Sanheerib ta homona Jerusalem Exupifo likumwifa laJerusalem
1 Konima yoinima ei noyokweenda kwa yuka kwaHiskia, Sanheerib, ohamba yaAsiria, ye uya, ndele tai homona Juda, ndele ya fitikinina oilando yomusho i neehotekuma ndele ya hala oku i nangala. 2 Ndele Hiskia eshi a mona nokutya Sanheerib ote uya nokwa hala okuhomona Jerusalem, 3 okwa kundafana novakulunhu vaye novaladi vaye a fitike po eefifiya di li pondje yoshilando. Ndele vo ove mu kwafa. 4 Novanhu vahapu va ongala ndele va fitika po eefifiya, nosho yo okamulonga taka tondokele mokati koshilongo, ndele tava ti: “Omolwashike eehamba daAsiria mokuuya kwado di mone omeva mahapu?” 5 Nokwe linyatipaleka nokwa tungulula ohotekuma ya li ya ngumaunwa po, ndele ta tungu kuyo eeshungongulu. Nokwa tunga yo ohotekuma onhivali pondje. Nokwa tunga eehote muMillo shomoshilando shaDavid ndele ta hambulifa omaonga noikelelifo ihapu. 6 Nokwa tula po ovakulunhu vomatanga ovakwaita, nokwe va ifana kuye monhele ya lalakana yoposhivelo shoshilando ndele te va hekeleke, ta ti: 7 “Kaleni mwa pama, mwa nyatipala. Inamu tila ndele inamu haluka molwohamba yaAsiria ile molwongudu aishe oyo tai uya pamwe nayo. Osheshi ava ve li pufye ovahapu, ve dule venya ve li puyo. 8 Puyo ope nokwooko kwombelela, ndelenee pufye ope nOmwene Kalunga ketu te tu kwafa mokulwa moita yetu!” Novakwaita ve lineekela eendjovo daHiskia, ohamba yaJuda.
9 Konima yaashi Sanheerib, ohamba yaAsiria, ya tuma, osheshi yoovene nomatanga ayo aeshe ovakwaita va li puLakis, ya tuma ovapiya vayo kuJerusalem, kuHiskia, ohamba yaJuda, nokOvajuda aveshe ovo va li muJerusalem, oku va lombwela: 10 “Sanheerib, ohamba yaAsiria, tai ti ngaha: ‘Tamu lineekele lyelye, eshi tamu kala mwe liidilila muJerusalem? 11 Hiskia ite mu pukifa mbela, mu fye ondjala nenota, ye eshi ta ti: “Omwene Kalunga ketu te ke tu xupifa mo meke lohamba yaAsiria?” 12 Hiskia oye tuu ou, ndishi, a hanauna po oikulundu yaye neealtari daye nokwa lombwela Juda naJerusalem: “Mu nokutwa eengolo koaltari imwe aike, nokutwimina kuyo?” 13 Kamu shi shii eshi ame nootate va ningila oiwana aishe yoilongo? Oikalunga yoiwana yoilongo oya xupifa tuu oilongo yayo meke lange? 14 Olyelye womoikalunga yoiwana oyo aishe ya hanaunwa po kootate, ya dula okuxupifa oshiwana shaye meke lange opo Kalunga keni a dule oku mu xupifa meke lange? 15 Inamu itavela Hiskia e mu kengelele ndele te mu pukifa ngaha. Ndele inamu mu lineekela, osheshi kalunga nande kamwe koiwana ile koshilongo nande shimwe, ina xupifa oshiwana shaye meke lange ile momake ootate. Hano ngahelipi Kalunga keni ta dulu oku mu xupifa meke lange?’ ”
16 Ovapiya vayo va popya eendjovo dimwe dihapu dondubo nokusheka Omwene Kalunga nomupiya waye Hiskia. 17 Ndele yo oya shanga yo onhumwafo i sheke Omwene Kalunga kaIsrael nokupopya Omwene nokutya: “Ngaashi oikalunga yoiwana yoilongo ya nyengwa okuxupifa oiwana yayo meke lange, osho yo Kalunga kaHiskia ita ka xupifa ovanhu vaye meke lange.” 18 Ndele vo ova popya mOshiheberi kovakwaita vomuJerusalem, ve li kekuma lohote, opo va tilifwe nokuhaluka, venya va dule okunangala oshilando shavo. 19 Ndele va popya Kalunga kaJerusalem ngaashi oikalunga imwe yoiwana yokombada yedu, nande yo oilonga yomake ovanhu.
