Jeremia naHanania
1 Ndele momudo tuu winya, pehovelo lepangelo laSedekia, ohamba yaJuda mohani onhinhano yomomudo waye omutine mepangelo, omuxunganeki Hanania yaAsiria, Omugibeon, okwa lombwela nge motembeli yOmwene moipafi yovapristeli noyovanhu aveshe ndele ta ti ngaha: 2 Omwene womatanga ovakwaita, Kalunga kaIsrael ota ti: Ondjoko yohamba yaBabilon ohandi i teyaula. 3 Omido mbali ngeenge da pita, oiyuma aishe yomotembeli, ya kufwa konhele ei kuNebukadnesar, ohamba yaBabilon, noye i twala kuBabilon, ohandi i alulile apa ponhele ei. 4 NaJekonia yaJehoiakim, ohamba yaJuda neenghwate adishe domuJuda, da ya muBabilon, ohandi di alulile apa ponhele tuu ei, Omwene osho ta ti, osheshi Ame nda hala okuteya po ondjoko yohamba yaBabilon. 5 Ndelenee omuxunganeki Jeremia okwa nyamukula omuxunganeki Hanania moipafi yovapristeli nomoipafi yovanhu aveshe va li ofika motembeli yOmwene, 6 omuxunganeki Jeremia okwa tya ngaha: “Amen. Omwene na ninge ngaha. Omwene na wanife eendjovo doye odo we di xunganeka, Ye na alulile ponhele ei oiyuma yomotembeli yOmwene, neenghwate adishe da kala muBabilon. 7 Ndelenee pwilikina tuu ondjovo ei handi i lombwele momatwi oye nomomatwi ovanhu ava aveshe. 8 Ovaxunganeki aveshe, va li nge komesho, nova li komesho yoye okokudja mounyuni wonale, ova xunganekela omadu mahapu nomauhamba manene oita noiponga noudu wolutapo. 9 Ndelenee omuxunganeki ou ta xunganeke ombili, nondjovo yaye ngeenge tai wanifwa, oye shili omuxunganeki a tumwa kOmwene.”
10 Opo nee omuxunganeki Hanania okwa kufa ondjoko mofingo yomuxunganeki Jeremia ndele te i teyaula po. 11 Ndele Hanania okwa popya moipafi yovanhu aveshe ndele ta ti: “Omwene ota ti ngaha: Omido mbali ngeenge da pita, osho ngaha ohandi ka teyaula po ondjoko yohamba Nebukadnesar, omeefingo doiwana aishe.” Ndele omuxunganeki Jeremia okwa dja po. 12 Ndelenee ondjovo yOmwene ya hanga Jeremia, omuxunganeki Hanania eshi a teya ondjoko oyo ya li mofingo yomuxunganeki Jeremia, oyo ei: 13 “Inda u ka lombwele Hanania u tye: ‘Omwene ota ti: Ove wa teya po ondjoko yoshiti, ponhele yayo ove u nokuninga ondjoko yoshivela. 14 Osheshi Omwene womatanga ovakwaita, Kalunga kaIsrael ota ti: Eefingo doiwana ei aishe ohandi di lekifa ondjoko yoshivela, opo va longele Nebukadnesar, ohamba yaBabilon, vo otave mu longele, heeno, noifitukuti yo aishe onde i mu pa.’ ” 15 Ndele omuxunganeki Jeremia okwa tya komuxunganeki Hanania: “Hanania, pwilikina! Omwene ine ku tuma, ahowe, ndelenee oshiwana eshi ove we shi lineekelifa oipupulu. 16 Onghee hano Omwene ota ti ngaha: ‘Tala, Ame ohandi ku kufa ko kombada yedu. Momudo tuu ou ove oto ka fya, osheshi ove owa udifa eliteeko okweefa Omwene.’ ” 17 Ndele omuxunganeki Hanania okwa fya momudo tuu oo mohani onhiheyali.
© Oshikwanyama Bible Revised © Bible Society of Namibia, 2008, 2012.
