Josia ohamba yaJuda
1 Omido daJosia da li hetatu, ye eshi a ninga ohamba. Nokwa pangela omido omilongo nhatu naumwe muJerusalem. 2 Nokwa ninga osho sha yuka momesho Omwene nokwa enda neendjila daxe David, ndele ina kanduka mo nande kolulyo ile kolumosho. 3 Ndele momudo omutihetatu wepangelo laye, fimbo ye omunyasha natango, okwa hovela okukonga Kalunga kaxe David, ndele momudo omutimulongo nomutivali okwa hovela okuyapula Juda naJerusalem nokukufa mo oikulundu yokuyambela nomiti omalupwelele aAsera noihongwafano noitelekwafano. 4 Ndele moipafi yaye va ngumauna po eealtari daBaal. Neengudi detango da li ko, okwe di xwandaula, nokwa teyaula po omiti omalupwelele aAsera noihongwafano noitelekwafano nokwe i twa oufila ndele te i undu keembila daava va li ve i yambela. 5 Nomakipa ovapristeli e a xwika po keealtari davo nokwa yapula Juda naJerusalem. 6 Nomoilando yomuManasse noyomuEfraim noyomuSimeon nofiyo okuNaftali nomatemo avo 7 okwa ngumaunifa po eealtari davo nomiti omalupwelele aAsera noihongwafano okwe i nyanyaula ya ninga oufila neengudi adishe detango domoshilongo shaIsrael, okwe di ka po. Opo nee ye a aluka e uya kuJerusalem.
Otembeli tai yapulwa
8 Ndele momudo omutimulongo nahetatu womepangelo laye, mokuyapula kwaye oshilongo notembeli, okwa tuma Safan yaAsalia naMaasea, omukulunhu woshilando naJoah yaJoahas, elenga ekulunhu, va yapule ongulu yOmwene Kalunga kaye. 9 Vo eshi ve uya komupristeli omukulunhu Hilkia, ova yandja oimaliwa oyo ya etelwa ongulu yaKalunga, oyo ya ongelwa kOvalevi ovanangeli vopoivelo, ve i ongela muManasse nomuEfraim nomoixupe yOvaisraeli nomuJuda ashishe nomuBenjamin nomoonakukalamo muJerusalem. 10 Vo ove i yandja kovalongifi ovo va tulwa po va pashukile oilonga yomongulu yOmwene, ndele ava ve i yandja kovalongi ava hava longo mongulu yOmwene va wapaleke ongulu noku i vandeka. 11 Ndele ve i yandja kovahongi voipilangi nokovatungi, va lande omamanya a hongwa nomiti doikonde nodeemhati deengulu odo da nyonwa po keehamba daJuda. 12 Novalumenhu ava va longa oshilonga shavo palineekelo. Ovapashukili vavo va li: Jahat naObadja, Ovalevi vomovana vaMerari. NaSakaria naMesullam vomovana vaKohat, va wilika, nOvalevi aveshe ovo ve shi kushika oishikomwa, 13 umwe okwa pashukila ovahumbati vomitengi, nomukwao okwa wilika ovalongi aveshe moshilonga keshe. Ovashangi novapashukili novanangeli poivelo va li vomOvalevi.
Embo lomhango tali monika motembeli
14 Vo eshi va twala oimaliwa ya etelwa ongulu yOmwene, omupristeli Hilkia okwa mona embo lomhango yOmwene, oyo ya yandjwa kuMoses. 15 Opo nee Hilkia ta ti komushangi Safan: “Ame nda mona embo lomhango mongulu yOmwene.” Opo nee Hilkia a yandja embo lomhango kuSafan. 16 Ndele Safan okwa twala embo kohamba nokwe i fatululila oshinima osho, ndele ta ti: “Aishe, ovapiya voye va pewa va longe, ove i wanifa: 17 oimaliwa oyo ya li mongulu yOmwene ve i kufa mo ndele ve i yandja kovapashukili voshilonga nokovalongifi.” 18 Opo nee omushangi Safan ta shiivifile ohamba ndele tai ti: “Omupristeli Hilkia okwa pa nge embo limwe.” Ndele Safan okwa lesha mo, a leshela ohamba. 19 Nohamba eshi ya uda eendjovo domhango, oya pombaula oikutu yayo; 20 nohamba ya lombwela Hilkia naAhikam yaSafan naAbdon yaMika nomushangi Safan naAsasia, omupiya wohamba, ndele tai ti: 21 “Indeni mu ka pule kOmwene molwange nomolwaava va xupa po muIsrael nomuJuda, omolweendjovo domembo eli la monika. Osheshi oupyuhandu wOmwene ou wa tilwashi kombada yetu munene, shaashi ootate inava diinina ondjovo yOmwene, va ende mwaashishe sha shangwa membo eli.”
