Kalunga ta indilwa a wanife eshi a udanekela David
Ounongoimbilo laEtan Omuesrahi.
1 Omauwanghenda Omwene
onda hala oku a imba alushe,
noudiinini woye ndi u hepaululile
ovatekulululwa nokanya kange.
2 Osheshi Ove wa tya:
“Ouwanghenda otau ka kala wa dikwa po
fiyo alushe meulu,
oudiinini woye wa pamekwa.
3 Ame nda dika ehangano nomuhoololwa wange,
omupiya wange David, nde mu anenene:
4 ‘Oludalo loye onda hala oku li pameka
li kale po fiyo alushe,
nolukalwapangelo loye ohandi li pangelele
omaludalo aeshe okomesho.’ ” Sela
5 Ndele omaulu otaa tange oikumwifalonga yoye, Omwene,
osho yo oudiinini woye meongalo lovayapuki.
6 Ile olyelye womoule meulu e fike pOmwene,
movana ovamati vaKalunga elipipo a fa Omwene?
7 A fe Kalunga ou ha tilika moshiongalele shovayapuki,
noku neshushu mwaaveshe ava hava kala puye.
8 Akutu Omwene, Kalunga keengudu
dovakwaita, olyelye ngaashi Ove?
Oove omunaenghono, akutu Omwene,
oudiinini woye otau ku dingilile apeshe.
9 Ove to pangele etukuluko lomeva efuta;
omakufikufi alo ngeenge tae litumbu, Ove to a lotifa.
10 Ove wa tyuvaula Rahab a fa a tetwatetwa,
okwooko kwoye kweenghono
we ku halakanififa ovatondi voye.
11 Eulu oloye, nedu oloye,
ongonga yedu nouyadi walo,
Oove we li dika.
12 Oumbangalanhu noumbuwanhu,
Oove we i shita.
Tabor naHermon nadi kuwilile edina loye.
13 Okwooko kwoye oku neenghono,
neke loye ola pama,
nolulyo loye ola yeluka.
14 Ouyuki neyukifo,
oyo efina lolukalwapangelo loye.
Ouwanghenda noudiinini otau tetekelele oshipala shoye.
15 Oshiwana shi nelao, osheshi shi udite oshivilohafo,
eshi hashi ende mouyelele
woshipala shoye, Omwene.
16 Efiku alishe otava tanhele edina loye,
molwouyuki woye otava nenepekwa.
17 Osheshi Oove etumbalo lavo nepameko lavo,
molwoku tu hokwa kwoye oluvinga letu
ola yeluka pombada;
18 osheshi oikelelifo yetu, oyOmwene,
nohamba yetu, oyo Omuyapuki waIsrael.
19 Shito owa popifile ovayuki voye memoniko, wa tile:
“Onda yandja eenghono komuladi
e mu kwafe, nde mu tumbila elenga,
eli nda hoolola movanhu.
20 Onda mona David, omupiya wange,
nde mu vaeka nomaadi ange mayapuki,
21 opo eke lange alushe li kale kuye,
nokwooko kwange ku mu pameke.
22 Kape nomunaita te mu ende koshi,
nombudi, i mu lungamene.
23 Ndelenee ovashindanhu vaye
onda hala oku va shataula po,
naava tave mu tondo,
ndi va pundaulile poshi.
24 Oudiinini wange nouwanghenda wange
tau kala pamwe naye,
nomedina lange oluvinga laye
nali yeluke pombada.
25 Onda hala okudulikifa omeva efuta keke laye,
Ame ndi tule olulyo laye kombada yomilonga.
26 Oye ou ta ka ifana nge: ‘Oove Tate yange,
Oove Kalunga kange, emanya lexupifo lange.’
27 Onghee hano naame yo
onda hala ndi mu ninge oshiveli nomukulunhu
mokati keehamba dokombada yedu.
28 Alushe onda hala, ndi mu diininine ouwanghenda wange,
nehangano letu naye nali mu pamene.
29 Noludalo laye onda hala oku li pameka fiyo alushe,
osho yo olukalwapangelo laye nali kale,
ngaashi eulu li li po.
30 Ovana vaye ovamati, ngeenge tava efa omhango yange
ndele itava kala meenghedi dange,
31 ndele tava nyono eemhangela dange,
ndele itava diinine oipango yange,
32 opo nee eliteeko lavo,
Ame ohandi li va alulile noshokoto
noku va dengela owii wavo;
33 ndelenee ouwanghenda wange,
owo inandi hala, ndi u va nyekulule,
noudiinini wange itandi u likale.
34 Inandi hala, ndi xutule ehangano letu naavo,
naashi nda tongele nomilungu dange, ihandi shi tongolola.
35 Lumwe aluke onda li nda ana kouyapuki wange:
oshili, naDavid itandi ke mu fufya nande.
36 Oludalo laye nali kale po alushe,
nolukalwapangelo laye li faafane netango koshipala shange;
37 olo li kale po alushe ngaashi ohani;
ondobwedi ei yomoilemo oyoshili.” Sela
38 Ndelenee nande pa li ngaha,
Ove we tu ekelashi nowe tu taataela kwi,
nomuvaekwa woye to mu udile onya;
39 owa teyaula po ehangano leni nomupiya woye,
oshishani shaye shokomutwe we shi kufa etumbalo,
nowe shi kupaulashi mondwi yedu.
40 Omakuma aye aeshe neehote daye,
owe a ngumauna po,
owe a shitukifa oikulukuma.
41 Aveshe ava tava ende nondjila ei,
otave mu vakaavaka,
nokwa ninga oshiyolifa kovashiinda vaye.
42 Eke lokolulyo lovafininiki vaye owe li pa efindano,
wa hafifa ovatondi vaye aveshe.
43 Osho vali omukonda waye weememo
owe u shunifa monima molwoodi,
Ove ino mu pamekela mo ofika.
44 Oshinge shaye owe shi dima po,
nolukalwa laye owe li undwila poshi.
45 Omafiku ounyasha waye owe a xupipika,
owe mu tuvika nelengwa nodino. Sela
46 Fiyo onaini hano, Omwene,
wa hala okuhondama ngaha,
nehandu loye tali xwama fiyo onaini, la fa omundilo?
47 Omwene, dimbulukwa omafiku ange nhumba maxupi,
novanhu aveshe, nhumba we va shita
ihava kalele kuxula po.
48 Openi mbela pe na ou,
ta kala nomwenyo ndele ita mono efyo,
ye a xupife omwenyo waye mepangelo loshovafi? Sela
49 Omwene, omaudaneko oye ouwanghenda,
aa wa anena nale David moudiinini woye,
oku li nee peni?
50 Omwene, dimbulukwa odino yovapiya voye,
ame eshi ndi li po
handi humbata meni lange
omasheko oiwana yoilongo, apa i fike.
51 Oyaa, ovatondi voye, Omwene, tava sheke nao,
omanha omuvaekwa woye otave a sheke nao.
52 Omwene na fimanekwe fiyo alushe!
Amen, heeno, Amen.
© Oshikwanyama Bible Revised © Bible Society of Namibia, 2008, 2012.
