Oilando yOvalevi
1 NOmwene okwa popya naMoses momaluhaela aMoab puJordan, monhele ya shaama naJeriko, ndee ta ti: 2 “Lombwela ovana vaIsrael va pe Ovalevi moitukulwafyuululwa yavo oilando va kale muyo; noulifilo ou wa dingilila oilando nave u pewe yo. 3 Noilando ei nai ninge eenhele davo dokukala mo. Ndelenee oulifilo wayo tau ningi woimuna yavo nowoinima yavo noweengobe davo. 4 Noulifilo woilando tamu i pe Ovalevi u nokuhanga omaludimbo eyovi limwe okuyeleka kohotekuma yoshilando keembinga adishe doshilando. 5 Ndele pondje kombada yoshilando yelekeni kombinga yokoushilo omaludimbo omayovi avali nokombinga yokoumbuwanhu omaludimbo omayovi avali nokombinga yokoumbangalanhu omaludimbo omayovi avali nokombinga omayovi avali, ndele oshilando tashi kala pokatielela. Onhele ei oyo oulifilo woilando.
6 “Ndele oilando ei tamu i Ovalevi ihamano tai ka ninga oihondamenolando ei mu noku i yandja, opo omudipai womunhu a shiive oku ka hondama mo. Ndele kwaai mu nokuweda ko oilando omilongo nhee naivali. 7 Oilando aishe ei nye tamu i yandje kOvalevi oi li oilando omilongo nhee naihetatu, yo kumwe noulifilo wayo. 8 Ndele oilando ei yOvaisraeli mu noku i yandja, momapata manene, namu kufwe ihapu ndele mwaa manini, namu kufwe inini. Hano epata keshe nali pe Ovalevi oilando i fike pwaai i li moshitukulwafyuululwa shalo.”
Oihondamenolando
9 Omwene okwa popya vali naMoses ndee ta ti: 10 “Lombwela ovana vaIsrael u tye kuvo: ‘Nye eshi tamu tauluka Jordan mokuya kedu laKaanan, 11 mu nokulihoololela oilando i li meenhele da yeleka, yo otai ningi oihondamenolando yeni, opo omudipai, ou a dipaa omunhu ohaluka, a shiive okuhondama muyo. 12 Noilando oyo nai kale omwaameni wokukelela omupuli wetimba, opo ou a dipaa, aha dipawe, eendjovo daye fimbo inadi tokolwa moipafi yeongalo. 13 Nomuvalu woilando oyo tamu va pe, ihamano oihondamenolando. 14 Oilando itatu mu noku i hoolola moushilo waJordan naitatu yomuyo omedu laKaanan. Oyo i nokukala oihondamenolando. 15 Mokati keni oilando ei ihamano oyo oihondamenolando yovana vaIsrael noyomunailongo noyomwiidililwamo, opo keshe umwe ou a dipaa omunhu ohaluka, ta shiiva okuhondama mo.
16 “Ndelenee ngeenge te mu denge noshivela, nomunhu ta fi, opo nee ye omudipaielela e nokufya shili. 17 Ndele ngeenge te mu denge nemanya li li meke, li shii kudipaa omunhu, nomunhu ta fi, opo nee ye omudipaielela. Omudipaielela e nokufya shili. 18 Ile ngeenge te mu denge noshiti shi li meke, shi shii kudipaa omunhu, nomunhu ta fi, opo nee ye omudipaielela. Omudipaielela e nokufya shili. 19 Omupuli wetimba e nokudipaa omudipaielela. Ye eshi te mu hange, ye e noku mu dipaa. 20 Ile umwe ngeenge te mu tu mehandu ile te mu kupula owina, e mu dipae, nomunhu ta fi, 21 ile te mu denge mehandu enghava, nomunhu ta fi, opo ou a denga, e nokudipawa shili. Ye omudipaielela. Omupuli wetimba e noku mu dipaa ngeenge e mu mono.
22 “Ndelenee ye ngeenge te mu kupula sha ohaluka, ehe nehandu ile te mu kupula sha ehe nehalo e mu dipae. 23 Ile ye ngeenge te mu kupula emanya, li shii oku mu dipaa, ndee ta fi, ye ine mu handukila, ye kakwa li a hala oku mu dipaa, 24 opo nee eongalo li nokutokola pamakululomhango aa pokati kaau a dipaa nomupuli wetimba. 25 Neongalo li nokuxupifa ou a dipaa nomake omupuli wetimba, neongalo nali efe a shune moshihondamenolando shaye, omo a ya onhapo. Ndele ye e nokukala ko fiyo okefyo lomupristeli omukulunhu ou a vaekwa nomaadi mayapuki. 26 Ndelenee omudipai ngeenge ta tauluka ongaba yoshihondamenolando omo a ya onhapo, 27 nomupuli wetimba te mu hange pondje yongaba yoshihondamenolando shaye, nomupuli wetimba te mu dipaa, opo nee ye ke netimba. 28 Osheshi winya e nokukala moshihondamenolando shaye fiyo okefyo lomupristeli omukulunhu. Ndelenee konima yefyo lomupristeli omukulunhu, omudipai ta dulu okushuna koshilongo omo oshitukulwafyuululwa shaye shi li. 29 Oyo nai ninge onghedimhango mokutokola momapata eni meenhele deni adishe.
30 “Umwe ngeenge ta dipaa omunhu, omudipai na dipawe pahepaululo leendobwedi. Ndelenee ondobwedi imwe itai wanene okutokolela omunhu efyo. 31 Ndelenee nye inamu tambula nande oimaliwa yokukulila omudipai a kale nomwenyo, osheshi ye e netimba lokufya, e nokudipawa shili. 32 Nosho yo inamu tambula oimaliwa yokukulila ou a ya onhapo moshihondamenolando, opo a shiive ngeno okushuna kedu laye fimbo omupristeli omukulunhu ina fya. 33 Ndele nye inamu nyateka edu olo mu li mulo, osheshi ohonde tai nyateke edu. Edu olo itali ka kwatakanifwa molwohonde ei ya tililwa mo, ashike nohonde yaau e i tilashi. 34 Hano inamu nyatekifa edu mulo tamu kala, naame yo handi kala mokati keni, osheshi Aame Omwene, ohandi kala mokati kovana vaIsrael.”
© Oshikwanyama Bible Revised © Bible Society of Namibia, 2008, 2012.
