Eyelu
1 Ndele Omwene okwa lombwela Noa ta ti: “Inda mongulu yomomeva, ove neumbo loye alishe, osheshi ove onde ku mona omuyuki koshipala shange mepupi eli. 2 Moinamwenyo ya koshoka likufila mo ooivali luheyali, oindume noikadi. Ndelenee moinamwenyo ei inai koshoka, kufa mo ooivali, oshindume noshikadi shasho. 3 Nomeedila dokeulu yo mbali luheyali, eendume neenghadi, oludi opo li kale li na omwenyo kombada yedu alishe. 4 Osheshi oku na omafiku aheyali natango opo nee Ame ohandi ka lokifila edu alishe odula omafiku omilongo nhee oufiku nomutenya, ndele handi ka komba po kombada yedu oinamwenyo aishe ei nda ninga.” 5 Ndele Noa okwa ninga naanaa ngaashi Omwene e mu lombwela. 6 Ndele omido daNoa oda li di fike pomafele ahamano, eshi eyelu le uya kombada yedu.
7 Ndele Noa novana vaye ovamati nomwalikadi waye novalikadi vovana ovamati ova ya pamwe naye mongulu yomomeva va ye onhapo yomeva eyelu. 8 Moinamwenyo ya koshoka nomoinamwenyo inai koshoka, nomeedila nomoialangati yokombada yedu, 9 omwa dja ooivali nooivali, ya ya naNoa mongulu yomomeva, oshindume noshikadi, ngaashi Kalunga a lombwelele Noa. 10 Omafiku aheyali eshi a pita po, omeva eyelu okwe uya kombada yedu.
11 Momudo omutimafele ahamano womokukala kwaNoa, mohani onhivali mefiku etimulongo naheyali lohani, mefiku tuu olo eefifiya adishe domoule womedu oda fituluka noikelelifo yeulu oya yeuluka. 12 Ndele odula inene ya loka kombada yedu omafiku omilongo nhee oufiku nomutenya. 13 Mefiku tuu olo Noa naSem naHam naJafet, ovana vaNoa, nosho yo omwalikadi waNoa novalikadi vatatu vovana vaye, ova ya mongulu yomomeva. 14 Vo noifitukuti aishe pamaludi ayo noimuna aishe pamaludi ayo noialangati aishe tai linyenge kombada yedu pamaludi ayo needila adishe pamaludi ado, heeno, eedila adishe di lili nadi lili keshe eshi tashi tuka, 15 ombelela aishe ei ya li i na omwenyo, oya ya ooivali nooivali kuNoa mongulu yomomeva. 16 Ndele oyo ya ya mo, oya li oshindume noshikadi shomombelela aishe, ngaashi Kalunga e mu lombwela. Ndele Omwene okwa idila po.
17 Ndele eyelu ola kala kombada yedu omafiku omilongo nhee: omeva okwa hapupala ndele taa yelula ongulu yomomeva, ndele yo oya yeluka ko kombada yedu. 18 Ndele omeva okwa lundumuka a hapupala unene kombada yedu, fimbo ongulu tai telaana kombada yao. 19 Ndele omeva okwa tumbalala kombada yedu, ndee eemhunda adishe dile dokoshi yeulu oda tuvikilwa. 20 Omeva okwa yeluka omaludimbo omulongo naatano kombada yado, eshi eemhunda da tuvikilwa. 21 Ndele ombelela aishe ya li kombada yedu oya fya: eedila noimuna noifitukuti noipuka ei hai nyangadala kombada yedu, novanhu aveshe. 22 Keshe eshi sha li shi na omufudo womwenyo momayulu, aishe ei ya kala koukukutu, oya fila mo. 23 Osho ngaha oinamwenyo aishe ei ya li kombada yedu ya kombwa po, ovanhu noimuna noialangati needila dokeulu. Yo oya kombwa po kombada yedu. Ndele Noa oye aeke a fyaala po naava va li pamwe naye mongulu yomomeva.
24 Ndele omeva okwa kala nokutumbalala kombada yedu omafiku efele limwe nomilongo nhano.
© Oshikwanyama Bible Revised © Bible Society of Namibia, 2008, 2012.
