1 OVAKORINTO 3 - Oshikwanyama Bible (OKYB)

Ovanaimhanga tava hanyenwa

Jesus omukangha wexupifo

1 Ndelenee ovamwatate, ame inandi dula okupopya nanye ngaashi naava vopamhepo, ndele ongaashi ovo vopambelela nongaashi ouhanana muKristus. 2 Omashinishini nde mu nwefa, haikulya ya pama, osheshi omwa li itamu i dulu, natango itamu i dulu; 3 osheshi natango nye ovopambelela. Eshi mokati keni mu nefupa neemhata, kamu fi vopambelela noitamu ende paunhu? 4 Ngeenge umwe ota ti: Ame owaPaulus, naumwe: Ame owaApollos, kamu fi vopambelela?

5 Apollos olyelye? NaPaulus olyelye? Ovo ovapiya vOmwene mwa itavelifwa kuvo, ongaashi vo va pewa kOmwene, ou oshaye naau oshaye. 6 Ame onda twika, Apollos okwa tekela, ndele Kalunga a kulika. 7 Onghee hano nakutwika nanakutekela vo kave shi sha, ndelenee oKalunga tuu ou ta kulike. 8 Ndelenee omutwiki nomutekeli ove fike pamwe; ndele keshe umwe ota pewa ondjabi yaye mwene i fike poshilonga shaye mwene. 9 Osheshi ofye ovalongi pamwe naKalunga; onye epya laKalunga, etungo laKalunga.

10 Pafilonghenda eli laKalunga nde li pewa, ngaashi omutungingulu onghulungu onda tunga ekanghameno, ndele umwe e lili ta tungile mo, ndele keshe tuu na tale nhumbi ta tungile mo. 11 Osheshi kaku na ou ta dulu okudika ekanghameno limwe olo tuu olo la dikwa, olo Jesus Kristus. 12 Hano ngeenge pe na ou ta tungile kekanghameno eli moshingoldo noshisiliveli, nokawe nomiti, nomwiidi noihati, 13 oshilonga shakeshe otashi ka holoka, osheshi efiku linya otali ke shi holola, eshi tali holoka momundilo, nomundilo otau yeleke oshilonga shakeshe umwe nhumbi sha tya. 14 Oshilonga shaau a tungila kekanghameno eli ngeenge tashi kala po, ota ka pewa ondjabi; 15 ngeenge ope na ou oshilonga shaye tashi pile mo, ota kala e nomupya; ndele ye mwene ota ka xupifwa, ndelenee ngaashi tuu okupitila momundilo.

16 Kamu shi shii nokutya, onye otembeli yaKalunga, nOmhepo yaKalunga tai kala munye? 17 Ngeenge ope na ou ta nyono po otembeli yaKalunga, oye ota nyonwa po kuKalunga, osheshi otembeli yaKalunga oiyapuki, nye otembeli ei.

18 Inapa kala nande umwe te lipukifa ye mwene. Ngeenge mokati keni omu na umwe e shi oye omunaendunge mounyuni ou, oye na ninge elai, opo a ninge omunaendunge. 19 Osheshi ounongo wounyuni ou oo oulai koshipala shaKalunga. Osheshi opa shangwa: “Ovanongo ote va yulu momakoto avo,” navali: 20 “Omadiladilo ovanongo Omwene oku a shii oo ongaho.” 21 Inapa kala hano ou te litangele ovanhu; osheshi oinima aishe oyeni, 22 nande oPaulus naApollos naKefas, ile ounyuni nomwenyo nefyo, naai yopaife ile inya yokomesho, aishe oyeni. 23 Ndelenee onye ovaKristus, naKristus owaKalunga.