Oluhaelo lOvaisraeli nokufimaneka oikalunga muSittim
1 Ovaisraeli eshi va kala muSittim, ovanhu va hovela okuhaela novana oukadona Ovamoab. 2 Venya ova ifana ovanhu koivilo yomayambo oikalunga yavo. Novanhu va lya ndele ve linyongamenena oikalunga yavo. 3 Osho ngaha hano Ovaisraeli ve liyandjela okufimaneka Baal-Peor; ndelenee ehandu lOmwene la xwamena Ovaisraeli. 4 Opo nee Omwene ta ti kuMoses: “Kufa ovakulunhu aveshe voshiwana u va endjelelifile Omwene momutenya, opo oupyuhandu wOmwene okuhandukila Israel u lote.” 5 Moses okwa lombwela ovatokoli veendjovo vomuIsrael ndee ta ti: “Keshe umwe na dipae movalumenhu vaye ovo ve liyandjela Baal-Peor.”
6 Ndele omulumenhu umwe Omuisraeli e uya nokwa etela ovaneumbo vaye omukainhu Omumidian moipafi yaMoses nomoipafi yeongalo alishe lovana vaIsrael, fimbo va li tava lili poshivelo shetwali leongalo. 7 Pinehas yaEliaser, omona womupristeli Aron, eshi e shi mona, okwa dja mo mongudu, ndee ta kufa eonga meke laye. 8 Nokwa shikula omulumenhu Omuisraeli nokwa ya metwali ndee te va twile kumwe aveshe vavali, omulumenhu Omuisraeli nomukainhu. Opo nee omupya wa lota mokati kovana vaIsrael. 9 Ndelenee ava va fila momupya ou, va li ve fike pomayovi omilongo mbali naane.
10 Opo nee Omwene okwa popya naMoses ndee ta ti: 11 “Pinehas yaEliaser, omona womupristeli Aron okwa kandula po oupyuhandu wange movana vaIsrael, ye eshi a monifa ouladi wange nokudiinina ouladi mokati kavo, opo ame mouladi wange inandi mana po ovana vaIsrael. 12 Onghee hano popya u tye: ‘Tala, Ame ohandi ningi naye ehangano lombili yange, 13 ndele lo tali ka ninga kuye nokomaludalo aye konima yaye ehangano laalushe loupristeli, shaashi ye okwa fya ouladi omolwaKalunga kaye nokwa kwatakanifa ovana vaIsrael.’ ” 14 Nedina lomulumenhu Omuisraeli ou a dipawa, pamwe nomukainhu Omumidian, ola li Simri yaSalu, omukulunhu wepata laSimeon. 15 Nedina lomukainhu Omumidian ou a dipawa, ola li Kosbi yaSur. Xe okwa li omukulunhu wepata lOvamidian.
16 Omwene okwa popya vali naMoses ndee ta ti: 17 “Pongekeni Ovamidian mu ke va hanaune po, 18 osheshi vo ove mu pongeka omolwekengelelo lavo ve li mu diladilila moshinima shaPeor nomoshinima shaKosbi, omona okakadona komukulunhu Omumidian, ou a dipaelwa Peor mefiku lomupya.”
© Oshikwanyama Bible Revised © Bible Society of Namibia, 2008, 2012.
