Kalunga ta ka handukila Ninive ndele ta ka hololela oshiwana shaye ouwanghenda waye
1 Ninive tashi xunganekwa. Embo lemoniko laNahum Omujelkosi. 2 Omwene Oye Kalunga omuladi nomukongololi, heeno, Omwene Ye omukongololi, e yadi oupyuhandu. Omwene Ye omukongololi kovatondi vaye, ndele ta diinine ehandu laye kovatondadi vaye. 3 Omwene Ye omutalanheni e neenghono dihapu. Ndelenee Omwene ita efa okuhandukila. Ondjila yaye otai ende mokafudaela nomoshikungulu. Noilemo oyo ondwi yeemhadi daye. 4 Ye ota hanyene efuta note li pwiininike nomilonga adishe ote di kukutike. Basan naKarmel otai tene, nokuhapa kwaLibanon taku fi omutenya. 5 Eemhunda otadi kakama koshipala shaye noikulundudu tai diluka. Edu tali litumbu koshipala shaye, heeno, ounyuni noonakukalamo aveshe. 6 Olyelye ta shiiva okukala ofika moipafi youpyuhandu waye? Olyelye ta kalele ehanyo lehandu laye? Exwamo lehandu laye tali ka tilwashi ngaashi omundilo, nomamanya taa topaana koshipala shaye. 7 Omwene Oye omuwa, Oye ehondameno mefiku loudjuu, ndele Ye e shii ovo have mu lineekele. 8 Ndelenee onhele yasho te i xulififa efundja linene novatondadi te va telatele momulaulu. 9 Nye otamu diladila shike, mu twe ondubo nOmwene? Ye ota ka xulifa po sheke: Oudjuu itau ka holoka luvali. 10 Osheshi nande vo va kale nokukitakana mumwe ngaashi omano nonande va kale va tutikwa komaviinyu, va tuta ngaashi omaviinyu oovene, vo otava ka xwikwa po ngaashi oihati ikukutu. 11 Mwoove, oshilando, omwa dja ou a diladilila Omwene owii, ou e nomauko mai.
12 Omwene osho ta ti: “Nande va kale yo ve yadi eenghono, nomuvalu wavo muhapu, vo otava ka tetwa po nokuxula po. Ame onde ku xutula, ndelenee ihandi ke ku xutula vali. 13 Ndelenee paife eshi ondjoko yoye ohandi i teya po, neestropa doye ohandi ke di tokola.” 14 Ndelenee Omwene moku ku tonga ta lombwele: “Ombuto yedina loye itai ka kunwa vali. Ame handi ka kufa po motembeli yaKalunga koye oihongwafano noitelekwafano. Ame handi ke ku fela ombila, osheshi wa monika ove u li pokuxula po.”
15 Tala keemhunda eemhadi daau ta eta onghundana iwa, ou ta udifa ombili! Akutu Juda, dana oivilo yoye! Wanifa omaudaneko oye! Osheshi omuhanauni ite uya vali kwoove. Ye a nyonaunwa po sheke.
© Oshikwanyama Bible Revised © Bible Society of Namibia, 2008, 2012.
