Eindilo okwaamenwa kowii
Epsalome laDavid.
1 Omwene, ohandi kuu onghuwo kwoove, i tondoka!
Uda ondaka yange, eshi handi ku ifana.
2 Eindilo lange nali talwe kwoove,
olo etwimino, neyelulo lomaoko ange,
olo eyambo longuloshi.
3 Omwene, kokanya kange paka ko omukeleli,
nomunangeli koshivelo shomilungu dange!
4 Anda ko omutima wange, uha ame kowii,
ame ndiha longe oilonga youmbudi
pamwe naava ve i hole;
inandi hala nokuli okumakela kounyenye wavo.
5 Omuyuki na denge nge, osho ohole,
ye na pukulule nge,
osho omuvaeko womomutwe,
omutwe wange, eshi itau shi anye nande,
osheshi natango eindilo lange tali kondjifa oumbudi wavo.
6 Ovatokoli vomuvo,
ngeenge va undwilwa momakololo omamanya,
opo otaku udika eendjovo dange, nokutya odiwa.
7 Ngaashi umwe ta limi edu ndele te li hende,
osho omakipa etu taa nyanekwa mokanya koshovafi.
8 Osheshi Omwene, Kalunga kange,
kwoove omesho ange oko a yukilila,
kwoove oko handi ka ningina;
omwenyo wange ino u tilashi.
9 Shiye nge komwiyo, ou va tela nge,
nokomalulo ovaninginai.
10 Ovadinikalunga nave likwate nomalulo avo vene,
fimbo ame handi piti po.
© Oshikwanyama Bible Revised © Bible Society of Namibia, 2008, 2012.
