Olupandu kuKalunga molwexupifo
Epsalme laDavid, la pewa enyakwa lolwiimbo, mongovela yeimbilo eli: ‘Fila omona’.
1 Onda hala okuhambelela Kalunga nomutima wange aushe,
nda hala okuhepaulula oikumwifalonga yoye aishe.
2 Nda hala okuhafela nokunyakukilwa mwoove,
nda hala okwiimbila etumbalo ledina loye,
Ove ou wOkombadambada.
3 Osheshi ovatondi vange
ova shunifwa lwanima,
va pundaulwa nova nyonaunwa po koshipala shoye.
4 Ove u li po wa yukifila nge, nowa popila nge,
u li kolukalwapangelo loye,
Oove omutokoli omuyuki.
5 Ove wa aneka ovapaani
nowa nyonauna po ovahenakalunga,
nomadina avo we a dima po alushe fiyo alushe.
6 Ovatondi ova nyonwa po,
va shatwa po fiyo alushe;
noilando yavo Ove we i ngumauna po sheke;
okudimbulukiwa kwavo kwa xula po.
7 Ndelenee Omwene ota pangele fiyo alushe;
Oye a dika olukalwapangelo laye a tokole.
8 Oye mwene ta ka tokola
omunghulo wedu mouyuki,
ota pangele oiwana pauyuki.
9 Osho hano Omwene Oye emanyahote kovafininikwa,
emanyahote mefimbo loudjuu.
10 Ava va shiiva edina loye,
otave ku lineekele, Omwene,
Ove ito efa ava tave ku kongo.
11 Imbileni Omwene, ou ta kala muSion,
udifileni mokati koiwana oinenelonga yaye.
12 Osheshi ou omunanghonehonde,
he va dimbulukwa,
nonghuwo yomapongo ihe i dimbwa.
13 Omwene, file nge onghenda,
tala oudjuu wange
nda hepekwa nao kovatondi vange,
Ou ho kufa nge moivelo yefyo,
14 oilonga yefimano loye alishe
opo ndi shiive oku i hepaulula,
ndi shiive okunyakukilwa exupifo loye
moivelo yokakadona kaSion.
15 Ovapaani ova wila mekelo, eli va fele
nomelulo lomwiyo eli va telele,
ove liyula voovene keemhadi davo.
16 Omwene okwe lishiivifa,
nehandutokolo laye okwe li mana,
omulunde e likwatifa
koilonga yomake aye mwene. Sela
17 Ovakolokoshi ve nokuwila moshovafi,
novapaani aveshe ava va dimbwa Kalunga.
18 Osheshi ohepele iha dimbuwa fiyo alushe,
neelaelo lomapongo ihali tutuka fiyo alushe.
19 Omwene, tukuluka!
Ino efa ovanhu va lundakane,
ovapaani nava tokolwe koshipala shoye.
20 Omwene, va halukifa;
novapaani nave lishiive ovo ovanhu. Sela
© Oshikwanyama Bible Revised © Bible Society of Namibia, 2008, 2012.
