DEUTERONOMION 1 - Oshikwanyama Bible (OKYB)

Moses ta hepaululile ovanhu osho Israel a mona moweenda womombuwa

1 Eendjovo edi Moses okwe di lombwela Israel ashishe moushilo waJordan mombuwa, momaluhaela a shaama naSuf, pokati kaParan naTofel naLaban naHaserot naDi-Sahab. 2 Ondjila yokudja kuHoreb fiyo okuKades-Barnea hai endwa omafiku omulongo nalimwe nondjila yokeemhunda daSeir.

3 Ndele mefiku lotete lohani onhimulongo momudo omutimilongo nhee, Moses okwa lombwela ovana vaIsrael adishe odo Omwene e mu lombwelele okupopya kuvo, 4 ye eshi a taataa muEdrei Sihon, ohamba yOvaamori yomuHesbon naOg, ohamba yaBasan, ei ya kala muAstarot. 5 Moushilo waJordan moshilongo shaMoab, Moses okwa hovela okufatulula omhango ei, ndele ta ti: 6 “Omwene Kalunga ketu okwe tu lombwela puHoreb ndele ta ti: ‘Nye omwa kala po omafiku pomhunda ei. 7 Fikameni, djeni po, mu ye keemhunda dOvaamori nokeenhele adishe domoushiinda wavo, nokutya komaluhaela nokeemhunda nokedu la lalakana nokoshikandjo shoumbangalanhu nokomunghulo wEfuta Lopokati, oshikandjo shOvakaanan naLibanon fiyo okomulonga omunene waEufrat. 8 Taleni, Ame ohandi mu pe edu olo. Indeni mu ke li nangale, edu olo Omwene e li udanekela neano ooxo Abraham naIsak naJakob, Ye e li va pe nomaludalo avo komesho yavo.’ ”

9 Ndele mefimbo linya nde mu lombwela, ndele handi ti: “Ame itandi dulu, oku mu humbata aame andike. 10 Omwene Kalunga keni okwe mu hapupalifa. Ndele taleni, ouhapu weni u fike peenyofi dokeulu. 11 Omwene Kalunga kooxo ne mu hapupalife natango lweyovi pomuvalu weni wopaife. Ye ne mu nangeke noupuna ngaashi e mu udanekela. 12 Ndelenee aame andike ohandi dulu ngahelipi hano okuhumbata omutengi noudjuu neemhata deni? 13 Eteni oku ovalumenhu ovanongo novanaendunge novalumenhu va shiivika momapata eni ndele ame ohandi va ningi ovapangeli veni. 14 Nye omwa nyamukula nge, tamu ti: Heeno, oda yuka, eendjovo we di popya. 15 Opo nee nda kufa ovakulunhu vomapata eni, ovakulunhu ve nomayele nova shiivika, ndele nde va ninga ovapangeli veni ngaashi ovakulunhu veyovi, novakulunhu vefele, novakulunhu vomilongo nhano, novakulunhu vomulongo novapashukili vomapata eni. 16 Ndele mefimbo linya ame nda lombwela ovatokoli veni veendjovo ndele handi ti: ‘Pwilikineni eendjovo davakweni, nye mu di yukife pauyuki pokati komulumenhu namukwao nomunailongo ou e li puye. 17 Nye inamu kala nokatongotongo mokutokola eendjovo davo; pwilikineni ou muxupi ngaashi mule. Inamu tila nande omunhu umwe, osheshi etokolo olaKalunga. Ndelenee eendjovo tadi mu nyenge, mu noku di etela nge, ndele ame ohandi ke di pwilikina.’ 18 Osho ngaha hano ame nde mu lombwela mefimbo linya oinima aishe ei mu noku i ninga.

19 “Opo nee fye twa fikama kuHoreb, ndele twa tauluka ombuwa aishe oyo inene noya tilika, oyo mwe i mona moweenda weni nondjila yeni yokeemhunda dOvaamori, Omwene Kalunga ketu ngaashi e tu lombwela. Ndele fye otwa fika kuKades-Barnea. 20 Opo nee ame nde mu lombwela: ‘Nye omwa fika fiyo okeemhunda dOvaamori, odo Omwene Kalunga ketu te ke tu pa. 21 Taleni, Omwene Kalunga keni e mu pa oshilongo osho. Fikameni, shi nangaleni, Omwene Kalunga kooxo ngaashi e mu lombwela. Inamu tila, inamu limbililwa.’ 22 Opo nee nye amushe mwe uya kwaame, ndele tamu ti: ‘Natu tume ovalumenhu ve tu tetekele va lave oshilongo, ndele va shiive oku tu shiivifila ondjila tu nokweenda nayo noilando oyo fye tu nokuya muyo.’ 23 Neendjovo odo oda wapalela nge, onghee hano ame nda kufa ovalumenhu omulongo navavali, omulumenhu umwe mepata keshe. 24 Ndele vo ova ya ndele va londa keemhunda, ndele va fika fiyo okefilu laEskol, ndele ve li lava. 25 Vo ova kufa ko oiimati yoshilongo, ndele va dja ko nayo ndele ve i tu etela, ndele ve tu hepaululila ndele tava ti: Oshilongo osho Omwene Kalunga ketu te ke shi tu pa, oshiwa.

