JESAJA 9 - Oshikwanyama Bible (OKYB)

Ouhamba waMessias tau xunganekwa

1 Pomafiku onale okwa etela edu laSebulon nolaNaftali esheko nodino, ndelenee pomafiku okomesho ota ka fimanekifa ondjila yokuya kEfuta Lopokati; nedu lomoshikandjo shaJordan nokuGalilea omo mwa kala ovanailongo.

2 Oshiwana hashi endaenda momulaulu,

osha mona ouyelele muhapu,

naava hava kala medu lomudile wefyo,

ouyelele otau va minikile.

3 Ove to hapupalifa oshiwana

ndele to shi pe enyaku linene;

ndele vo otava hafele koshipala shoye,

ngaashi tapa hafelwa efiku leteyo

nongaashi tapa kuwililwa metukulo loitinhwa.

4 Osheshi ondjoko ei ye va djuupalela

noshimwati shokombuda yavo

nodibo yomuhepeki wavo,

oto i teya po ngaashi sha ningwa mefiku laMidian.

5 Osheshi keshe olukaku lomukwaita la lyatifwa meweelelo lolwoodi,

noikutu ya nyatekwa kohonde,

otai xwikwa po, ndele tai ningi eendja domundilo.

6 Osheshi okaana ke tu dalelwa,

Omona omumati e tu yandjelwa,

nepangelo oli li komapepe aye,

ndele ta ifanwa: Omukumwifa-Omupukululi,

Kalunga Omunaenghono,

Tate yaalushe, Ohamba yombili.

7 Epangelo laye tali ningi linene, nombili itai xulu po

okolukalwapangelo laDavid nomouhamba waye,

opo Ye e u kanghameke noku u pameka netokolo nouyuki

okefiku eli nofiyo alushe.

Ouladi waKalunga, Omwene womatanga ovakwaita

otau ke shi ninga.

Okuhandukilwa kwaIsrael

8 Omwene ta tumu ondjovo imwe kuJakob, ndele ya wila muIsrael, 9 novanhu aveshe naEfraim novakali muSamaria otave ke i shiiva, ava mokulinenepeka nomokufulalala tava ti komutima: 10 “Eedopi oda wila po, ndelenee fye ohatu ka tungulula nomamanya a hongwa, omikwiyu domofuka oda kewa po, ndelenee fye ohatu ka twika mo omisederi ponhele yado!” 11 Ndelenee Omwene okwe mu pendulila ovafininiki nokwa hongaifa ovatondi veni; 12 Ovaarami okoushilo nOvafilisti okouninginino, opo va lya Israel eemhanda mbali. Ndele mwaaishe ei ehandu laye inali kandulwa po, ndelenee natango eke laye ola yeluka. 13 Ndelenee ovanhu inava alukila kwaau te va denge, ngaashi itava kongo Omwene womatanga ovakwaita. 14 Onghee hano Omwene ota tete Israel omutwe nomushila, oluvale lomulunga noshihati sholumbungu, mefiku limwe. 15 Omukulunhu noshipuna oye omutwe, nomuxunganeki ou ta longo oipupulu, oye omushila. 16 Ovakwateli komesho voshiwana eshi ova ninga ovapukifi, novakwatelwa komesho ove lihanifwa. 17 Onghee hano Omwene ita ka hafela ovamati vavo, no ita file onghenda eefiye davo, novafiyekadi vavo, osheshi vo aveshe ovadinikalunga novakolokoshi, nakeshe okanya ohaka popi oulai wongaho. Ndele mwaaishe ei ehandu laye inali kandulwa po, ndelenee natango eke laye ola yeluka. 18 Osheshi oudinikalunga owa xwama ngaashi omundilo tau lungwinike po omano neeshosholo, owa xwameka ofuka nongoya, opo tai i pombada ngaashi okalungululu komwifi.

19 Edu ola xwama omolwoupyuhandu wOmwene womatanga ovakwaita, novanhu va ninga oikulya yomundilo, ndele vo itava filafana onghenda. 20 Ndele otava lumata kolulyo nove nondjala, otava li kolumosho, ndele vo itava kuta; keshe umwe ota li ombelela yokwooko kwaye mwene. 21 Manasse ota li Efraim naEfraim ota li Manasse, ndele aveshe ava vavali otava hangakene Juda. Ndele mwaaishe ei ehandu laye inali kandulwa po, ndelenee natango eke laye ola yeluka.