20 Ndelenee ohamba Hiskia nomuxunganeki Jesaja yaAmos, eshi va ilikanena oshiwana eshi ndele va kuwa keulu, 21 Omwene okwa tuma omweengeli, ndele a dipaa ovaladi aveshe novakulunhu vomatanga novaneyovi vomonhanda yohamba yaAsiria, onghee yo ya li i nokushuna nokufya ohoni koshilongo shayo. Ndele yo eshi ye uya mongulu yakalunga kayo, ovo va dja molutu layo vene, ve i dipaa neongamukonda.
22 NOmwene okwa xupifa Hiskia noonakukala muJerusalem meke laSanheerib, ohamba yaAsiria nomomake aveshe. Ndele Ye e va twala metulumuko keembinga adishe. 23 Ndele vahapu va etela Omwene muJerusalem eeshali neeshali di nondilo kuHiskia, ohamba yaJuda, onghee ye a tumbalekwa moipafi yoiwana aishe.
Oudu waHiskia, oupuna waye nefyo laye
24 Pomafiku enya Hiskia okwa hangika koudu, hanga a fya. Ndelenee okwa indila kOmwene ndele Ye okwe mu nyamukula ndele e mu pa edidiliko loshikumwifa. 25 Ndelenee ouwa ye e u pewa, Hiskia ine u alulila ouwa, osheshi omutima waye we linenepeka. Onghee hano ehandu la kala kombada yaye nokombada yaJerusalem. 26 Ndelenee melinenepeko laye Hiskia okwe lininipika nomutima aushe, ye mwene noonakukala muJerusalem, onghee hano ehandu lOmwene inali uya kombada yavo pomafiku aa aHiskia.
27 Ndele Hiskia okwa li e noupuna muhapu unene netumbalo nokwe litungila omalimba emona loisiliveli noloingoldo nolomamanya mawa noloinima yedimba liwa noloikelelifo noinima i lili nai lili i nondilo, 28 nomaanda oilya nomaviinyu nomaadi, neenhele doimuna yomaludi e lili nae lili, noyuunda yoimuna. 29 Okwe litungila yo oilando nokwe likongela eengudu dinene deedi nodeengobe, osheshi Kalunga e mu pa emona lihapu. 30 Hiskia tuu ou a fitika po omakungulukilo omeva okamulonga kaGihon nokwe a popolela koshi kwi lwokouninginino koshilando shaDavid. Ndele Hiskia okwa li e nelao mwaashishe e shi ninga. 31 Onghee hano Kalunga e mu tala, opo a shiive ashishe osho shi li momutima waye, okwe mu yandja momake ovatumwa veehamba daBabilon, ovo va tuminwa okupula oshikumwifa osho sha ningwa moshilongo.
32 Noinima imwe tai hepaulula Hiskia noilonga yaye youyuki, tala, oya shangwa membo lomuxunganeki Jesaja yaAmos, membo leehamba daJuda nodaIsrael. 33 Ndele Hiskia okwa ka nangala pooxe, nokwa pakwa moshikulundu kusho taku londwa eshi taku iwa keembila doludalo laDavid. Ndele Juda ashishe noonakukala muJerusalem ve mu fimaneka pokufya kwaye. Nomona waye Manasse okwa ninga ohamba ponhele yaye.
© Oshikwanyama Bible Revised © Bible Society of Namibia, 2008, 2012.