26 “Ndelenee nye mwa li inamu hala okuya ko, ndelenee mwa twila elombwelo lOmwene Kalunga keni ondubo. 27 Ndele nye omwa ngongota momatwali eni ndele tamu ti: ‘Omwene eshi te tu tondo, onghee hano okwe tu pitifa mo medu laEgipiti e tu yandje momake Ovaamori, opo tu hanaunwe po. 28 Openi hatu i? Ovakwetu ova mbadapaleka omitima detu, vo eshi va tile: Ovanhu venya ovahapu ve tu dule, nomifika davo odile di tu dule. Oilando oya kula ndele ya pamekwa neehotekuma fiyo okeulu. Noko twa mona yo oludalo laAnak.’

29 “Opo nee ame nde mu lombwela: ‘Inamu tila, nye inamu mbadapala omolwavo. 30 Omwene Kalunga keni ou te mu tetekele, Ye ota ka lwa ponhele yeni naanaa ngaashi Ye e mu ningila moipafi yeni muEgipiti, 31 nomombuwa, omo mwa mona Omwene Kalunga keni nhumbi e mu humbata ngaashi omulumenhu ta humbata omona waye omumati, nondjila aishe mwa enda nayo fiyo mwa fika fiyo okonhele ei.’ 32 Ndelenee nande nda popya eendjovo odo, nye inamu itavela Omwene Kalunga keni, 33 ou e mu tetekelela nondjila oku mu kongela onhele yokwoonga onhanda yeni, oufiku momundilo opo mu mone ondjila tamu ende nayo, nomomutenya moshilemo.

34 “NOmwene eshi a uda ondaka yeendjovo deni, Ye okwa handuka nokwa ana ndele ta ti: 35 ‘Oshili, nande umwe womovalumenhu ava vomepupi eli la pilalala, ta ka mona edu olo liwa, Ame nde li udaneka neano oku li pa ooxo, 36 kakele kaKaleb yaJefunne. Ye ote ke li mona, nokuye nokomaludalo aye Ame ohandi ke va pa edu omo ye a ile, shaashi ye okwa shikula Omwene nomutima aushe.’ 37 Omwene okwa handukila nge yo omolweni, Ye ota ti: ‘Naave yo ito ka ya mo. 38 Josua yaNun, ou ta kala moipafi yoye, ye ota ka ya mo. Mu pameka, osheshi ye ota ka tukulila Israel edu lefyuululo.’ 39 Ndele ouhanana veni ava mwe va tongele: ‘Vo otava ka ninga oihakanwa! Novana veni ava inava shiiva natango ouwa nowii, vo otava ka ya mo navo Ame ohandi ke li va pa, ndele vo otave ke li nangala. 40 Ndelenee nye pilukeni mu shune kombuwa nondjila yEfuta Litilyana.’

41 “Opo nee nye mwa nyamukula nge ndele tamu ti: ‘Fye otwa nyona kOmwene. Fye vene ohatu ka ya okulwa naanaa ngaashi Omwene Kalunga ketu e tu lombwela.’ Ndele nye mwe lidilila keshe umwe oilwifo yoita ndele mwe lilongekida okuya keemhunda. 42 Omwene okwa lombwela nge: ‘Va lombwela: Nye inamu ya ko mu lwe, osheshi Ame nghi mo mokati keni, opo muha tewatewe kovatondadi veni.’ 43 Ndelenee ame eshi nda popya, nye inamu pwilikina nande, ndelenee nye mwa li mu nondubo nelombwelo lOmwene ndele moukukutu weni mwa ya keemhunda. 44 NOvaamori ava va kala keemhunda ova fikama oku mu shakeneka, ndele vo ve mu taataa ngaashi eenyiki. Ndele vo ve mu halakanifila muSeir fiyo okuHorma. 45 Ndele nye mwa aluka, ndele mwa lila koshipala shOmwene, ndelenee Omwene ina pwilikina ondaka yeni ndele ine mu uda. 46 Osho ngaha nye mwa li mu nokukala omafiku oo mahapu muKades, ngaashi mwe a kala ko.