo nee Omwene okwa pepifa po omhepo idjuu yokouninginino i shakene naikwao, yo oya kufa po oshipaxu noye shi undulila mEfuta Litilyana. Moshilongo ashishe shaEgipiti inapa fyaala nande oshipaxu shimwe. 20 Ndelenee Omwene okwa kukutika omutima waFarao, ye ina lekela Ovaisraeli va dje mo.

Ehandukilo etimugoi: Omilaulu

21 Omwene okwa lombwela vali Moses: “Yelula eke loye keulu, opo nee omilaulu tadi uya medu laEgipiti, omilaulu fokofoko di shiive okukwatwa keke.” 22 Moses eshi a yelula eke laye keulu, omilaulu fokofoko de uya moshilongo ashishe shaEgipiti, noda kala mo omafiku atatu. 23 Kape nomunhu kwa li e wete omukwao, nokape nomunhu a shiiva okulinyenga a dje mo monhele a kala omafiku atatu. Ndelenee Ovaisraeli aveshe va li ve nouyelele meenhele davo. 24 Opo nee Farao okwa ifana Moses ndele ta ti: “Indeni mu ka longele Omwene; ashike oimuna yeni neengobe deni nadi fyaale po. Ovana veni nava ye nanye.” 25 Ndele Moses ta ti: “Ove u noku tu pa yo eengobe domatomenoyambo nodomaxwikiloyambo tu di yandjele Omwene Kalunga ketu omayambo. 26 Hano oimuna i nokuuya pamwe nafye, nande ekondo limwe tali ka fyaala po, osheshi muyo tu nokukufa mo omayambo tu longele Omwene Kalunga ketu. Nafye vene yo inatu shiiva shike tu nokuyamba fimbo inatu fika ko oko, tu nokuyamba mokulongela kwetu Omwene.” 27 Ndelenee Omwene okwa kukutika omutima waFarao, onghee ye ina hala oku va lekela, va dje mo. 28 Ndelenee Farao okwe mu lombwela: “Inda, dja po pwaame. Tala, uha holoke vali koshipala shange. Osheshi efiku olo ove to holoka koshipala shange, ove u nokufya.” 29 Ndele Moses okwa nyamukula ta ti: “Ove wa popya sha yuka. Ame itandi ka mona vali oshipala shoye.”