Eitavelo tali findi ounyuni
1 Keshe tuu ou ha itavele nokutya, Jesus Oye Kristus, oye a dalwa muKalunga; ndele keshe ou e hole ou e mu dala, oye e hole yo ou a dalwa kuye. 2 Ndele opo tuu opo ohatu shiiva kutya, otu hole ovana vaKalunga, ngeenge tu hole Kalunga ndele hatu diinine oipango yaye. 3 Osheshi ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu. 4 Osheshi keshe eshi sha dalwa kuKalunga, otashi findi ounyuni, nefindano eli tali findi ounyuni olo eitavelo letu. 5 Olyelye ou ta findi ounyuni, ngeenge ke fi ou ta itavele Jesus Oye Omona waKalunga?
Eendobwedi daKalunga
6 Oye tuu ou e uya momeva nomohonde, Jesus Kristus, ndele hamomeva aeke, ndelenee omomeva nomohonde; 7 NOmhepo Oye tuu te mu hepaulula, osheshi Omhepo Oye oshili. 8 Osheshi oku na ovahepaululi vatatu: Omhepo nomeva nohonde, naai itatu tu kumwe. 9 Ngeenge ohatu itavele ehepaululo lovanhu, hano ehepaululo laKalunga olinene li dule linya. Ehepaululo laKalunga olo tuu olo, eshi a hepaulula Omona. 10 Ou ta itavele Omona waKalunga, oye e nehepaululo muye mwene. Oye ou ita itavele Kalunga, ye okwe mu ninga omunaipupulu, shaashi ye ina itavela ehepaululo laKalunga eshi a hepaulula Omona waye. 11 Nehepaululo oleli: Kalunga okwe tu pa omwenyo waalushe, nomwenyo ou waalushe ou li mOmona waye. 12 Ou e nOmona, oye e nomwenyo; ou ehe nOmona waKalunga, oye ehe nomwenyo.
Ye oha udu
13 Eshi onde shi mu shangela, nye tamu itavele edina lOmona waKalunga, mu kale mu shi shii nokutya, omu nomwenyo waalushe. 14 Hano elineekelo eli letu tu li na muye oleli: ngeenge hatu mu indile sha pahalo laye, ote tu udu. 15 Hano ngeenge otu shi shii nokutya, Ye ote tu udu keshe tuu eshi hatu shi indile, otu shi shii yo, aishe oyo twe i mu indila, ohatu i pewa.
16 Omunhu ngeenge ta mono omumwaxe ta longo oulunde kau fi oulunde wokufya, oye ne mu ilikanene, ndele Ye ote mu pe omwenyo nokutya, ava itava longo oulunde wokufya. Oku nomatimba oo okufya, havo handi tongo, va ilikanenwe. 17 Owii keshe oo etimba. Ndele oku na etimba olo lihe fi lokufya.
Eshiivo lovana vaKalunga
18 Ofye otu shi shii, keshe ou a dalwa kuKalunga, oye iha nyono, ndele ou a dalwa kuKalunga, oye te lidiinine ye mwene, nomunawii ite mu kumu. 19 Ofye otu shi shii, fye ovomuKalunga, nounyuni aushe ou li mepangelo lomunawii.
20 Ndele otu shi shii yo, Omona waKalunga okwe uya mo nokwe tu pa ondunge okushiiva Omunashili; omo tu li mOmunashili, mOmona waye Jesus Kristus. Oye Kalunga omunashili nomwenyo waalushe. 21 Ovamwange, livangekeni oikalunga! Amen.
© Oshikwanyama Bible Revised © Bible Society of Namibia, 2008, 2012.
