Asa ta pange oukaume naBenhadad, ndele ta handukilwa
1 Momudo omutimilongo nhatu nomutihamano womepangelo laAsa ohamba yaJuda, Baasha, ohamba yaIsrael, ya kwata ko Juda, ndele tai tungu oshilandopopilo Rama, okupata eendjila adishe muJuda. 2 Opo nee Asa a tumina Benhadad, ohamba yaAram, yo ya li muDamaskus, oisiliveli noingoldo yomomalimba ongulu yOmwene noyomomalimba ongulu yohamba, ndele ta ti: 3 “Napa kale ehangano pokati ketu naave ngaashi la li pokati kootate. Omaano aa oshisiliveli noshingoldo ooye. Paife teya po ehangano leni naBaasha, ohamba yaIsrael, opo a kufe mo omatanga ovakwaita moshitukulwa shange.” 4 Ndele Benhadad okwa itavela eendjovo daAsa, nokwa tuma ovakulunhu vomatanga ovakwaita okuhomona oilando yomuIsrael, nokwa teya po Ijon naDan naAbel-Bet-Maaka noshitukulwa shopomunghulo wefuta laGalilea noshitukulwa shaNaftali ashishe omo mwa li hamu tuvikilwa oinima. 5 Ndele Baasha, eshi e shi uda, okwa efa okutunga Rama ndele a dimbuka okulonga oshilonga shaye. 6 Opo nee ohamba Asa ya ifana Ovajuda aveshe, ndele va kufa omamanya nomiti, odo Baasha e di pamekifa Rama, ndele tai di tungifa Geba naMispa.
7 Ndele pefimbo tuu olo omumonikokule Hanani e uya kuAsa, ohamba yaJuda, ndele ta ti kuyo: “Shaashi ove we liameka kohamba yaAram, ndele ino liameka kOmwene, Kalunga koye, onghee hano omatanga ovakwaita vohamba Aram a dja mo meke loye. 8 Ndi shi shii Ovaetiopia nOvalibia va li ve nomatanga manene unene nomatemba oita novalondi veenghambe? Ndelenee Ye okwe va yandja meke loye, shaashi we liameka kOmwene. 9 Osheshi omesho Omwene taa tale edu alishe, opo a kwafe neenghono ovo have liameke kuye nomutima aushe. Moshinima eshi wa ninga oushima, osheshi okudja paife tapa ka kala oita naave.” 10 Ndelenee Asa okwa handukila omumonikokule nokwe mu idililifa modolongo, shaashi ye okwa li e mu udila onya. Ndele pefimbo olo Asa okwa hepeka vamwe vomoshiwana.
Efyo laAsa
11 Ndele tala, oinima tai hepaulula Asa, inya yotete naai yaxuuninwa, oya shangwa membo leehamba daJuda nodaIsrael. 12 Ndele momudo omutimilongo nhatu nomutimugoi womepangelo laye, Asa okwa vela eemhadi. Oudu waye wa li mudjuu. Ndelenee nomoudu waye ina konga Omwene, ndelenee ovahakuli. 13 Ndele Asa okwa ka nangala pooxe, ndele okwa fya momudo omutimilongo nhee naimwe womepangelo laye. 14 Ndele ve mu paka mombila yaye, e i lihokela moshilando shaDavid, ndele ve mu nangeka mombete i yadi oimbodi yedimba liwa, i lili nai lili ya pilaulwa komunongo. Ndele ve mu xwikila oixwikomwa ihapu.
© Oshikwanyama Bible Revised © Bible Society of Namibia, 2008, 2012.
