Jonatan ta ame kuDavid
1 Ndele Saul okwa popya naJonatan novapiya vaye aveshe nokutya, David e nokudipawa. Ndelenee Jonatan, omona waSaul okwa hokwa unene David. 2 Ndele Jonatan okwe shi hepaululila David ndee ta ti: “Tate Saul ota kongo omhito oku ku dipaa. Kala hano wa lungama ongula inene wa hondama, ino hololoka. 3 Opo nee ame ohandi ka pita mo ndee handi ka kala ofika putate koluhaela oko u li, ndee ame ohandi ke ku kundafana natate, ndele ngeenge handi udu sha, ame ohandi ke shi ku shiivifila.” 4 Jonatan okwa popya naxe Saul ndee ta popile David ndee te mu lombwele: “Tate ohamba, ino litula etimba omolwomupiya woye David, osheshi ye ina nyona kwoove, noilonga aishe yaye ye ku kwafa shili, 5 ye okwe liyandja mefyo nokwa dipaa Omufilisti, nOmwene okwa pa Ovaisraeli aveshe efindano linene. Ove we shi mona ndele wa hafa. Omolwashike hano wa hala okunyona mokutilashi ohonde ihe netimba nokudipaa David, nande ehe noushima?” 6 Ndele Saul okwa uda Jonatan ndele Saul okwa ana ta ti: “Oshili, ngaashi Omwene e nomwenyo, ye ita ka dipawa!” 7 Opo nee Jonatan okwa ifana David, ndele Jonatan okwe mu hepaululila eendjovo odo adishe. Ndele Jonatan okwa twala David kuSaul, ndele ye a kala puye ngaashi shito. 8 Ndele oita eshi ya hovela vali, David okwa ya nokwa lwifa Ovafilisti, ndele molwoodi linene e va taataa onghee va ya onhapo moipafi yaye.
Saul ta hetekele vali okudipaa David
9 Ndelenee omhepo ii ya tumwa kuKalunga ya hanga Saul fimbo ye e li omutumba meumbo laye ndele David ta shiki okaxumbafeta. 10 Opo nee Saul ta hetekele okutwa David neonga noku mu twila kumwe nekuma, ndele ye a yepa eonga laSaul; onghee ye a umba eonga, la shimbama mekuma. Ndele David okwa ya onhapo nokwa xupifwa oufiku ou. 11 Ndelenee Saul okwa tuma ovatumwa keumbo laDavid ve mu nangele, opo ve mu dipae ongula inene. Ndelenee omwalikadi waye Mikal okwe shi hepaululila David ndee ta ti: “Ove ngeenge ito xupifa omwenyo woye oufiku ou wonena, ongula inene to ka dipawa.” 12 Mikal okwa kulukifila David mombululu yekende. Ndele ye okwa pita mo nokwa ya onhapo ndele a xupifwa. 13 Opo nee Mikal okwa kufa oshihongwakalunga shomeumbo nokwe shi nangeka mombete, ndele a uvika omutwe washo neluviluvi lolududi loikombo nokwe shi uvika nekumbafa. 14 Saul eshi a tuma ovatumwa va ka tale Mikal kooDavid ta ti: “Ye ota vele.” 15 Opo nee Saul okwa tuma ovatumwa va ka tale David nondaka ei: “Mu eteni pamwe nombete yaye noinima aishe kwaame ndi shiive oku mu dipaa.” 16 Ovatumwa eshi ve uya mo, oshihongwakalunga shomeumbo sha nangala kombete neluviluvi lolududi loikombo komutwe washo. 17 Ndele Saul ta ti kuMikal: “Omolwashike wa kengelela nge ngaha, nomutondadi wange we mu efa a ye onhapo?” Ndelenee Mikal okwa nyamukula Saul: “Ye okwa lombwela nge: Efe nge ndi ye ile handi ku dipaa.”
David puSamuel muRama
18 Ndelenee David okwa ya onhapo nokwa xupifwa, ndele te uya kuSamuel muRama, ndele okwa hepaululila Samuel ashishe eshi Saul e shi mu ningila. Opo nee ye a ya pamwe naSamuel ndele va kala muNajot puRama. 19 Ndele Saul okwa hepaululilwa: “Tala, David oku li muNajot puRama.” 20 Opo nee Saul a tuma ovatumwa va ka tale ko David. Ndelenee vo eshi va mona ongudu yovaxunganeki tava xunganeke, Samuel e va kwata komesho, Omhepo yaKalunga ya hanga ovatumwa vaSaul, navo yo va xunganeka. 21 Saul eshi e shi hepaululilwa, ye okwa tuma ko ovatumwa vamwe, ndelenee navo yo va xunganeka. Ndele Saul okwa tuma ko lutitatu ovatumwa, ndelenee navo yo va xunganeka. 22 Ndele naye mwene yo okwa ya kuRama ndele e uya komufima munene puSegu, ndee ta pula ta ti: “Samuel naDavid ove li peni?” Vo ova nyamukula: “OmuNajot puRama.” 23 Opo nee ye okwa ya kuNajot puRama. NOmhepo yaKalunga ye uya nomuye yo, onghee ye okwa enda ta xunganeke fiyo a fika kuNajot puRama. 24 Naye mwene yo okwe lidula oikutu yaye nokwa xunganeka koshipala shaSamuel nokwa wila eombe nokwa nangala hamunghele omutenya aushe noufiku aushe. Onghee taku tiwa: NaSaul ye oku li movaxunganeki hamba?
© Oshikwanyama Bible Revised © Bible Society of Namibia, 2008, 2012.