22 Opo nee Hilkia naava va tumwa kohamba, va ya komuxunganeki omukainhu Hulda, omwalikadi waSallum yaTokhat yaHasra, omudiinini woikutu, ye a kala muJerusalem, moshilando Shipe, ndele ve mu lombwela ngaha. 23 Opo nee ye ta ti kuvo: “Omwene Kalunga kaIsrael ta ti ngaha: ‘Lombwela omulumenhu ou e mu tuma kwaame, 24 Omwene ta ti ngaha: Tala, Ame ohandi tumu omupya kombada yonhele ei nokombada yoonakukalamo muyo, handi tumu omatulomutima aeshe a shangwa mo membo, mwe li leshela ohamba yaJuda. 25 Osheshi mwe liteeka nge ndele mwa twiminina oikalunga imwe, mu handukife nge noilonga yeni aishe yomake eni, onghee hano oupyuhandu wange tau ka tilwashi kombada yonhele ei, ndele itau ka dimwa po. 26 Ndelenee lombweleni ohamba yaJuda, oyo ye mu tuma mu pule kOmwene: Omwene Kalunga kaIsrael ta ti ngaha: Omolweendjovo odo we di uda 27 omutima woye eshi wa pupala ndele ove we lininipika koshipala shaKalunga, eshi wa uda eendjovo daye te di popile onhele ei noonakukala muyo, ndele we lininipika koshipala shange, ndele wa pombaula oikutu yoye ndele wa lila koshipala shange, onghee hano nde ku uda, Omwene ta ti. 28 Tala, Ame ohandi ke ku ongela pooxo, ndele to ka pakwa nombili mombila yoye, nomesho oye itaa ka tala omupya aushe ou, Ame ohandi ke u tumina onhele ei noonakukala muyo.’ ” Ndele vo ova twalela ohamba enyamukulo.
Josia ta ningi ehangano nOmwene
29 Opo nee ohamba ya ifana ovakulunhu aveshe vomuJuda novomuJerusalem. 30 Nohamba oya ya kongulu yOmwene novalumenhu aveshe vaJuda noonakukalamo muJerusalem novapristeli nOvalevi novanhu aveshe, ovakulunhu novanyasha, ndele yo oya leshela momatwi avo eendjovo adishe domembo lehangano olo la monika mongulu yOmwene. 31 Nohamba oya ya tai kala ofika ponhele yayo ndele ya ninga ehangano koshipala shOmwene nokutya, yo tai shikula Omwene ndele tai diinine oipango yaye neendobwedi daye neenghedimhango daye nomutima aushe wayo nomwenyo aushe wayo, i wanife eendjovo dehangano, odo da shangwa membo olo. 32 Ndele ya tambula mehangano aveshe ava va monika muJerusalem nomuBenjamin. Noonakukalamo muJerusalem ova ninga ngaashi ehangano laKalunga, Kalunga kooxe, tali pula. 33 Ndele Josia okwa hanauna po oixuna aishe yomomikunda adishe dovana vaIsrael, naaveshe ovo va monika muIsrael ye okwe va fininika okulongela Omwene Kalunga kavo. Pomafiku aeshe aye, vo inava kanduka mOmwene Kalunga kooxe.
© Oshikwanyama Bible Revised © Bible Society of Namibia, 2008, 2012.
